Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°17 - 2 de julhet dau 2012

Posted by Pantainfo : infos de l'emission d'actualitats setmanieras sus ràdio nissapantai.com on July 2 2012, 01:41am

PantaInfo n°17 - 2 de julhet dau 2012

PantaInfo, l'informacion setmaniera dau País Nissart e Alpenc

Lo 2 de julhet dau 2012

PAíS NISSART E ALPENC

1/ Actualitat política :

‘Sto dimècres lo 4 de julhet à 7 oras e mièja, si festejerà lo 205-to natalici de Jousèp Garibaldi, eròi d'Euròpa e d'Amèrica naissut à Nissa en lo 1807. A-n-aquesta escadença, lo Govèrn Provisòri de la República Federala Occitana si radunerà per rendre omenatge à Pepin, pròpi davant la sieu estàtua, en plaça Garibaldi de Nissa. Siatz toi lu benvenguts.

2/ Actualitat economica e sociala :

La lucha contra l’Operacion d’Interés Nacional sus la Plana de Var contunha e si desvolopa sus lo terrenh. Despí mai d’una setmana, lo Collectiu OIN-Plana de Var ensin que d’organisacions de defensa de l’environament, an lançat l’operacion Terra Segurana qu’es una iniciativa foarça originala e eficaça : coltivar lu terrenhs fertils que dèvon desaparéisser. Ensin, d’agricultors beninhós vènon regulierament cultivar à gratís li tèrras dei familhas menaçadi d’expropriacion en causa dei projècts faraonics de l’Escròvalada, iniciats da la municipalitat estrosista. Agricultritz volontària venguda de Colomars, Laetitia explica qu’a fach un marrit pantai : èra expropriada dei camps que la sieu familha travalha despí sièis generacions. E contunha : « ai ressentit aquò en la mieu carn ; lo matin, ai regarjat lu mieus cavaus, lu mieus oliviers… ai pensat : avèm pas lo drech de laissar faire aquò ! ». Ensin, emé la coordinatritz dau Collectiu, Nadège Bonfils, lu militants fan lo giro dei familhas menaçadi e li prepàuon de cultivar li sieu tèrras à gratís, en plantant tota mena de liumes e en metent après tot aquò en vèndita liura. Un trentenau d’agricultors an respondut à l’apèl dau Collectiu e s’es jà establit un plan de rotlament. Tra lu volontaris si tròvon finda de citadins, coma Joan-Felipe Gispalo, universitari à Beusoleu, que parla de lucha de David contra Goliat, denant de mandar en conclusion ai elegits : volèm cagar de blea, manco de beton !

3/ Actualitat curturala :

Divèndres lo 6 de julhet que vèn, en l’encastre dei Seradas Estivali dau Conseu General 06, lo grop de música tradicionala « Lu Rauba Capeu » organiserà un concert emé de baleti, au Figaret d’Utela, a li 8 oras de sera.

Dissabta lo 7 de julhet que vèn si tendra à Coarasa lo 24-o Campionat dau Monde de pilo. L’inscripcion sus plaça comencerà ai 10 oras de matin. La manifestacion serà dubèrta à toi.

Lo meme jorn, à Vilars-de-Var, la chorma dau « Teatre Francís Gag » donerà una rapresentacion de la sieu pèça « Gusta s’embila », à 9 oras de sera.

OCCITÀNIA

1/ Actualitat política :

Occitània a, despí pauc de temps, un nòu grop d’accion e d'agitacion en favor de la lenga e de la curtura occitani. S'agisse d’Endavant, qu’a per tècola la proteccion legala de la lenga occitana per que sigue declarada oficiala en Occitània tota, e que s’en estimule la sieu reconoissença e lo sieu usatge social. En lo plan d’accion decidit à la darrièra recampada, Endavant si prepaua d’èstre un moviment d’agitacion e d'accion dirècta per la lenga e la curtura dau país, e balhar un caractèr populari à la revendicacion occitanista. Lo grop ve foarça clar lu sieus limits e vòu pas far lo prètzfach curtural que fan li autri associacions, que li apèla « complementari ». Entra li accions previsti dins lu mes que vènon li son divèrsi presentacions públiqui e la campanha « Tolosa en occitan », que si lancerà tra lo mes de septembre e qu'aurà per tècola que lu transpoarts públicos de la ciutat mondina augue una política linguística coerenta. Coma es previsible dins una organisacion naissuda pauc de temps fa, una dei prioritats dau grop serà l'integracion de nòus sòcis e la sieu expansion territoriala. En aqueu sens, Endavant farà un esfoarç per si sarrar dei locutors noveus de l’occitan. A costat, aqueu grop d’accion pretende augmentar li intradas a tèrme cort per poder aquistar de material per li sieu accions revendicativi. Per aquò far, produrrà de materials divèrs, coma per exemple de camisetas da vendre tra lu simpatisants de l’organisacion.

2/ Actualitat economica e sociala :

Ret Ferrada de França ven de donar la sieu decision e lo sieu fuèc vèrd per perseguir lu sieus estudis per lo projèct de TGV París-Orleans-Clarmont-Lion. La region Auvèrnhe aurà doncas ben lo sieu TGV devèrs dau 2025, sobretot per necessitat de doblar la linha París-Lion, qu’es ja saturada. Sus lo sieu Interret, RFF afirma qu'avia « presentat au debat público, que s’es debanat dau 3 d’octòbre dau 2011 au 31 de genoier dau 2012, quatre scenaris. En lo sieu rendut-compte, la comission dau debat público a revelat doi ponchs que faíon esquasi consensús : l'importança de la presa en consideracion dei enjuècs environamentals e financiers, lo refut dau scenari Est, la causida d'un passatge per Roana puslèu que per Mâcon, la necessària modernisacion dei linhas clàssiqui integradi au projèct. Dei quatre scenaris prepauats minga s'es presentat coma la respoasta evidenta e partejada à l'ensems dei enjuècs. Qu’es per aquò que RFF a decidit de botar davant lu estudis dau projèct e d’entamenar l’annada venenta d’estudis mai precís emb’una concertacion de l’ensems dei actors e dau público. Aqueus estudis e aquela concertacion viseran à definir, en ligament emé toi lu actors, un scenari melhorat sus la basa dei scenaris Oèst e Mejan, dins la sieu varianta de Roana, e recercar li adaptacions possibli, mai que mai:

INTERNACIONAL

1/ França

Es una promiera ! Un regionalista ven de faire la sieu intrada à l’Assemblada Nacionala francesa à la favor dei darrieri eleccions. Paul Molac, militant pròchi de l’Union Democràtica Bretona, es vengut deputat de la quarta circonscripcion dau Morbïan, graça a-n-una aligança emé lu socialistas, lu vèrds e lo moviment breton. Aquesto elegit rapresenterà la federacion « Region e Pòbles Solidaris », coordinacion de numerós partits e moviments de França tota. Tra li sieu prioritats, l’elegit breton mete en davant lo projèct de lèi per li lengas regionali e la política de decentralisacion que la senèca a promés de mandar tornamai. Cen que l’interessa notantament es lo drech d’experimentacion dei collectivitats locali.

2/ Euròpa

Catalonha : la majoritat dei catalans son per l’independença. Per lo promier còup, lo sondatge dau Centre d’Estudis d’Opinion moastra que mai de 51% de toi lu ciutadans de la Comunitat Autonòma de Catalonha voteríon per l’independença se deman li aguesse un referendum ; 21% voteríon contra e 21,1% s’abstendríon. Se pilham en compte lu vòts « aí » o « non », 70,8% voteríon « aí » per l’independença dau temps que lu unionistas prò-espanhòus seríon mens de 30%. En un an, lu partidaris de l’independença an puat esquasi de 10%. En mai d’aquò, se Catalonha foguesse un estat independent, 55,5% pènson que lo niveu de vida dei catalans seria milhor ; 16,7% que cambieria minga, e 12,8% que seria pèjor. A prepau de l’identitat dei catalans, 52,9% si declàron « solament catalans » o « mai catalans qu’espanhòus », dau temps qu’aquelu que si sènton « tant catalans coma espanhòs » son 37,3% (5% de mens que tres mes fa). Lo monde que si sènton « solament espanhòus » o « mai espanhòus que catalans » mónton finda un pauc, aüra son 7,5% alora qu’en març èron 5,8%. Lu independentistas son majoritaris tra lu votants de la màger part dei partits dau Parlament de Catalonha. Lo mai significatiu es que 29,1% de votants dau Partit Socialista voteríon finda per l’independença. En mai d’aquò, voteríon per la secession 15,3% dei votants dau partit espanholista Ciutadans, ensin que 8,8% dei votants dau Partit Popular.

3/ Monde

En Azaoad, après aver luchat per la sieu independença contra l’opression centralista maliana, lo pòble toareg lucha aüra per la sieu dignitat, contra lo terrorisme islamista, sensa lo sosten dei democracias occidentali que prefèron aparentament lo « salafisme » e Al Qaida au separatisme toareg, meme s’es democràtico e laïco. Lu toaregs dau MNLA son encuèi confrontats à-n-una novela guèrra. Aquesto còup, dèvon menar una guèrra sensa pietat à de manadas de terroristas islamistas, venguts d’Africa dau Nòrd e dau Saara, per aneantir per lo crimi e la terror lu espers de libertat, de democracia e de laïcitat dei pòbles d’Azaoad. A-n-aquesta escadença, serà organisat lo dissabta 6 de julhet que vèn ai 3 oras d'après-dinnar, un recampament de solidaritat emé lo pòble toareg e lo MNLA, à París en plaça dau Trocadero. S’organiserà finda un apèl de numeroï associacions e personalitats polítiqui e artístiqui en favor dau sosten à la lucha dei Toaregs contra lo cancre islamista e l’ensems dei sieus potents aligats. Après li manifestacions dei fremas toaregui en Azaoad contra la Charià e à l’integrisme islamista, après la moart de numerós civils tuats dai islamistas en la vila de Gao, après l’eliminacion dau terrorista Mokhtar Belmokhtar tuat dai Toaregs dau MNLA, après lo silenci coupable de la Comunitat Internacionala faça à la man tenguda dau MNLA per l’eradicacion dau terrorisme islamista internacional… lo moment es vengut per lu partisans de la libertat de non comptar que sus li sieu pròpri foarças : aqueli dei Toaregs, dei Amazigs e dei pòbles liures que sostènon aquesto combat just e legitime.

ESPOART

La Copa d’Euròpa de Fotbal Euro 2012 s’es acabada diménegue passat da la victòria de l’Espanha contra Itàlia per 4 à 0. La derota es tarribla per la Squadra Azzurra qu’èra arrivada en finala maugrat un principi de competicion foarça dificile per de rasons extra-esportiui. La Roja a reüssit un triplat excepcional Eurò-Copa dau Monde-Eurò, e plus degun sembla la poder arrestar.

METÈO

Après un mes de junh particulierament ensolelhat e foarça caud, vaicí revenguda la pluèia… Un temps pluviós e chavanós es previst fins à dimècres. Mas à partir de dijòus lo solèu s’en tornerà. Li temperaturas resteran establi entra 25 e 28 grados de jorn e fins à 20 grados de nuèch.

Comment on this post

Blog archives

We are social!

Recent posts