Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°19 - 20 d'avost dau 2012

Posted by Pantainfo : infos de l'emission d'actualitats setmanieras sus ràdio nissapantai.com on August 20 2012, 00:56am

PantaInfo n°19 - 20 d'avost dau 2012

PantaInfo, l'informacion setmaniera dau País Nissart e Alpenc

Lo 20 d'aost dau 2012

PAíS NISSART E ALPENC

1/ Actualitat especiala Operacion Terra Segurana en la Plana de Var de Nissa

Nissa perde mai li sieu terras agricòli. Nissa a ja perdut totplen de terras agricòli per bastir lo novel estadi. Sto còup es per bastir una nòva via que menerà à l’estadi. Li victimas son de familhas nissardi menaçadi d’expropriacion.

Cen que podèm faire ? Còntra aquesto projèct, d’òmes e de fremas si son mobilisats sota lo nom : operacion « Terra Segurana. » L’operacion arrecampa de mai en mai de monde. Cada dissabta e diménegue à partir de 10 oras de matin, au 303 de l’avenguda Santa Margarida, si retròvon de benevòlos per travalhar la terra, partejar lo past e discutre sus dei accions da faire. Per mai d’informacions, podètz contactar Nadège Bonfils au 06.15.90.72.09.

Fa de temps que la Plana de Var a de problemas, Maurís lo cantava ja ? Es ver que fa despí dei annadas 70 que si mena la lucha de « Dàvid lo Nissart » còntra « Goliat lo promotor » per empedir lo betonatge dei darrieri terras agricòli de Nissa. Lu collectius engatjats convídon toi lu estatjants de la Comtea à si radunar sota l’eslogan : « volètz manjar ? cagatz de blea, mens de beton ! »

Mas alora, per aquelu que son pas au corrent, l’OIN, cen qu’es aquò ? Per rapèl istòrico, l’Operacion d’Interés Nacional de la Plana de Var, que poarta coma nom « Eco-Valada », es un projèct que prevé l’amainatjament de la Plana de Var sus 30 ans. La necessitat d’amainatjament d’aquesto territòri es una realitat, mas cau que sigue ecologica e non solament economica. E l’Eco-Valada es manco ecologica vist que prevé la construccion sus de surfaças agricòli dau Gran Estadi, d’un via e finda de lotjaments.

Coma si debana l’operacion ? Lo mes passat, la comuna auria fach levar una bandeiròla mas lu joves de la BSN n’an fabricat d’autri. Pura li menaças e pressions màncon pas.

2/ Actualitat curturala : Rintrada de setembre per lo nissart/alpenc/provençau (òc) en l’Acadèmia de Nissa (06 e 83)

Un article dau Jornalet nen anonça que l’ensenhament de l’occitan seria à si desvolopar à l’Acadèmia de Nissa ?

Alora, cen qu’es la situacion actuala de l’ensenhament dau nissart à l’Educacion Nacionala, tant au primari qu’au segondari ?

Cen que son li solucions possibli per reglar lo problema ?

A l’avenir, ti penses que la situacion es per si melhorar ?

Aparentament, la situacion non es la mema per li autri lengas regionali ?

L’estat francés sembla penalisar pròpi l’occitan. Pura à Nissa díon que la demanda per emparar lo nissart va creissant ?

[Li respoastas non son escrichi, li cau escotar. Li demandas son de Ciril Joanin e li respoastas de Cristòu Daurore, en la sieu qualitat de professor de nissart (òc) au licèu Sasserno de Nissa.]

OCCITÀNIA

Actualitat política :

L’organisacion occitanista País Noastre organisa un viatge emé de militants e de simpatisants a la Manifestacion independentista catalana dau 11 de setembre a Barcelona. Segond País Noastre, « aüra, es l’ora de la mobilisacion per un estat catalan en Euròpa » après l’insuccès de la reforma estatutària de Catalonha. Aquesto procès culminèt emé una importanta reduccion de l’autogovèrn facha per lo Tribunal Constitucional espanhòu, cen que provoquèt una respoasta per carrieras en julhet dau 2010, emé una manifestacion colossala à Barcelona de mai d’un milion de personas. L’accion solidària de País Noastre respoande à la volontat de l’Assemblada Nacionala Catalana de far que l’accion d’aquest’an vengue una « mobilisacion istorica » per accelerar lo procès independentista catalan. Dins aquesto sens, l’ANC considèra que s’acapita una manifestacion de tres milions de personas, la secession serà immediata e inevitabla. Cau pilhar en còmpte que la comunitat autonòma de Catalonha e Aran a sèt milions d’estatjants. Dau sieu costat, lo president de la Generalitat de Catalonha, Artur Mas, a demandat ièr que lo pòble catalan manifeste la sieu revendicacion per lo pacti fiscal que lo sieu govèrn reclama à Madrid, e obtenir ensin que lo govèrn espanhòu mete fin à l’estofament economic de Catalonha. En foncion de la respoasta de Madrid, Mas porria convocar d’eleccions anticipadi e si presentar emé un programa sobeiranista.

INTERNACIONAL

Còrsega :

Un desenau d’elejuts còrsos dei partits tradicionals participèron diménegue lo 5 d’aost, per lo promier còup, ai Jornadas Internacionali de Còrti. Li foguèt un debat emé lu independentistas sus dau futur institucional de l’ísola. Lo partit independentista Corsica Libera, qu’a 4 elejuts (sus 51) dins l’Assemblada de Còrsega, organisa cada an aqueli jornadas à Corti, qu’es la capitala istòrica de Còrsega. Davant un milier de personas acampadi, quaucu membres de l’executiu de la Collectivitat Territoriala de Còrsega (CTC), de que la majoritat son de seneca, levat un deputat de l’UMP, Laurent Marcangeli, debatèron sobretot de la cooficialitat de la lenga còrsa, de la question financiària fàcia a l’especulacion e de la reforma dei institucions. « Cen qu’arriba encuèi es essencial. Siam pron madurs per portar a París la noastra volontat de reforma », aquò diguèt Marcangeli a l’AFP en tot plaidejar per un « dialògo franc e sensa tabó ». Lo deputat drechista apondèt que s’èra « trobat un consensús dins l’Assemblada de Còrsega », emé lu autres deputats de l’ísola, per defendre a París li reformas constitucionali que fan besonh. En rapresentant lo corrent nacionalista moderat, l’elejut territorial Miqueu Castellani, de Femu a Corsica, diguèt que la convergença emé lu independentistas èra « una escadença da pilhar ». Li Jornadas Internacionali son un eveniment que si debana un còup per an en la vila de Còrti despí dau 1987. La sieu tècola es la revendicacion de la lenga còrsa e dau nacionalisme còrso, e es vengut un eveniment transnacional que li particípon non solament d’organizacions còrsi, mas finda de moviments independentistas d’en pertot: bretons, catalans, bascos, galés, irlandés, occitans, sardos, sicilians, tirolés, alsacians e canacs.

L’IFOP a publicat un compendi de quatre dei sieus estudis fachs en Còrsega entra lu 1975 e 2012, après quatre eveniments clau: lu fachs d’Alèria de 1975, l’assassinat dau prefèct Glaudo Erignac en lo 1998, l’incendi dau restaurant Chez Francis en lo 1999 e li votacions legislativi de junh passat. Lo promier estudi fach en lo 1975, permete d’acapir li causas de la frustracion còrsa per rapoart ai immigrants francés e particularament ai pens negres. Dins aqueu sens, 63% considèron que l’enraissament dei pens negres capitèt gràcia au fach que comptèron emé lo sosten institucional e economic que la populacion còrsa non recebia. Aquò explica un estat d’esperit còrso basat sus l’ofensa dau parangon ; cen qu’ajudèt, en partida, a l’espelida dau nacionalisme militant còrso, d’en promier per mejan de l’Accion Regionalista Còrsa (ARC) e après emé lo FNLC. Quant a l’independentisme, li donadas afírmon que l’independentisme s’es multiplicat per sièis en mens de quaranta ans, passant de solament 2% en lo 1975 à 12% ai darrieri estimacions. Li accions polémiqui de l’ancian prefèct Bernard Bonnet, qu’empleguèt de metòdos illegals còntra lo nacionalisme còrso, an fach considerablament créisser lo sentiment independentista, cen que menèt en partida l’Estat francés a negociar lu Acòrdis de Matignon.

ESPOART

Dissabta lo 11 d’aost passat, l’OGC Nissa a jugat lo sieu tot promier rescòntre dau campionat de fotbòl de L1 de la sason 2012-2013. Coma s’es debanat lo rescòntre ? La novela sason comença mau per lo Gim qu’a perdut a maion 1 à 0 contra una pichina equipa d’Aiachu qu’a meme finit la partida à 10 contra 11 après l’expulsion au principi dau segond periòdo dau jugaire còrsu Mostefa. L’AC Aiachu a dubert la marca gràcia à un goal d’Eduardo à la 11a minuta. Davant de Còrsos solidaris, lu aiglons an totalament mancat de realisme, en testimonia lo penalti mancat da Monzon. Lo match s’es doncas naturalament acabat emé una victòria d’Aiachu, per lo mai grand bonur dei suportaires còrsos qu’an pas esitat a siblar Nissa la Bèla denant lo començament dau rescòntre.

Alora se capissèm ben, l’OGC Nissa es encara partida per una sason dificila, coma l’an passat ? Equipa pas au complet : noveu atacant non encara titularisat, mancàvon de jugaires cadres coma Anin qu’es ferit, e Civelli, suspendut per 2 matchs. Finda, es solament lo tot promier rescòntre dau campionat, doncas aurèm lo temps de drissar un promier bilanç au bot de 10 matchs. Esperèm que l’equipa repartirà dau boan pen.

A costat d’aquò, l’actualitat dau Gim es marcada da un autre eveniment extrasportiu ? Segur, estel estiu, despí julhet una decision política fa foarça polémica : lo futur Gran Estadi de Nissa si sonerà Allianz Riviera Stadium. La societat d’assegurança alemana s’es crompada lo nom per una subvencion que s’aussa à 1,8 milions d’euros per an.

Cen que son li rasons d’una tala polémica ? Toi lu suportaires dau Gim e la màger part de la populacion de Nissa son pròpi escandalisats per aquela decision que representa per totplen una insulta à la memòria de toi aquelu qu’an sofert de l’ocupacion nazí mentre la Segonda Guèrra Mondiala. La societat Allianz, que s’es ja facha remarcar per lo sieu passat nazí, assegurava à l’epòca entra autre lo personal dau camp d’exterminacion d’Auschwitz, ensin que lu bastiments, lu forns crematòris, lu laboratòris e patin e cofin. En plaça d’atribuïr à la novèla encenta lo gloriós nom de « Garibaldi », la municipalitat a preferit vendre la sieu ànima à un coglomerat de l’argent brut. Aquesta decision parèisse inadmissibla quora si saup que meme ai Estats-Units, paradís per excelence de la mondialisacion e de la finança, la morala a escompassat l’argent quora la pressa new-yorkesa acapitat en lo 2008 d’empachar Allianz de donar lo sieu nom à l’estadi de Meadowlands, en revelant lo passat nazí de l’entrapresa.

Que seríon segond tu li motivacions de la municipalitat de donar un tau nom au futur estadi ? Non si capisse li rasons qu’an abutat la municipalitat estrosista à acceptar un tau desonor, mas pareisse clar que li motivacions son li memi qu’aqueli dei promotors de l’OIN Plana de Var : la recerca dau profiech absolut à l’encòntre de l’ecologia e de la morala e de la societat civila.

METÈO

Lo temps serà ensolelhat per tota la setmana em’ una temperatura mejana de 30 grados lo jorn, e 20 la nuèch.

Comment on this post

Blog archives

We are social!

Recent posts