Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°29 - 4 de febrier dau 2013

Posted by Pantainfo, l'emission d'actualitat setmaniera de Ràdio Nissa Pantai : http://nissapantai.com on February 4 2013, 02:36am

PantaInfo n°29 - 4 de febrier dau 2013

PantaInfo, l’informacion setmaniera dau País Nissart e Alpenc

4 de febrier dau 2013

PAÍS NISSART E ALPENC

1/ Actualitat política, economica e sociala

Lo Nissa Matin dau diménegue 3 de febrier publiquèt una pàgina especiala foarça interessanta sus dei grans projèctes costós e inutiles en la Contea. De barris que s’escàlhon, de bauç que si desfóndon, de bastiments inutils, de projèctes faraonics que si realíson qu’après d’annadas de dificultats e de proceduras… Mas finda de vilas endeutadi per pagar de servicis que son pas renduts (lo tractament dei rementas), per bastir un cemetèri sosterran que serà jamai mes en servici... Sota l’administracion francesa, la Contea sembla de mai en mai au reiaume d’Ubu. En un trentenau d’annadas, lo País Nissart es estat lo teatre de numeroï pastissadas ò visions faraoniqui que si son escrasadi sus li rocàs de la realitat. Da lièger.

En mai dei cadenas TV clàssiqui francesi, TV9 Mercantour, la cadena de television locala dei comunas d’en Tiniá Auta e dei estacions dau Parc dau Mercantor, ven de lançar la dubertura dau sieu site oèb de TV9 Mercantour. Voàlon desvolopar la sieu activitat e sus lo sieu site, en mai de tornar vèire li vidèos e fòtos dei activitats dei estacions alpenqui coma li activitats de neu de Sant Dalmas lo Selvatge, descurbir la vida socio-culturala dei vilatges d’en Tiniá Auta, far de visitas de vilatges, aver d’ideas d’escorregudas en toti sasons, emparar de recèptas de coïna coma tornar consultar lo magazine setmanier de TV9 Mercantour : « Le quoi de 9 ». Per lo moment, minga emission en occitan ò cronica en occitan es prevista. Es beleu lo moment de li prepauar. Cau sinhalar que l’occitan es encara parlat au quotidian per una boana part de la populacion permanenta d’en Tiniá Auta, tant dins li vilas coma dins lu vilatges. En complement dei ràdios francesi francofòni, l’ofèrta mediàtica regionala es establa en Gavotina dei Aups Marini e dei Aups de Provença Auta. Ràdio Oxygène (implantada dins li grani estacions dei Aups dau Sud dau Mercantour au Vau d’Isèra) que faguèt un temps una emission en occitan « Sèm encara aicí » es captabla sus la banda hertziana de La Còla Miana (La Colmiane, Val de Blora), a Auron (Val de Tiniá) en passar per Valberg (valada dai Chans e de Var) e tamben dins lu despartiments dei Aups de Provença Auta, li Aups Auti, l’Oesen e lo Vercòrs. Aquela ràdio es de lòng en recèrca de collaborators per animar de crònicas. Ràdio Grimaldi FM contunha li sieu activitats radiofoniqui de proximitat entra Vilars de Var, Daluís, Poget Teniers (valada de Var) e Anòt, Mialhas (valada de la Vaira). Ràdio Fréquence K (K coma Carròs) emete despí Carròs (bassa valada de Var) sus la riba de mar fins au país mentonasc e fins au començament dei valadas d’Esteron, Vesubiá e Tiniá. De notar la sieu emission bilingüa francés-occitan Raggapero. Au niveu dei mèdias papier, en mai dei grans quotidians francés e dei quotidians regionals francofònes partejats da Nice Matin (edicion valadas) e La Provence, demoàron lo jornal mesadier bilingüe dau País mentonasc e entorns Ou Païs Mentounasc, lo jornal mesadier d’en Vesubiá e d’en Val de Blora Lou Vesubian que parla dei actualitats en valada d’en Vesubiá e valadas à l’entorn emb ocasionalament una rubrica en occitan gavoat (ò mesclat de nissart) per d’autors d’aquela valada. Lo magazine generalista à gratis que cuèrbe una boana part de Gavotina Alman’Alpes pareissent cada doi mes confirma lo sieu desvelopament embé de ligams e de nòvas originali. Lo jornal mesadier bilingüe nissart Lou Sourgentin a una rubrica en occitan gavoat Païs Gavouòt e ocasionalament d’articles tràcton de Gavotina dau Comtat de Nissa. Enfin, lo jornal Le Haut Pays de Ròia-Bèura (Bévéra) au reventge sembla d’aver cessat li sieu activitats. La soleta alternativa per aver de mèdias globals en occitan rèsta totjorn l’Interret ambé Ràdio Nissa Pantai coma ràdio regionala occitana embé d’emissions en nissart e gavoat, e autrament lu mèdias occitans que cuèrbon d’autri regions en Occitània tota : Dètz TV per la vidèo e Jornalet coma La Setmana per l’escrich.

2/ Actualitat curturala

Lo dissabta 2 de febrier passat si debanèt à Nissa en Plaça Garibaldi la tradicionala procession e messa de la Candelor dai penitents blus de Nissa.

Lo divèndre 8 de febrier que ven à 8 oras e mièja de sera li aurà au cafè-teatre « Lo Teocali » lo noveu espectacle en duo de e da Xavier Borriglione e Sèrgi Dotti « Babasoc Rossinhòu ». Un grand moment da pas mancar. Lo cafè-teatre « Lo Teocali » si tròva au 16 carriera Benest Bunico. Per reservar, podètz sonar au 04 93 62 91 18.

Lo dissabta 9 de febrier, en la sala dei fèstas de Rocabilhèra, l’associacion « Gents d’Aquí » presenterà lu sieus baletis d’ivèrn emé la participacion dau grope de música Lu Rauba Capeu, à 8 oras e mièja de sera. Lu tarifs per lo past e lu baletis es de 13 euros, e doi euros per lu solets baletis. Si pòu reservar à l’Ofiça dau Torisme de Rocabilhera en sonant au 04 93 03 51 60.

Lo diménegue 10 de febrier, à l’escadença dau 24en Carneval Independent de Nissa que si debanerà en Casteu à partir de miègjorn, lo Centre Cultural Occitan – País Nissart e Alpenc presenterà lu sieus doi noveus carres de carneval. Lo Carneval Independent es completament liure : cadun si pòu vestir coma lo vòu, faire lo sieu pròpri carre, aportar la sieu pròpria música. Li serà tota mena de carnevaliers independents, de que li tribús regropant de personas qu’an chausit un tema de mascarada. Lu carres son bastits à la basta que sigue e lo carneval serà acompanhat obligatoriament de música. Autre element clau dau Carneval de Nissa : la farina. Es pas de contestar que n’en constitua l’actritz principala.

OCCITÀNIA

1/ Actualitat política

Despí lo dijòus 31 de genoier passat, lo Ministèri de l’Educacion Nacionala a difusit un projècte de lèi d’orientacion e programacion per l’escòla, que lo Conseu dei Ministres es à discutre denant de lo sotametre au Parlament. Segond la FELCO (Federacion dei Ensenhaires de Lenga e Cultura d’Òc), s’agisse d’un tèxto ambiciós, e li lengas mau nomenadi regionali li dèvon aver la sieu plaça. Per aquò, la FELCO a sollicitat li grani associacions que trabàlhon per la promocion dei lengas de l’Estat francés, dins l’ensenhament público, per fin de prepauar au Ministèri e ai parlamentaris, de melhoraments au tèxto. Tra aqueli propoastas de melhoraments, soslínhon l’importança d’aqueli lengas coma de factors de capitada escolària, d’integracion e de dubertura à la diversitat culturala. Demàndon una vertadiera política de desvolopament de l’ensenhament d’aqueli lengas à toi lu niveus, e especialament en l’encastre dei filieras bilingüi de l’ensenhament público. Li 18 associacions son doncas foarça atentivi à la seguida que s’en donerà à la cima de l’Estat e dins lu debats que vènon.

2/ Actualitat curturala

L'Institut d'Estudis Occitans cèrca d'endrechs dont menar à tèrme la segonda convocacion dau « Volontariat per l'occitan ». Lo projècte a una durada de 10 setmanas e lo « pareu lingüístico » si raduna una ora per setmana dins un endrech convengut. L’idea de l’IEO es qu’aquela segonda convocacion dau programa « Volontariat per l’occitan » comence lo mes de març dau 2013 e que si finalise lo mes de mai. Per facilitar li cauas, l’IEO cerquerà leu de volontaris que domínon la lenga, mas es ja à cercar d’endrechs dont si poasque menar à tèrme lo projècte. Alora, se conoissètz quauque bar, estanquet ò restaurant – ò quauque autre luèc que sigue – agradiu, dont desvolopar l’activitat, siatz pregats de vi metre en contacte emb'ai promotors per e-mail à : volontariat@ieo-oc.org. Lo programa es entierament à gratis e sensa minga cost per degun. Mas es evident que tot espaci dubèrt au public qu’acuèlha lo projècte aurà de consequenças profiechoï, perqué serà comprés dins la tiera dei locals emé boana disposicion devèrs la cultura occitana e genererà aisadament una assistença de personas. Aqueu programa, que si menèt à tèrme ja en una promiera convocacion experimentala per l’IEO, rescontrèt un grand succès en la Val d’Aran e finda en Catalonha, dont de miliers de « pareus lingüísticos » permèton l’accès au catalan à foarça immigrants nòu venguts dins lo país catalan.

INTERNACIONAL

1/ França

Escandal en Bretanha ! Dimècres passat, lo grope Ouest-France, distributor de la revista grand public Bretons, a fach retornar toi lu exemplaris que li avia dins li botigas de jornals e lu supermercats. La revista Bretons comandèt un sondatge a l’institut IFOP. Segond aqueu sondatge, publicat dins lo numèro de febrier, 18% dei bretons son favorables à l’independença dau sieu país, cen qu’èra publicat coma grand títol dins la promiera pàgina. La revista tornerà paréisser divendres mé la promiera pàgina cambiada. Lo grand títol serà cambiat per « 69% dei bretons desconóisson la sieu istòria ». Segond de foants seguri, quaucu jornalistas bretons an sauput qu’es lo cap d’Ouest-France, François-Régis Hutin, qu’a demandat expressadament lo retorn dei revistas. Aquel afaire a provocat tamben un gròs escandal tra lu jornalistas d’Ouest-France. La revista Bretons si pòu trobar normalament dins toti li botigas de jornals e dins lu supermercats de Bretanha, e li aficas de publicitat si poàdon vèire dapertot.

2/ Euròpa

L’associacion Euskal Moneta convoquèt lo dissabta 26 de genoier passat l’Assemblada Generala de lançament de l’eusko, la nòva moneda locala dau Bascoat. L’assemblada si debanèt au centre Lapurdi d’Ustarits (en Bascoat) e auguèt un caractèr público e toi èron convidats. La chorma que mena aquela iniciativa es formada da Adrien Kempf (co-president), Dante Edme-Sanjurjo (co-president), Txetx Etcheverry (lo clavaire), Mendi Esteban (lo co-clavaire), Benoît Egloff (lo secretari), Barthélémy Camedescasse e Xabi Camino. Sus lo sieu site oèb, explícon lu objectius dau projècte : dispauar d’una aisina que favorisa una economia mai respectuoa mé li personas e l’environament, favorisar lu escambis locals, desvolopar la solidaritat, impulsar l’usatge de la lenga basca e sostenir lu projèctes locals d’interés comunitaris, entra autres. Au delà, declàron que l’usatge d’una moneda basca contribuerà à afortir l’identitat basca e l’enraiçament au territòri. Lu nòus bilhets d’euskos si presentèron en conferença de pressa dimarç passat, lo 15 de genoier, ai Cornièras de Baiona. Lu bilhets son conçauputs a partir de fotografias de Bob Edme e de dessenhs de Ramuntxo Partarrieu. Moàstron sus un costat de luècs emblematics e sus l’autre d’activitats economiqui e culturali dau Bascoat Nòrd. Li son cinc classas de bilhets : de 1, 2, 5, 10 e 20 euskos, que si poàdon escambiar per d’euros m'una valor d’1 euro per 1 eusko. Lu bilhets son protegits contra li falsificacions embé cinc sistemas de seguretat despariers (qu’un d’elu es secret), e semblables a-n-aquelu que protèjon lu bilhets d’euros. Euskal Moneta pilha toti li decisions relativi à la moneda nòva e à l’abilitacion dei estructuras e ressorsas umani necessari per menar endavant l’iniciativa. L’associacion espèra que l’usatge de l’eusko s’implanterà progressivament e que li entrepresas e lu particuliers seran de mai en mai interessats per l’emplegar dins lo circuit dau comèrci local.

3/ Monde

Lo govèrn de Malí a anonçat que negocierà m’ai toarègs s'aquelu quíton li revendicacions independentisti. Lu toarègs luchèron per l’independença d’Azaoad e capitèron. Quaucu mes pi, lu islamistas pilhèron lo poder dins li vilas mai importanti dau país, mentre que la Comunitat Iinternacionala reconoissèt pas lo nòu estat independent. Lu toarègs si trobèron mé lo refut internacional e à l’encòup emb’ai islamistas, qu’elu finda an totjorn refudats. França a demandat pura lo dialògo embé la populacion d’Azaoad (que díon nòrd dau país) après aver ocupat sensa resistença li tres grani vilas : Gao, Tomboctó e Kidal. Sus lo terrenh, s’aspèra que si complete l’expedicion dei tropas africani que dèvon ajudar à contrarotlar li vilas conquistadi. Lo cap militari de la mission, lo general nigerian Shehu Abdulcadir, a demandat que si mete en foncionament un poant aerian per accelerar l’arribada, que si completerà dins doás setmanas. L’Assemblada Nacionala de Malí a decidit que, quora lu combats seran acabats, lo país deurà recuperar la sieu integritat territoriala denant d’organisar d’eleccions. Pura, lo Parlament dau país african a limitat li negociacions fins à l’extrème de non voler parlar de questions coma la laïcitat dau país o l’unitat dau territòri. Lo Parlament malian a pas concretisat una data per li eleccions, mas lo president dau país, Dionconda Traoré, a afirmat qu’aspèra que lu comicis si debànon denant lo 31 de julhet. Mentretant, l’UNESCO a anonçat qu’ajuderà Malí à tornar bastir e à protegir lo sieu patrimòni cultural, afectat dai combats entra li tropas internacionali e lu gropes islamistas. La directritz generala de l’UNESCO, Irina Bocòva, a dich : « Aqueu patrimòni es una part integrala de l’identitat e la dignitat dau pòble, perqué representa lo passat gloriós de la region coma lo centre d’aprendissatge islamic mai gran e, doncas, es lo noastre dever de lo restaurar e lo protegir ». Bocòva a ajonch que « manqueran pas d’esfoarç per ajudar lo pòble malian à recuperar cen que li aparten legitimament ». Dins aqueu sens, l’UNÈSCO fa referença ai mausoleus e ai manuscrichs de Tomboctó e au tombeu d’Asiquia à Gao.

ESPOART

Après la decepcion bordalesa, lu nissarts si son remés en lo drech camin en anent s’impauar per 2 à 0 à Brèst, en terra bretona. Lu aiglons an prepauat un juèc solide e foarça madur. Nissa durbèt la marca en promier periòdo em’un goal de Peicinovic. Pi tuèt lo match en principi de segond periòdo em’un goal marcat dau jugaire breton Ferrhad contra lo sieu camp. A l’issuda de la 23a jornada, Nissa reven à la 5a plaça dau campionat à egalitat de ponchs darrier Bordeu, mas davant Rennes e Lorient. Lo rescòntre que ven contra Lorient justament serà pròpi important.

METÈO

Lo soleu luserà tota la setmana emé quauqui nèblas. En jornada, li temperaturas balanceran entra 11 e 14 grados fins à dimècres, pi caleran entra 6 e 8 grados à la fins de la setmana. La nuèch farà totjorn frèi emé de temperaturas entra -1 e -4 grados.

Comment on this post

Blog archives

We are social!

Recent posts