Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°14 - 7 de mai dau 2012

Posted by Pantainfo : infos de l'emission d'actualitats setmanieras sus ràdio nissapantai.com on May 7 2012, 13:16pm

PantaInfo n°14 - 7 de mai dau 2012

PantaInfo, l’information setmaniera dau País Nissart e Alpenc

7 de mai dau 2012

PAíS NISSART E ALPENC

1/ Actualitat política :

Li votacions per lo president de la República francesa si son acabadi emé la victòria dau candidat socialista. Pura en lo País Nissart, e mai generalament en lo departIment dei Aups-Marini, lu electors an massivament votat per Nicolas Sarkozy, emé mai de 64% dei sufratges exprimits. Lo boan resultat dau candidat UMP s’explica per un repoart massiu dei votz dau Front Nacionau, de mai de 60% à Nissa. Francés Hollande ameliora de tres ponchs l’escòre de la senèca (esquasi 35% contra 32% en lo 2007), sensa pura far progressar lo vot de la senèca à l’escala dau departiment.

2/ Actualitat economica e sociala :

L’eleccion de Francés Hollande constitua bessai un espèr per l’avenir dau País Nissart. En efèct, quora en la carriera s’opaueran à la betonisacion de la Plana de Var, à pagar lu suplements de taxos e d’impoasts generats dau Grand Estadi Vinci, à la LGV Paca, à la perseguida d’Iter, quora exigeran lo desmantelament dei metropòlis qu’an destruch lo pauc de democràcia comunala que si beneficia encara, quora per li memi rasons protesteran contra lu poders centralisators donats ai noveli entitats territoriali, quora ocuperan de tèrras agricòli per li preservar de l’especulacion imobiliera, quora bloqueran li entradas dei centralas nucleari, quora desfideran la lèi per destrúger de tròç de tèrra OGM, quora romperan de laboratòris dont si fabrícon de produchs à basa de nanotecnologia, quora arresteran lu enginhas de chantiers de construccions de la LGV Lion-Turin (No-TAV), quora ocuperan de rectorats per exíger l’ensenhament dei noastri lengas… Auran da faire tèsta à de policiers, gendarmes mobils e CRS requests da de prefècts de senèca au servici d’un govèrn de senèca. E la repression d’un govèrn de senèca es generalement mai doça d’aquela d’un govèrn de drecha.

3/ Actualitat curturala :

Lo festin dei Mais si contunha en Cimier e si fa aquest an en cada quartier, escart ò comuna de la Contea. Lu Mais son l’escadença de si retrovar, lu diménegues de mai, sus la plaça ò lu quatre-camins dau sieu luèc, toti generacions mescladi à l’entorn de l’aubre de cocanha. Si « vira lo mai » e bala, que l’aubre de mai es lo simbòlo de la renaissença de la natura e de l’unitat. Dins una jornada de convivença, si compartisse jòia, past e si juèga à la morra, au vito, au pilo e patin e cofin. En Gavotina, en li vilas de Sant Esteve d’en Tiniá, Sant Martin d’en Vesubiá, Puget-Teniers per exemple, au principi dau mes de mai, si planta l’aubre de mai per festejar la venguda de la prima. Au sècolo 20-en siguèt l’escadença de « festejar » li noveli classas de conscrichs que partíon ai guèrras (1914, 1939, Indochina, Argeria...). Aüra tòrnon trobar un costat pacific de ligam social. En Provença, lo mes de mai es parier l’escadença de far fèsta. Si diía qu'èra lo moment dont si podia elegir una jovena filha simbòlo de la belessa de la Prima, la « Bèla de Mai ». D'aquí vendria lo nom dau quartier marselhés « La-Bèla-de-Mai. » Longtèmps fa, un dei festins mai famós de mai èra aqueu dau « Festin dei vernas » dins lo quartier de Santa Margarida, dont si tròva actualament la Calandreta nissarda. Lo festin mai frequentat aüra de la region es aquesto dau jardin dei Arènas de Cimier.

Lo dimarts promier de mai passat, à l’escadença de la dubertura dau festin dei Mais si juguèt per lo promier còup la pèça de teatre « Lo Pichin Prince » da la Chorma Nissarda, seccion teatre dau Centre Curtural Occitan País Nissart e Alpenc. La jornada dau diménegue 6 de mai èra desgalhada dau marrit temps en matinada. Aquò non a empachat lu grops Cap Levat (dei Valadas dau Piemont) e lu famós Rauba Capeu de donar de concerts au predinar, e de sauvar ensin la jornada gràcia à de balètis foarça joiós. Cau signalar qu’aquest an, per Nissa siguèt decidit de tornar dinamisar lu Mais de quartiers, que de 11 oras fins à 5 oras dau predinar si tròvon : lo 5 de mai au Parc Chambrun, lo 12 en Plaça Arson e au Parc Carol de Romania, lo 19 de mai au Jardin Arsàcia Lorrena e à l’Esquare Marcel Kirchner.

Lo diménegue 13 de mai, en lo festin dei Mais, partent de 11 ora e mièja, serà rendut onor au regretat Maurís Sgaravizzi, un dei sèt sòcis fondators dau Centre Curtural Occitan País Nissart e Alpenc, defuntat lo mes de julhet passat. Cantaire occitan, estatjant de Sant Joanet implicat dins la vida associativa locala, pensaire umanista, trobaire modèrne, figura de Nissa e d’Occitània, amic d’Alan Pelhon e de Joan-Luc Sauvaigo que n’en cantèt li sieu cançons.

OCCITÀNIA

1/ Actualitat política e economica :

L'Euroregion Pirenèus-Mediterànea desvoloperà à comptar d'aquesto mes de mai un nòu projèct d'Erasmus per joves entraprenèires, qu'impulserà de sojorns embé d’entraprenèires experimentats dont lu entraprenèires noveus porran aquerir li abiletats que fan da besonh per dirigir una pichina ò mejana entrapresa. Lo projèct de l'Euroregion a ja reçauput lo fuèc vèrd de l'Union Europèa que li a autrejat un cofinançament de 83% dau budget total, esquasi 200.000 euros, tra lu fons de la Direccion Generala d'Entrapresa e Indústria de la Comission Europèa. Emb aquela ajuda d'Erasmus per joves entraprenèires, per lo promier còup, una Euroregion reçaup un cofinançament d'aqueli características da l'Union Europèa. Lo projèct, que si finaliserà en abriu dau 2014 e qu'ofrerà 56 escambis tra lu territòris, es coordenat da l'Euroregion Pirenèus-Mediterànea mé li chambras de comèrci e indústria de Barcelona, Miègjorn-Pirenèus, Lengadòc-Rosselhon e lo centre Balear Euròpa. Erasmus per joves entraprenèires respoande à la volontat de l'Euroregion d'impulsar de projècts concrets emé de resultats capitalisables dins lo sieu territòri, en mai dau besonh de promòure la creacion de nòvi entrapresas e de melhorar la capacitat empresariala, l'internacionalisacion e la competitivitat. Naissuda en lo 2004, l'Euroregion Pirenèus-Mediterànea es formada dai govèrns autonomics de Catalonha e dei Isolas Balears e dai regions occitani de Miègjorn-Pirenèus e Lengadòc-Rosselhon. En lo 2009, si dotèt de personalitat jurídica en creant l'Agropacion Europèa de Cooperacion Territoriala (AECT) Pirenèus-Mediterànea.

2/ Actualitat curturala :

A l'ora dont s'acampa la Confederacion dei calandretas, una boana novèla es venguda : la dubertura à la dintrada d'una tèrça escòla en la vila de Besièrs. L'escòla dau Garric serà en plaça dins lo barri de Montimas per la dintrada 2012/2013 emb doi classas e un quarantenau de mainatges. Per Patrici Rampon « la demanda es foarta e li son mai de 250 enfants que son marcats à la Calandreta ò interessats per li èstre escolorisats. L'escòla es destinada mai que mai ai mainatges de la vila, mas finda ai pichoi dei vilatges que si tròvon au sud e a l'èst de Besièrs.

A la dimenjada dei 12 e 13 de mai si debanerà l’Acampament General Nacional de l’IEO à Nissa, au Centre de Loisir Animation Jeunesse Clairvallon (en lo quartier de Cimier), una promiera à Nissa. Serà l’escadença de mostrar e metre en valor l'occitanitat de la quinta ciutat de França e subretot, de la tèrça ciutat d'Occitània.

ESTRANGIER

1/ França

L’actualitat en França es marcada da la victòria dau candidat socialista Francés Hollande, que vèn lo noveu president de la República Francesa après aver batut au segond torn dei votacions l’actual president Nicolas Sarkozy. Lo socialisme francés recupèra alora la presidença de la República après 17 ans, dins un encastre de grèva crisi economica e sociala. Coma à l’acostumada en li eleccions francesi de que soarta que sigue, lo nòrd a votat majoritariament à drecha e lo sud a favorisat lu socialistas. Maugrat que la victòria socialista es estada per un marge estrech, es clar que Sarkozy a fracassat dins la sieu temptativa d’atraire lu votants dau Front Nacional. A-n-aqueu fach cau apondre la chausida de Francés Bayrou de votar per Hollande, e mai sigue estada personala. Pauc après aver confirmat la sieu victòria, lo noveu president elegit a fach un promier discors en rengraciant l’esfoarç dei sieus seguidors e finda a rengraciat lu Francés que l'an sostengut, mas a apondut que serà un president « de toi lu ciutadans ». Sarkozy a vito vito reconoissut la sieu derota, declarant n’en portar « tota la responsabilitat ». En un gèst gaire abitual, lo candidat de l'UMP a felicitat Hollande e li a desirat « de tot coar que França capite d’atraversar li espròvas ». En aqueu sens, lo programa electoral socialista a augut, coma es logic dins un temps de crisi, un foart composant economic. Entra li sieu mesuras mai conoissudi, que d’aquí gaire deurà implementar, li a una reforma dau sistèma fiscal e bancari, la derogacion de l’augmentacion de la TVA, l'establiment de mesuras contra l’especulacion e la fraudaria fiscala, la supression dei exempcions fiscali e l'establiment d'un taxo de 75% per lu ciutadans francés qu'an un salari de mai d’un milion d’euros. Per delà de l’economia, Hollande s’es engatjat à legalisar lo maridatge omosexual, à crear mai d'emplecs per lu professors e à revisar l'immunitat dau president de la Republica. Per rapoart au modèl d’Estat, Hollande non a donat tròup d’expectativas à-n-una descentralisacion administrativa e política reala, maugrat que sigue lo PS que comencèt, da la man de Francés Mitterrand, la reforma territoriala francesa. Per contra, lo nòu president s’es mostrat totjorns favorable à-n-una cèrta reconoissença e projeccion dei lengas dichi regionali de França, en prometent quitament la ratificacion de la Carta Europèa dei Lengas Regionali e Minoritari.

2/ Euròpa

Lu doi principaus partits de Grèça si son desprofondats faça ai extremistas ai eleccions de diménegue passat. Nòva Democràcia e lo PASOK, qu'an governat lo país despí la Segonda Guèrra Mondiala, an perdut una granda quantitat de vots. L'estonament vèn da la Coalicion de Senèca Radicala Syriza, que vèn la segonda formacion, davant lu socialistas. Si remarca finda l'augmentacion dau supoart ai neonazis Chrysi Avgi (Auba Daurada), que porríon intrar dins lo parlament. Nòva Democracia e lo PASOK an anonçat que proveran de formar un govèrn d'unitat pro-europèu. En lu comicis grècs Nòva Democràcia an obtengut, à la mitan de l'escrutin, una majoritat minimala, emb 20% dei vots, mentre que lo PASOK arriba pas à 14%. La granda calada dei socialistas e conservators vèn de l'augment dei vots à la coalicion de partits de senèca Syriza, qu'a obtengut mai de 16% dei vots, en superant lo PASOK e es venguda la segonda foarça dau país. Finda a creissut l'extrèma drecha, qu'a agantat un pauc mens de 7%, un percentatge que li garantisse l'intrada dins lo parlament grèc. Lu Grècs an punit ensin lu partits de l'actuala coalicion de govèrn, favorables ai acòrdis de sauvament pactats embé l'Union Europèa. De la nòva composicion dau parlament, sorterà un nòu promièr ministre que remplaçerà l'interimari Loukas Papadimos. Aqueu novèu parlament deciderà se mantènon lu tèrmes dau plan de sauvament ò se renegòcion la situacion embé Euròpa. La situacion política en Grèça ajonhe d'incertitud au plan de sauvament de l'UE, la Banca Mondiala e lo FMI, qu'exíjon à Atenas una reduccion de 11,5 miliards d'euros de despensa pública per junh en escambi dei 173 miliards acordats. Li a la possibilitat que l'executiu que sorgirà d'aqueli eleccions vòugue renegociar aquel acòrdi.

3/ Monde

Au mes d’abriu, Human Rights Watch menèt una enquista de 10 jorns a Bamako, la capitala maliana, sus dei exaccions comesi dai grops armats en Azaoad. Interrojèron mai de 100 victimas e testimònis coma dau personal medicau e umanitari e dei autoritats locali religioï e tradicionali. Pàrlon de levament de jovi filhas, de còups qu’an pas mai de 12 ans, dai rebels dau MNLA que li auríon sequestradi per li forçar. Pàrlon finda de pilhatges dai òmes dau MLNA ò dei milícias arabi dins lu espitaus, lu bastiments governamentaus, li bancas, li maions de personalitats locali, li escòlas e li glèias. Lu combatents islàmicos d’Ansar Dine auríon destruch de bars e d’ostalarias, associats per elu à la consomacion d’alcool e à la prostitucion. Lu pilhatges seríon finda lo fach de la populacion locala e dei presoniers liberats mentre que lu rebels avançàvon. Lu sordats malians, quora èron encara sus plaça, auríon finda comés d’exaccions segond de testimònis. Auríon executats d’òmes, civils coma militaris, à la « pèu clara » : Toaregs, Arabos o Mauritanians. Lu estatjants de mai d’una vila e vilatge indícon sobretot la presença de joves de 14 à 17 ans, de còups de 13 ans pas mai, tra lu combatents. De militaris malians avíon ja signalat que de joves faíon part dau MNLA despí lo principi de la revòuta en genoier passat. Lu combatents d’Ansar Dine sèmblon participar mens à de taus crimis e meteríon vito en plaça de mesuras per protegir lu civils. Aplícon parier la Sharia d’un biais violent : flagelacions, mutilacions ò execucions per aquelu que seguísson pas la sieu interpretacion estricta de la lèi islamica.

ESPOART

L’OGC Nissa es anat jugar lo mach nul à Tolosa diluns passat, en darriera part de la 36-a jornada de Liga 1, après aver mancat una grana ocasion de goal en segond periòdo, Palun si trovant tot solet davant lo gardiant tolosenc. A doi jornadi de la fin dau campionat, lu Aiglons son à solament tres ponchs dau promier relegable Brest, e deuran absoludament ganhar lo mach que vèn contra Evian per non riscar de calar en Liga 2, vist que lo darrier mach si juguerà à Lion.

METÈO

La setmana serà ensolelhada emé de temperaturas auti fins à 24 grados en jornada. Mas lo temps serà en partida nebulós. Enfin, per diménegue, de pluèia es encara da prevèire emé una baissa subita de temperatura.

Comment on this post

Blog archives

We are social!

Recent posts