PantaInfo n°15 - 21 de mai dau 2012

PantaInfo, l’informacion setmaniera dau País Nissart e Alpenc

21 de mai dau 2012

PAíS NISSART E ALPENC

1/ Actualitat política :

A l’escadença dei eleccions legislativi que si debaneran per lo mes de junh que vèn, la Federacion Regions e Pòbles Solidaris a presentat per la promiera circonscripcion dei Aups-Marini lu sieus candidats en li personas d’Alix Horsch-Filippi e de Greg Gobbi. « Regions e Pòbles Solidaris » es una coalicion antijacobina formada notantament dau Partit Occitan e dau partit còrso « Femu a Corsica », emé lo sosten de Francés Alfonsi, deputat europèu dau grope Vèrds/ALE. Aquesta candidatura representa per lu pòbles nissart, còrso e meme d’Occitània tota una formidabla escadença de si radunar per luchar contra la pression dau sistema jacobin francés.

2/ Actualitat economica e sociala :

Entra la majoritat municipala UMP (Estrosi-Cioti) e l’oposicion PS encarnada da Patric Allemand, li sembla aver un consensús au subjèct dei dificultats financieri dau Comitat Regional dau Torisme de Coasta d’Azur. Sus lo fond, an tot ai doi la mema conviccion qu’un sector coma l’industria torística non pòu sobreviure sensa subvencions. Ensin, maugrat lu beneficis que fan, lu casinòs, li ostalarias à 5 estelas, la gastronomia de prestige e lu afitaires de yacht, an da besonh dei impoasts e taxos que nen prelèvon l’estat francés e li collectivitats territoriali per realisar li sieu campanhas de comunicacion e de promocion…

3/ Actualitat curturala :

Divèndres passat li èra au teatre Francís Gag la promiera presentacion de la pèça « Gusta s’embila ». Li èron ja mai de 900 personas à si marcar despí la dubertura dei reservacions. La setmana passada la pèça s’es jugada quatre còups de divèndres à diménegue. Sta setmana li aura parier encora quatre representacions lo divèndres à 9 oras de sera, lo dissabta à 3 oras d'après-dinnar e à 9 oras dau sera, e fins finala lo diménegue à 3 oras. Si pòu reservar en anant sus lo siti www.theatrenicoisdefrancisgag.fr ò en sonant au 04.93.74.83.05.

En l’encastre dau festin dei Mais li èra dissabta lo 19 de mai la « Nocturna » emé lo concèrt de Lou Dalfin, grop occitan famós dei valadas occitani dau Piemont, sovent copiat mas jamai egalat, que passèt lo darrier còup à Niça sus lo pontin per la Fèsta d’Occitània de 2001 dau Centre Cultural Occitan País Nissart e Alpenc, e mai recentament à l’Estivada de Rodés. L’endeman li èra la darriera jornada dau festin dei Mais dau 2012, que s’es acabada.

'Sta setmana, lo Centre Cultural Occitan País Nissart e Alpenc organisa per lo dissabta que vèn una jornada temàtica à Coarase. Seran organisats un atalher de coïna nissarda, una vísita guidada dau vilatge e un cors de coarasier.

OCCITÀNIA

1/ Actualitat política :

L'occitanista Eric Andrieu es vengut deputat au Parlament Europèu en pilhant la plaça dau tolosan Kader Arif que s’en va au govèrn francés. Eric Andrieu a la reputacion d'èstre un tipe eficace e onèste. Parla occitan meme en li acampadas polítiqui e encuèi es vengut l'espèr d'un pòble, qu'a da besonh d'un ambassador de la revendicacion occitana au Parlament Europèu. Naissut ai Corbièras, foguèt president dau CIRDOC, la mediatèca occitana de Besièrs. Militant au PS d'Aude, es totjorn estat foarça estacat à la curtura occitana. La sieu oposicion ai accions de Frêche l'empachèt pas de trabalhar en política. Es estat cònsol de Vilaroja de Termenés despí lo 1995. Cinc ans denant d’aquò, fondèt lo District de desvolopament dau Massís de Motomet, lo promier discrict de desvolpament rurau dins l'Estat francés, e n’en foguèt president fins à l'an 2000. Aqueu district èra la prefiguracion de la Comunitat de Comunas de Motomet, cap dei servicis sociaus (escòla, lotjament per lu vièlhs, centre de secors, plan viticòla, reorganisacion foncièra, installacion d'elevaires, ponchs multi-servicis, centre d'iniciativas à l'environament, gropament d'Internet, e patin e cofin).

2/ Actualitat economica e sociala :

A l’ora que la mondialisacion de l’economia favorisa lo comunitarisme, si desvolopa l’idea de la construccion d’una Occitània au biais de la solidaritat economica, embé notantament l’idea de crear un fond economic occian. Lu fonds judius coma lo FNJ (Fonds Nacionau Judiu) ò lo KKL (Keren Kayemeth LeIsrael) poádon èstre un modele per crompar li tèrras basta que despauèm de fonds per investir. En un promier temps, lu pensionats proprietaris de tèrras porríon ja faire de remembrament ambé l'ajuda dei SAFER (societats d’arantjament foncier e d’establiment rurau). Segur, l'agricultor occitan es individualista e s'integrerà pas en d’expletacions collectivi, mas exíston ja lu gropaments fonciers agricòls e lu gropaments agricòls d'expletacion en comun, ensin que toti li variantas de cooperativas (cròmpa, vèndita ò usatge de material agricòla). La segonda etapa consisteria à motivar de joves ò de madurs à praticar la pluri-activitat en zòna montanhoa : seria bessai lo plus pauc riscat per debutar. Lo capitalisme a poscut fins à la darriera crisi retardar la baissa dau profiech en organisant lo crèdit que permete ai paures de contunhar de consumar. Mas la crisi a ben mostrat qu'arriba un moment quora lu paures son plus sorvables. Lu liberaus vènon de mostrar li sieu contradiccions : elu que cridàvon sempre « mens d'estat » an demandat ai estats de li prestar de sòus. Porrèm pas contunhar de vèire li bancas privadi obtenir de sòus de la BCE à 1% e prestar ai estats à 3, 4, 5, 6%.

3/ Actualitat curturala :

Lu 12 e 13 de mai passats, l’IEO-06 e l’IEO-PACA organisàvon la recampada generala de L’IEO-Federau à Nissa. De responsables dei IEO de l’espaci occitan faguèron lo desplaçament per far avançar lo projèct IEO. Après l’acuèlh dau dissabta de matin, l’IEO-06 presentèt en un diaporama li sieu accions de terrenh en lo departiment. S’en seguèt un debat sus li accions de proximitat e la necessitat de multiplicar lu luècs de socialisacion per la lenga. L'après-dinnar siguèt consacrat a la recampada : rapoart d’activitat, rapoart financier, rapoart moral, orientacions e debats. A l’entorn dei 5 oras dau vèspre s’enseguèt lo travalh dei comissions : Pedegogia, toponimia, transmission de la lenga, comunicacion. Dau temps de l’aperitiu, l’atalher teatre de l’IEO-06 presentèt un tròç d’una pèça de Raols Nathiez. Lo Mago d’en Castèu pilhèt la seguida dins la serada. Lo diménegue de matin, lu animators dei comissions venguèron presentar lo sieu travalh, seguit d’un debat e dai orientacions.

INTERNACIONAL

1/ França

Dimarts passat, just à la sortida de la passacion de poder, lo noveu president de la república Francés Hollande faguèt un omenatge à Marie Curie e à Jules Ferry en depauant una garba au pen de l'estatua monumentala de l'òme político francés au jardin dei Tuileries à París. L'artesan de l'escòla modèrna èra finda un colonialista convinçut. E la drecha a pas mancat d’avivar una polémica qu'a vist lo costat racista de Ferry sensa aver compte dau lingüicidi planificat da l'òme político. Lu polemistas voálon vèire lo promier faus pas de Francés Hollande. Ferry lo promotor de l'escòla mixta e laïca... ò lo colonisator racista ? Mantu politicians de drecha coma Luc Ferry ò Roselyne Bachelot sus Twitter, e quaucu unu de senèca denóncion li zònas d'ombra de l'omenatjat. Jules Ferry promouguèt lo colonialisme en China e en lu país dau sud-èst asiàtico, obtenguèt lo protectorat de Tunisia e si lancèt à la conquista de Còngo. En Euròpa considerèt que calia « recuperar » lu territòris d'Arsàcia e de Lorena. En lo 1885 prononcèt un discors que Charles André Julien considerèt lo « promier manifèst imperialista portat à la Tribuna ». Mas Jules Ferry destaca sobretot per la sieu activa promocion dau colonialisme francés e per la sieu reforma escolara, que suprimèt li identitats religioï (laïcisme francés), li curturas regionali (diferenti de la francesa) e qu'impauèt coma soleta lenga lo francés, parlat alora da 10% dei ciutadans de França, e en impauant d'umiliacions e de puniments à-n-aquelu que parlàvon « patoás ». Foguèt lo principau promotor de la « vergonha » à la fin dau sècolo 19-en. Per poder escampar aqueli valors francesi e uniformisar tot lo territòri sota lo sieu poder, introduguèt l'ensenhament primari público à gratís, un modèl encara en vigor dins la França dau sècolo 21.

2/ Euròpa

En Itàlia, un moviment político sardo, sonat « PARIS-Malu Entu », a oficialament demandat que s'organise un referendum sus l'independença de Sardenha. Segond l’Agenzia Giornalistica Italia, lo grop afirma qu'a amassat 27.000 signaturas demandant que se vòte sus d’aquela question, maugrat que s'en es liurat solament quaucu 13.000 davant un tribunal : « Lo noastre destin dèu èstre solament decidit per la noastra determinacion de decidir lo noastre present e lo noastre avenir », a dich lo cap dau moviment, Doddore Meloni, segond Libero Quotidiano. La peticion arriba solament quatre jorns après que la populacion sarda augue votat favorablament per la redaccion d'un novèl estatut d'autonomia que mete à jorn lo tèxto existent de 1948. PARIS-Malu Entu es un dei dotze partits e moviments políticos dins lo quau es dividit à l'ora d'aüra lo nacionalisme sarde, sigue autonomista, sigue independentista.

3/ Monde

Libia : despí la fin de la dictatura de Kadafí, lo país es en preda à de conflicts interétnicos, notantament entra li tribús Toboï e Oled Eslimani, que s'afrónton despí fin març à Sebà, la capitala dau Fezane, à esquasi 700 qm au sud de Tripolí. Li violenças an fach de desenaus de moarts e de ferits. Sebà es una vila multicurturala dont si tròvon de Tobós, de Toaregs e d'Arabos. Despí la tombada dau regime de Kadafí, una lucha s'es engatjada per la presa dau poder en aquesta vila estratégica en lo Fezane. E lu Arabos dei Oled Eslimane estímon que lo poder li dèu revenir d'autant mai que si sovènon que dau temps de la monarquia de Senossí, après la partença dei colonialistas europèus, son ai Oled Eslimanes que lo poder foguèt confidat. Son d'alhors lu Francés qu'an contribuït à l'installacion d'aquesta tribú, compauada d'Arabos nomades de Libia e de Chado, à Sebà. Mas quora arriva au poder, Kadafí n’en caça lu Oled Eslimanes e installa lu membres de la sieu tribú, lu Kadafà. Segond lo Consèu Nacional Tobó, lu atacs que víson lu Tobós à Sebà son premeditadi. De tota evidença, exista un projèct de minorisacion tant dei Tobós que dei Toaregs, estatjants istorics de la region. Li tribús arabi, sostengudi dau CNT, non soeteríon vèire lu Toaregs e Tobós pilhar lo poder, meme sus li sieu pròpri tèrras. L'arabo dèu estar dominant. La meme estrategia es mesa en plaça contra lu Amazighs dau Nòrd, dont li foarças arabo-musulmani dau CNT temptàvon de caçar lu Amazigs dei cèucles dau poder e de decision, per menar una política d'arabisacion de la region. De combatants de la tribú Oled Eslimana, longtemps favorables à l'ancian regime, recercàvon de Tobós en lo camp Taiurí, dont vívon de centenaus de familhas toarègui. An toti fugit lo camp en causa dei combats, segond un responsable dei Toaregs. Issa Abdelmajid Mansor, lo cap de la tribú toboa, a afirmat que lu sieus compatriòtes son sotamés à de netetjaments étnicos, acusa lo Conseu Nacional de Transicion de voler exterminar la sieu tribú, e qu'en respoasta, l'etnia si porria desseparar de Libia. A-n-aquesta escadença, anonça « la restauracion dau Front Tobó per lo salut de Libia », ancian moviment d'oposicion à l'ancian regime qu'èra estat dissolut au mes d'avost de l'an passat. E d'ajónher que « s'aquò non basta, demanderèm l'intervencion estrangiera e comencerèm à crear un Estat coma Sud-Sodan ». Lu Tobós son una etnia negra dispersada en lo sud de Libia, en Niger e en Chad. Compta mai de 350.000 personas.

ESPOART

Siam enfin sauvats ! Es en aquestu mots que podèm retenir lo darrier rescòntre de la sason de l’OGC Nissa. Au tèrme d’un rescòntre pròpi foal, lu aiglons son anats ganhar à Lion per 4 à 3. La partida avia pura foarça mau començat : après tres temptativas maluroï sus lo planton, Nissa s’es retrovada menada 2 à 0 après vint cinc minutas de juèc. La partida semblava alora plegada. Era sensa comptar sus l’esperit de combativitat dau onze nissart qu’à rapidament reagit e qu’es revengut à l’escòre au bot de dètz minutas. A doi dapertot à la mièja-temps, Nissa marca vito vito un tèrço goal en seguida à-n-un còup franc que lo malurós gardian lionés (l’ancian nissart Ugo Lloris) manda en la sieu gàbia. Lu Olimpians capíton d’egalisar, mas la fortuna èra dau costat dei roge-e-negres que tornèron pilhar l’avantatge sensa plus jamai lo laissar ai sieus adversaris. Escòre final : 4 à 3 per Nissa. Lo Gim es definitivament sauvat e acaba lo campionat à la 13-a plaça. Podèm aüra esperar que la sason que vèn serà ben milhora e que Nissa juguerà enfin emé mai d’ambicions. A-n-aquesto subjèct, li novèlas sèmblon puslèu optimisti vist que denant lo match es tombada l’informacion oficiala que si l’OGC Nissa si mantèn en promiera liga, lo club aurà un novèl entraïnaires dau nom de Claude Puel. Esperèm doncas que s’enseguerà un reclutament mai ambiciós qu’aqueu qu’aviavam augut fins à aüra mentre l’epòco Stellardo…

METÈO

S’aspèra de pluèia per esquasi tota la setmana, levat bessai lo dimècres que serà ensolelhat mas emé de nèblas. Per contra una foarta chavana es da prevèire lo dijòus. Enfin, per tota la dimenjada li serà una alternança soleu e pluèia. Li temperaturas varieran entra 21 e 26 grados en jornada mas resteran establi à 14 grados la nuèch.