Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°18 - 16 de julhet dau 2012

Posted by Pantainfo : infos de l'emission d'actualitats setmanieras sus ràdio nissapantai.com on July 16 2012, 01:35am

PantaInfo n°18 - 16 de julhet dau 2012

PantaInfo, l’informacion setmanièra dau País Nissart e Alpenc

Lo 16 de julhet dau 2012

PAíS NISSART E ALPENC

1/ Actualitat especiala OIN-Plana de Var

La lucha per preservar li milhori tèrras agricòli dau país noastre e empedir l’expulsion de vièlhi familhas nissardi dins la Plana de Var s’amplifica. L’operacion « Tèrra Segurana », que mènon ensèms lo Collectiu « OIN – Plana de Var : per un debat ciutadan » e lo Mòto Ciutadan dau País Nissart, segue lo sieu camin e recampa de mai en mai de monde. Cada dissabta e diménegue à partir de 10 oras, au 303 de l’avenguda Santa Margarida, si retròvon de benevòlos per travalhar la tèrra, partejar lo past e discutir sus li accions da faire. Vist que l’agricurtura locala a un ròtle important da jugar, la reconquista dei tèrras fertili es au coar dau debat dau projèct d’amainatjament de l’OIN-Plana de Var. A l’entorn dei agricultors nissarts menaçats d’expropriacion, l’operacion Tèrra Segurana de remesa en activitat dei tèrras cultivabli persegue la sieu accion cada dimenjada. A cada còup un apèl au sosten es mandat à toi lu estatjants de Nissa, per persegre li promièri accions menadi : seuclament, aigatge, apoart d’engrais naturals, don de materialet per lo jardinatge, la clausura… e après lu esfoarç, la convivença d’un past partejat da Janina e la sieu familha au 303 de l’avenguda Santa Margarida. Toi son lu benvenguts. Per li participar si pòu demandar d’entresenhas à Nadege Bonfils, la coordinatritz de l’operacion, en li escrivent à l’adreiça electrònica : nadegebonfils@gmail.com

Fa ja un molon de temps que si mèna la lucha de « David lo Nissart » contra « Goliat la societat Vinci », en la Plana de Var, per empedir lo betonatge dei darrieri tèrras agricòli alluvionari per lo plan d’amainatjament « Eco-Valada ». De numeroï associacions radunadi en lo collectiu « OIN – Plana de Var », fan despí mai de doi ans toti li demarchas possibli contra aquesto projèct funèst. Lo darrier vengut sus la scèna es lo MCPN (Mòto Ciutadan dau País Nissart) qu’a lançat l’Operacion Tèrra Segurana que consiste à plantar de semenças sus d’aquesti tèrras productivi e l’ocupacion dei luècs emé lo sostèn dei artistas. Toi an ben fach avançar li cauas au niveu mediàtico e dins lu rets socials despí quaucu jorns. En defoara de toi lu constrenhiments associatius e políticos, foart dau sostèn dei populacions concernadi e unicament preocupadi da la sieu lucha contra lu grand grops que voàlon s’empadronir de la Vila e de la Contea, an sauput faire passar un messatge qu’es, en defoara de tot presupauat ideológico, reçauput da toi, capit da toi e difusit da toi. Toi an ben capit que nautres cridam aut e foart emb elu que « la noastra tèrra es pas à vendre ». Lo collectiu convida doncas toi lu ciutadans de la Contea de rajónher la lucha per la sauvagarda dei noastri tèrras, sota l’eslogan : « volètz manjar ? cagatz de blea, manco de beton ! »

Per rapèl istòrico, l’Operacion d’Interés Nacional de la Plana de Var, que poarta coma nom « Eco-Valada », es un projèct que preve d’aquí 30 ans l’amainatjament de la Plana de Var sus d’una superficia de 10.000 ectars. Aquesto projèct es coordonat da un EPA (Establiment Pública d’Amainatjament) qu’es encargat de produrre lu estudis preliminaris, de definir lu futurs amainatjaments e de metre en òbra la sieu realisacion. L’OIN de la Plana de Var es declarada per que l’Estat decide sensa impauar de concertacion dei ciutadans dei comunas concernadi. Or, l’OIN vòu tractar lo noastre territòri coma una vetrina económica e financièra. La necessitat d’amainatjament d’aquesto territòri es reala, mas cau que sigue ecologica e non economica. Ensin, d’associacions e de ciutadans si mobilíson despí d’annadas per preservar la Plana de Var. Lo collectiu OIN-Plana de Var soeta crear una coesion dei associatius e dei ciutadans sus lo perimètre de l’OIN e en-delà embé per exigença un debat público e coma tècola d’accions legali mas finda simbòliqui.

OCCITÀNIA

1/ Actualitat política :

Lo dimarts 10 de julhet passat, la Cort Administrativa d’Apelacion de Marselha a anullat la decision dau Tribunal Administratiu de Montpelhièr, dau 12 d’octòbre dau 2010, qu'obligava la Comuna de Vilanòva de Magalona de retirar denant doi mes lu paneus d’intrada de la vila qu'èron escrichs en occitan, pròpi sota lu paneus en francés. La decision respondia à la denonça presentada da un nomenat MRPS (Moviment Republican de Sauvacion Pública), erigit coma sauvaire dei essenças jacobini, contra la decision presa dau cònsol Noël Segura. Lo municipi presentèt un recors contra aquela decision e aüra la sentença es estada publicada. Segond la Cort Administrativa d’Apelacion de Marselha, lo plaçatge de paneus en occitan a Vilanòva de Magalona transgredissèt minga lèi ni minga drech en degun, en començant per l’omnipresent article 2 de la Constitucion Francesa. En mai d’aquò, aquel organisme remembra que la lèi preve meme la traduccion de paneus estradiers devèrs de lengas estrangieri, cen que comprèn segurament li lengas regionali. E au delà, fa tombar sensa minga contemplacion lo principal argument dau MRSP : segond la Cort, s'es pas demostrat que lo paneu en occitan posquesse èstre un motiu d’inseguretat estradièra. En aqueu sens, la Cort condamna lo MRSP à pagar 2.000 euros à la comuna de Vilanòva de Magalona en vertut de l’article L.761-1 dau Còde de Justícia Administrativa. En consequença, Robert Hadjadj, president d’aqueu gropuscul jacobin, que di que defende li valors de la Revolucion Francesa, es estat desfach publicament da la justícia francesa e lu sieus paures arguments son estats tombats sensa minga contemplacion. Cau remembrar que, dins la sieu lamentabla argumentacion, Hadjadj exclamava que l’accent greu sus la letra « O » de Vilanòva de Magalona « exista pas en francés », cen que pòu far à pensar qu'aqueu òme a pas jamai capit que, justament, s'agisse d'un paneu qu'es pas escrich en francés, mas en occitan. Es de soslinhar que la sentença, dins la sieu argumentacion, fa referença à l’article 75.1 de la Constitucion Francesa, dient que « li lengas regionali apertènon au patrimòni de França ». Dins aqueu sens, en mai d’aquò, s’especifica que li son divèrsi sentenças e decisions, quauqui uni dau meme Conseu Constitucional, que díon clarament que li lèis que dónon la prioritat au francés « an pas per tècola la proïbicion de l’usatge dei traduccions se l'emplec de la lenga francesa es garantit ». La decision, au delà de l'importança locala, e au delà d'èstre un succès político e personal per lo cònsol Segura, es un sinhau indubitable de la legalitat de la sinhalisacion bilingüa dapertot en Occitània e finda dins lu autres territòris nacionals sota administracion francesa. Es finda, en consequença, un sinhau per aquelu que voàlon non solament priorisar la lenga francesa, mas liquidar per totjorn li mau nomadi lengas regionali.

2/ Actualitat economica e sociala :

De formatge de Ròcafoart AOP (Apelacion d’Origina Protegida), vendut sota una dotzena de marcas, es estat retirat da la vèndita en causa de la deteccion de la bacteria E.Coli sus un produch, segond cen qu’anoncèt divendres la societat Gabrièl Coulet. Lu produchs tocats son estats comercialisats sota diferenti marcas, dins de botigas d’Atac, Auchan, Brake, Carrefour, Cora, Intermarché, Leclerc, Match, Mètro, Monoprix e Système U, sota lu numèros de lòts 120406152, 156, 157, 159, 160, 164 e 165 segond li informacions dau jornal Midi Libre. Lo productor de Ròcafoart (Causse de Larzac) di qu’un contraròtle a mes en evidença la presença de la bacteria Escherichia Coli. Alora, si demanda ai personas qu’auríon aquelu produchs de non lu consomar e de lu raportar dins lu ponchs de vèndita dont lu an crompats. La bacteria « es estada detectada au moment d’un autocontraròtle efectuat da Monoprix sus una lesca » a dich à l’AFP lo responsable de la qualitat de la societat Jérôme Fabre qu’ajonhe : « per precaucion, si siam decidits de procedir à l’apèl, maugrat que degun es vengut malaut ».

3/ Actualitat curturala, especiala Estivada de Rodés 2012 :

Dau dimècres 25 au diménegue 29 de julhet si debanerà à Rodés la novela edicion dau festenau « Estivada ». Es à l’ora aüra lo mai grand festenau dei curturas occitani. Au programa li seran de grops famós coma : Massalia Sound System, Zebda, La Mal Coiffée, Mossur T, Lo Seriòl, Brigada Internacionala, Goulamas’k, Gitanistan Orchestra, Lou Davis, Patric, Fanfare des Pyrénées, L’escabòt, Grail’òli, Mans de Breish, Castanha e Vinovèl e patin cofin… Per mai d’informacion sus lo festenau, podètz trovar d’entresenhas sus lo siti www.estivada-rodez.eu, ò per parla-luènh au 05.65.78.10.74.

L'Institut d'Estudis Occitans apèla lu sieus aderents benevòlos a si recampar lo 28 de julhet à Rodés per imaginar lo futur de l'edicion occitana. Despí mantuni decennias, l'IEO federau assuma una part bèla de l'edicion occitana per lo biais dau sieu sector edicion e difusion IDECO. Lo catalògue es conoissut per contenir d’òbras maji de la literatura. IDECO es finda un autís de difusion ficat à disposicion dei autres editors, soventifés associatius, qu'an pas lu mesos físicos de si far conóisser sus d’un territòri de 190.000 qm². Maluroament, despí quauqui annadas, IDECO semblava s’aluènhar dei autors e dei lectors, à tau ponch que mantunu autors fidèls despí la creacion si pènson de cambiar de botiga, en rason dei problemas d’organisacion, coma la mancança de relacion autor/editor, la multiplicacion dei coquilhas, lo non respèct dei delais de publicacions, un site Internet estético mas que manca d'ergonòmia, lo marrit classament dei libres e patin e cofin. Pròchi de la catastròfa económica, lo Conseu d'Administracion de l'IEO pilhèt darrierament la decision de barrar un poast remunerat, cen qu'a causat de discutidas passionadi dins li seccions departimentali entra lu partisans d'una ideològia de solidaritat associativa e lu afogats d'un desvolopament economic en presa dirècta embé li realitats dau mercat liberal. Per anar mai luènh, e reviudar lo sector, cada sòci de l'IEO es convidat à una amassada de refleccion lo dissabta 28 de julhet au matin, à Rodés. Per mai d'informacion, e participar, podètz contactar lo director de l'IEO, Laurenç Gosset.

INTERNACIONAL

1/ França :

Dimècres passat, lo refut dau recors en cassacion d’Yvan Colonna, condamna lo militant còrso definitivament à la perpetuitat, ja qu’es acusat de l’assassinament dau prefèct de Còrsega Claude Erignac. Lo sieu avocat va apelar à la Cort Europèa dei Drechs Umans. Doi ans fa, la auta juridiccion anullèt la sieu promièra condamnacion per un vici de procedura. Yvan Colonna foguèt jutjat un tèrço còup lo 20 de junh dau 2011, e foguèt condamnat tornamai à perpetuitat per l’assassinament de Claude Erignac dau 6 de febrier dau 1998 a Aiacciu, e per l’atac quaucu mes denant de la gendarmeria de Pietrosella, dont l’arma dau crimi foguèt estada raubada. Lo pastor còrso, que clama totjorn la sieu innocença, es en preson despí la fin d’avost dau 2011 à Tolon, après aver passat vuèch ans à Fresnes (en Isola de França). Au moment de l’audiença de cassacion dau 21 de junh, lo sieu avocat, Mèstre Patrice Spinosi, avia litigat sièis motius de cassacion, dau temps que lo parquet general recomandava un refut dau recors. Avia prevengut que se lo Tribunal de cassacion se refermava en la condamnacion de Colonna, apeleria à la Cort Europèa dei Drechs Umans, una procedura que porria pilhar « quatre à cinc ans », totun.

2/ Euròpa

Ucraïna : l’aprobacion d’una lèi que fa oficial lo russo dins quauqui províncias d’Ucraïna a generat una foarta instabilitat institucionala e de protèstas de ciutadans dins li carrièras de Kyïu. Lo president dau parlament, Volodymyr Lytvyn, demissionèt en protèsta contra la lèi e a fach un apèl ai grops parlamentaris per qu’accèpton pas aquela lèi. La polémica dubèrta a portat lo president dau país, lo russista Viktor Ianukòvych, à parlar per lo promier còup d’avançar li eleccions se la situacion non si pòu contrarotlar. Ianukòvych s’acampèt dimècres passat emb quaucu grops parlamentaris per parlar de la crisi institucionala. « Lo president exclude pas que, se s’arriba pas a garantir l’estabilitat de l’activitat parlamentària, caurrà convocar d’eleccions parlamentari avançadi », diguèt lo bureu presidenciau dins un comunicat. Normalament li eleccions parlamentari son previsti per octòbre. La lèi pòu pas intrar en vigor sensa la firma dau president dau Parlament e dau president dau govèrn. Lo promier a demissionat e cau un noveu president per poder aplicar la lèi. La legislacion fa cooficial lo russo dins quauqui províncias à majoritat russofòna, dins un país qu’a 10% de la populacion d’origina russa. Russia fa pression despí d’annadas per que li autoritats d’Ucraïna fàgon oficial la lenga russa. La lèi foguèt prepauada dimarts passat sensa avisar, mentre una reünion dau parlament ucraïnés, e si votèt precipitadament. Lu partits de l’oposicion protestèron formalament a prepau dau mecanisme d’aprobacion de la lèi e afirmèron que far dau russo una lenga oficiala en Ucraïna es un atac pròpi à la constitucion. Per protestar, quitèron lu sieus sètis e lu curbèron emb de grandi bandièras ucraïnesi. Dimècres passat, un grand grop de deputats de divèrs partits manifestèt en una marcha illegala en lo centre de Kyïu. La protèsta provèt d’empedir un acte dont èra per parlar lo president Ianukòvych. La polícia ataquèt durament lu deputats e lu sieus partisans mas lo climat de protèsta foguèt talament grand que Ianukòvych anullèt l’acte e convoquèt una reünion emb de membres dau parlament per estudiar la situacion creada. La lèi, que si votèt sensa èstre sotamesa au procès normal de revision dau tèxto, di que lo russo si pòu considerar « lenga regionala oficiala » en Ucraïna. Mantèn per l’ucraïnés la consideracion de lenga oficiala de l’Estat mas fa que lo russo sigue en fach finda lenga oficiala e que lu requisits linguísticos en favor de l’ucraïnés cèsson d’existar. Per lu deputats de l’oposicion, s’agisse de « la menaça mai granda contra la sobeiranetat ucraïnesa despí la sieu independença », vint ans fa. La lèi serà pas valida fins que la firme lo president, que prova de s’assegurar la leialtat de la minoritat russa d’Ucraïna. Ianukòvych a perdut de popularitat e s’es vist sotamés à la pression de l’Union Europèa. Toi lu dirigents, emb la sola excepcion dei espanhòls, faguèron boïcòt de la celebracion de l’Euro 2012, la copa d’Euròpa dei Nacions de fotbòl, en anant pas ai estadis ucraïnés. Ianukòvych mantèn arrestada l’anciana cap de govèrn Iólia Tymoshenko, qu’a denonçat de torturas. L’Union Europèa a menaçat Ucraïna emb de sancions e a comparat lo govèrn ucraïnés à la dictatura au poder en Belarós.

3/ Monde

Azaoad : lu rebèlas Toaregs dau MNLA, qu’an liberat lo territòri d’Azaoad en abriu, an anonçat diménegue passat qu’an renonçat à la sieu intencion de crear un estat desseparat. « Aspirèm à una independença curturala, política e económica mas pas à la secession », a declarat à Reuters per parla-luènh Ibrahim Ag Assaleh, l’un dei dirigents dau MNLA, organisacion independentista laïca que lu grops armats terroristas islamistas an caçat d’Azaoad, de que l’independença èra estada proclamada en abriu passat, decision qu’èra regitada da la Comunitat Internacionala. Un autre responsable dau MNLA, Hama Ag Mahmod, a dich à Reuters, en la capitala mauritaniana Noakchòt : « l’independença es lo noatre objectiu despí lo principi dau conflict, mas pilham en compte lo ponch de vist de la Comunitat Internacionala per venir à bot de la crisi en cors ». D’organisacions islamisti, come Ansar Dine, an impauat la Charia (lèi islàmica) en Azaoad e destruch lu mausoleus de cèrtu sants, bastiments classats au patrimòni mondial de l’Unesco, à Tomboctó. A foarça d’aver preferat mesprear lu separatistas laïcs toaregs en plaça de lu sostenir contra lu grops armats islamistas, au nom de l’integritat territoriala d’un estat malian inventat de tota pèça, la Comunitat Internacionala a favorisat lo desvolopament dau terrorisme islamista dins la region de Sael…

ESPOART

L’OGC Nissa a jugat lo sieu promier mach amical despí la represa, contra Bordeu. Après un boan principi de rescòntre, lu Girondins duèrbon la marca da David Bellion à la 10-a minuta. Lu aiglons reagísson e pílhon mai d’iniciativas, que concretíson en egalisant à la fin dau promier periòdo, per un goal d’Abriel à la 45-a minuta. En segonda part, lu Gascons an augut d’ocasions mai franqui, mas fins finala la partida s’es acabada sus d’un escòre de paritat à 1 dapertot.

En lo fra-temps, l’intersason si persegue. Lo Gim a vist la partença d’una granda part de jugaires cadres de l’efectiu, notantament Mounier, partit à Montpelhèr, Choa Clerc que s’en es anat à Sant-Estève, e Mouloungui à Al Wahda, ai Emirats Arabos Units. D’autres coma Sablé e Hellebuyck son partits liures de tot contrat. Enfin, lo gardian David Ospina es pròchi d’èstre transferat en Turquia, au Besiktas Istanbol. Costat arrivadas, Nissa a reclutat lo gardian de l’equipa de França espèr Jorís Delle, lo jugaire de mitan de terrenh Erico Bauthéac de Dijon, lo lateral senèca Timotea Kolodzieczak de Lion e fins finala lo defensor central Romièg Genevois que vèn de Tors

METÈO

Farà pròpi beu temps per tota la setmana emé de temperaturas que varieran entra 29 e 31 grados en jornada, 15 à 17 la nuèch. Lo vent boferà à 14 qm/ora en general.

Comment on this post

Blog archives

We are social!

Recent posts