Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°16 - 4 de junh dau 2012

Posted by Pantainfo : infos de l'emission d'actualitats setmanieras sus ràdio nissapantai.com on June 4 2012, 01:38am

PantaInfo n°16 - 4 de junh dau 2012

PantaInfo, l’informacion setmaniera dau País Nissart e Alpenc

Lo 4 de junh dau 2012

PAÍS NISSART E ALPENC

1/ Actualitat política :

A l’escadença dei votacions legislativi que si debaneran lo 10 de junh que vèn, lo collectiu « OIN Plana de Var » a decidit d’interpelar toi lu candidats e toti li candidatas ai legislativi sus li segonda, quinta e seisena circonscripcions, per li questions seguenti :

1. Siatz per ò contra l’Operacion d’Interés Nacional sus la Plana de Var, compte tengut notantament dei problemàticas agricòli, environamentali e legali que fan part de l’enjuèc ?

2. Coma avètz reagit à l’anonça de l’OIN e cen qu’avètz fach despí lo sieu projèct de creacion fins à aüra ?

3. Quora serètz elegit deputat, coma preveètz d’agir faça à l’OIN Plana de Var ?

Ensin, davant l’absença totjorn tant persistenta de concertacion pública e ciutadana sus l’ensèms dei projècts faraonics ilegals e financierament escandalós, lo collectiu soeta metre lu candidats davant li sieu responsabilitats e precisa que li sieu respoastas seran rendudi públiqui. L’absença de respoasta serà considerada coma una aprovacion de l’OIN e de l’ensèms dei projècts que s’en rapoàrton. Lo collectiu contunha la lucha tant que li seran pas de concertacions públiqui e ciutadani, e convida cadun à lo rajónher sus lo siti : collectif-oin-plaineduvar.over-blog.com

2/ Actualitat economica e sociala :

Totjorn à prepau de l’OIN Plana de Var : una crida en linha es estada mesa en plaça per demandar d’arrestar sus lo còup lu projècts en cors ò que vènon, ensin que per n’en exigir una debat ciutadan. Rapelam que lo projèct arroïnerà lu Nissarts e lu estatjants de la futura metropòli, manderà foara dau País lu pichins e mejans revenguts per que n’en rèston que lu mai rics e farà montar lu impoasts, ja otratjoament auts, per bastir un blòc de beton destinat à la recèrca dau « ben èstre ». Tra lu projècts mai escandalós en rapoart emé l’OIN figúron :

1. Lo poart de Sant Laurenç e de Cròs de Canhas qu’arroïnerà lu 50 pescadors per permetre d’acuelhir de bateus per Còrsega encara mai gròs ; doncas augmentacion dau tràfegue dei toristas que faran que passar ; deviacion de l’embocadura de Var qu’alimenta actualament en plancton e autres nutriments d’espèças protegidi.

2. L’agrandissament de l’aeropoart e lo conjongiment embé l’estacion de tren e lo trambalan implícon la construccion d’enòrmes tanquers de querosène sus de zònas inondabli ; en cas de creissuda de Var, tota la plana de Var e la Mediterànea conoisseran una catastròfa ben mai pèjor qu’aquela de l’Erica.

3. Lo desplaçament dau MIN devèrs La Gauda provoquerà un novèu tràfegue suplementari.

4. Lo Grand Estadi es un gorc financier per lo contribuable : 245 milions d’euros de budget iniciau da pagar sus 27 ans e 5 mes, cen que fa mai de 600 euros per personas ; es l’estadi mai costós per l’UEFA 2016 ; à-n-aquò cau ajónher lu 60 milions d’euros de la via de 40 metres. Lo solet qu’aproficherà d’aqueu projèct es l’entrapresa privada Vinci à cu lo partenariat Public-Privat causit per aquesta operacion assegura una remuneracion minimum meme se la frequentacion de l’estadi per lu machs de fotbòl non aganterà li 35.000 plaças previsti. A Nissa li es un solet estadi : aqueu dau Rai, e la sieu reabilitacion coasta solament 55 millions d’euros.

5. La construccion de miliers de lotjaments fins à Sant-Laurenç de Var alora que li son ja 25.000 lotjaments vuèis à Nissa…

6. Li entrapresas delocalisadi que en temps de crisi económica mondiala seran foarça utili alora que li son de desenaus de bureus da afitar à Sant Augustin e que lu comèrcis de promiera necessitat à Nissa son toti à picar dau cuu.

Lo collectiu exige doncas la preservacion dei tèrras agricòli vist que Nissa a solament 10% de sobeiranetat alimentària e qu’en cas de mancança per que rason que sigue, l’agricurtura locala porrà pas alimentar que 10 personas sus 100. La proteccion de la biodiversitat es una autra revendicacion : li zònas Natura 2000, protegidi da la legislacion europèa, seran menaçadi dai projècts d’adobament de la plana de Var. En mai d’aquò lu projècts meneran à la pollucion de la toalha freàtica de Var qu’alimenta cada jorn de centenaus de miliers d’estatjants. Lo projèct faraonic OIN-Plana de Var es estat bastit segond de principis d’adobament qu’exíston dau temps que Berta filava, sensa minga inovacion e progrés ecologic. Lo betonatge dei darrieri tèrras fertili dau país seria una catastròfa per la noastra seguretat alimentària. Mai que mai avèm toi da besonh d’una concertacion pública e que s’arrèston lu travalhs de bastiment. Per mai d’informacion, podètz contactar lo « collectiu OIN Plana de Var per un debat ciutadan » en escrivent à collectifoinplaineduvar@gmail.com, ò en anant sus lo siti http://collectif-oin-plaineduvar.over-blog.com E sobretot, non mancar de firmar la crida en linha contra l’OIN.

3/ Actualitat curturala :

La promiera dimenjada de junh èra marcada da la fèsta dau Vot emé lo 160-en aniversari de la construccion de la Glèia dau Vot. La fèsta a començat lo divèndres de sera embé notantament una representacion de la pèça de teatre « La ròda vira » da la tropa Lu Bastians Contrari. L’endeman, li èra un concèrt de música sacrada emé lu Còros de l’Opera de Nissa e l’Orquestra Filarmonic, pi un baleti animats dau grop Lu Rauba Capeu. Enfin, la fèsta s’es acabada lo diménegue em’un recampament e animacion musicala davant de la glèia, la Messa à la glèia e l’inauguracion de la promiera fasa de la Colada Vèrda. Li èra finda una animacion musicala emé la participacion de la Ciamada Nissarda, Nice la Belle, Lo Caireu Nissart, lo Cèucle de la Capelina d’Or e lo famós grop polifonic lo Còro de Berra. Bastida en lo 1852, la Glèia dau Vot es la resultat d’un engatjament religiós, pilhat dai elegits nissarts vint ans denant, e qu’avia per tècola d’evitar l’epidemia de còlera que menaçava alora la vila. Aquesto vot devia permetre à Nissa d’obtenir la proteccion de la Vierge. Cada an, segond la tradicion, aquesto vot es renovelat dau cònsol en plaça.

OCCITÀNIA

1/ Actualitat política :

Dimècres passat s’es constituit en Vièlha lo Conseu de Política Linguística de l’Occitan Aranés, que compta vuèch sòcis. S’agisse d’una comission de trabalh paritària entra lo Conseu Generau d’Aran e la Generalitat de Catalonha, qu’a per tècola de coordonar li mesuras d’impulsion e de normalisacion linguística de l’occitan aranés, partejadi dai govèrns d’Aran e de Catalonha. Dèu finda desvolopar l’estudi, la recèrca e la promocion de la lenga occitana coma es previst da la Lei de l’occitan en Vau Aran. Enfin, l’organisme dèu pilhar en carga l’aprobacion dei programas annuaus e establir un finançament pron grand dei políticas linguístiqui de la lenga noastra. Lo Conseu de Política Linguística de l’occitan aranés a l’estatut de pontença permanenta e especialisada. Lo sieu president, Francesc Xavier Solà, secretari general de Curtura de la Generalitat de Catalonha, a explicat ai mesos de comunicacion qu'una session constitutiva es arribada à doi acòrdis : fixar cen que serà lo procés de desvolopament dei objectius de la Lèi tocant la normalisacion linguística e li accions previsti per que lu ciutadans poàscon accedir à l’administracion pública en aranés, e prepauar la conversion de l’Institut d’Estudis Aranés en Acadèmia, e doncas formalisar l’autoritat linguística de l’occitan aranés en Vau d’Aran. Solà s’es declarat foarça satisfach, perqu’an realisat « una dei accions mai importanti e significativi tocant la recuperacion linguística de l’aranés despí l’aprobacion de la Lèi de l’occitan aranés en Vau Aran ». La comission si radunerà tornamai en octobre ò en novembre, quora seran publicats lu estatuts de la nòva Acadèmia. Lo cap de l’oposicion en Conseu Generau d'Aran, Francés Boya, critiquèt lo « bas perfil institucional e linguístico » d'aquesto organisme e prepauèt de crear una comission de seguiment entra lu grops políticos aranés « emé l’objectiu de trabalhar ensèms per garantir la sobrevivança de l’aranés e consolidar l’identitat dau pòble emé la lenga pròpria. » Segond Boya la creacion d'aqueu organisme mete lo consensús « en perilh » perqué adòpta « de decisions aluenhadi dau dialògo. »

2/ Actualitat economica e sociala :

País Nòstre a apelat à-n-un recampament dijòus lo 31 de mai passat per la situacion de l’occitan dins l’Acadèmia de Montpelhièr. Es pròpi lo 31 de mai que s’es acampat lo Conseu Academic au Rectorat davant de que s’es debanada la manifestacion. Segond l’associacion e lo CREO Lengadòc, lo Rectorat de l’Acadèmia de Montpelhièr a anonciat de mesuras que méton en perilh l'ensenhament de l'occitan en supriment de poastes. A costat d’aqueli mesuras si parla de la supression d’un emplec à mièg temps d’animacion pedagogica, que fonciona despí lo 1982, sus lu mesos especifics atribuits dau Ministèri per lo Desvolopament dei lengas regionali. S'agisse d'un poaste que permetia de metre en marcha lu projècts pedagogics dau promier e dau segond grado, emé l’ajuda dei collectivitats territoriali. Au delà, si preve de reduïr considerablament lo meso d'accion de l'encargat de mission acadèmica e li sieu foncions de responsabilitat, mai que mai sus li gestions dei mesos e la seguida dei ensenhaments. Son finda menaçats lu poasts dei conselhers pedagogics dei departiments d'Aude e de Gard, vist que seran pas remplaçats après la sieu retirada. Per tot aquò, lo CREO Lengadòc lancèt una crida en linha per demandar au rector de l'Acadèmia de Montpelhier de tornar pensar li decisions, perqué auríon de consequenças desastroï sus l'existença de l'ensenhament de l'occitan. Enfin, a mandat finda una lètra ai autoritats en li explicant la trajectòria de l'ensenhament de l'occitan a l’Acadèmia de Montpelhièr e li menaças que lo fan perilhar.

3/ Actualitat curturala :

En l’encastre de l’Estiu Occitan en Provença, lu eveniments importants d’aqueu mes son : lo Total Festum en Menerbés dau sud (fins au 24 de junh), lo Total Festum en Val de Danha (dau 9 au 23 de junh), la Fèsta dau Conte de Cucunhan (dau 17 au 19 de julh), li jornadas occitani dei Estivalas de Camplong d’Aude (dau 7 au 8 d’avost), lu rescòntres Le Vin se Livre (canton de Durban, a l’entorn dau 10 d’avost), li jornadas Vin, Rugbi e Occitan à Sant Andrieu de Ròcalonga (lu 17 e 18 d’agost). Mas d’autres recampaments punctuals de concèrts, balètis, passejadas… si tendran finda à Fabresan, Lesinhan, Montseret, La Grassa, Bisanet, Talairan ò Cruscadas… De pàginas informativi sus d’aquela programacion pàsson sus Ràdio Lenga d’Òc - Narbona.

INTERNACIONAL

1/ França

La directritz dau FMI Cristina Lagarde provoquèt un escandal la dimenjada passada : divèndres, en una entrevista au jornal The Guardian, diguèt qu’avia de simpatia per lu grècos, e li exigia que paguèsson lu impoasts. Mai concretament, parlèt de « toi aquelu que totjorn pròvon d'evitar lu impoasts » e que « si deuríon ajudar collectivament, en pagant toi lu impoasts. » En un autre moment diía que si preocupava mai dei pichoi de l'Africa Subsahariana qu’an segond èla « mai da besonh d'ajuda que lo monde d'Atenas. » Li declaracions motivèron un escandal, pas solament en Grèça, mas finda en França e dins quaucu país europèus, dont majoritariament si pensèt que Cristina Lagarde s'èra excedida. Foarça gents otratjadi dai declaracions de Lagarde li remembrèron li duri condicions que viu la populacion grèga, la repercussion dei reduccions budgetari impauadi dau sauvament europèu o lu auts interés qu’aqueu sauvament costerà. Finda la classa política grèga reagissèt à prepau dei declaracions de Lagarde. Evangelos Venizelos, cap dau PASOK (socialdemocrata), diguèt que Lagarde avia insultat e umiliat lu grècos. E Alexis Tsipras, cap de Syriza (senèca radicala), li respondèt que lu grècs avíon pas da besonh de la simpatia de Lagarde e que « Lu trabalhaires grècos lu pàgon ja, lu impoasts, d'impoasts insuportables. » Conscienta dei repercussions dei sieu declaracions, Lagarde escriuguèt dissabta una nòta sus lo sieu Facebook dont diía : « Coma ai dich foarça còups, siáu ben comprensiva emé lo pòble grèco e emb li sieu penúrias. Es per aquò que lo FMI paga lu esfoarç que fa per superar la crisi actuala e tornar à la creissença de l'economia, à l'emplec e à l'estabilitat. Es un aspèct important d'aqueu esfoarç que cadun poarte una partida justa de la carga, sobretot lu mai priviliegiats, en pagant lu impoasts pertinents. E es lo ponch que vouguèri soslinhar dins l'entrevista de The Guardian, coma part d'una entrevista mai vasta que faguèri fa de temps. » Mas de miliers d'usatgiers li an respondut embé pauc de simpatia. Lu mai de vint-a-cinc mila comentaris à la sieu nòta, en pauc de temps, an fach ja un recòrd absolut per lo ret social. E mai la granda tornada arribèt diluns passat, quora lu jornals grècos expliquèron que, coma cap dau FMI, Lagarde a l'estatut de foncionària internacionala e, doncas, pagava pas d'impoasts (lo sieu revengut estent de mai de 380.000 euros). De mai, un sit web francés expliquèt emb tot detalh lo salari e la descripcion de la cap dau Fons Monetari Internacional, confirmat da la descripcion que la diplomàcia francesa fa de la fiscalitat dei foncionaris internacionals.

2/ Euròpa

Divèndres passat si debatia dins lo parlament ucraïnés sus l’estatut de la lenga russa dins quauqui regions dau país. Lo debat, pura, arribèt pas à minga conclusion perqué la sala foguèt lo scenari d'una batalha entra lu deputats. Un deputat foguèt portat à l'espitau per una emorragia au cap. Lu afrontaments son foarça comuns dins lo parlament ucraïnés. Aquesto còup es estat entra lu deputats leials au president, Victòr Ianocòvich, e lu partidaris de l'oposicion. Ianocòvich es dubèrtament russista e lu opausants, que son mai europeïstas, voàlon pas balhar d'oficialitat au russo per fin d’empedir que l'ucraïnés vengue mai menaçat. À l'èst d'Ucraïna si parla majoritariament lo russo e lo Parlament avia l'intencion d'aprovar una lèi que permetesse qu'aquela lenga se posquesse emplegar oficialament dins li escòlas, lu espitaus e li institucions oficiali d'aquela region dau país. Après aquelu fachs, lo president dau Parlament, Vladimir Litvin, prepaua de dissòuvre la cambra e convocar d'eleccions, considerant que « lo parlamentarisme es estat completament destruch. »

3/ Monde

En Turquia la deputada curda Leyla Zana es estada condamnada tornarmai à 10 ans de preson da un tribunal penal à la vila d'Amed (Diyarbakır, en turco). Zana es acusada de terrorisme, segond cen qu’escrivia lo jornal turco Zaman. Lu jutges considèron que li quauqui conferenças dichi da ela en lo 2007 e en lo 2008 demoàstron qu'es sòcia dau Partit dei Trabalhaires de Curdistan (PKK), illegal en Turquia. L'avocat de Zana, Fethi Gümüş, a refusat li acusacions e a argumentat que se la deputada siguesse estada sòcia dau PKK, auria pas poscut concórrer ai eleccions legislativi turqui dau 2011. La politiciana curda intrerà pas en preson sus lo còup perqué es deputada au Parlament turco, cen que li garantisse l'immunitat. Li eleccions legislativi venenti son previsti en Turquia per lo 2015. Alora es aquí que porrà mancar de libertat. Aquelu fachs son pas estonants, vist que Zana a comolat divèrsi sentenças de preson despí lo 1994, e totjorn per d’acusacions similari. La promiera si debanèt en lo 1994, quora lo Tribunal de Seguretat Estatala d'Ankara la condamnèt à 15 ans de preson per una presumida apertenença au PKK. Maugrat qu'èra alora deputada, li tirèron l'immunitat e intrèt en preson, dont li passèt dètz ans, fins en lo 2004. Aquò foguèt pas la fin de la sieu persecucion dai tribunals turcos. En abriu dau 2008 la sentencièron à tres ans de preson. Èra lo promièr còup que si servissíon dei sieu conferenças dei 2007 e 2008 per la condamnar. En aqueli conferenças, Zana avia dich que lo conflict turco-curdo lo cau resòuver en pilhant en consideracion lo fach qu'Abdullah Öcalan (lo fondator dau PKK, en preson) es lo cap dei curdos e que l'Estat turco lo dèu considerar coma un interlocutor. Emb d'arguments similars, Zana foguèt encara condamnada a dètz ans en decembre dau 2008 e de nòu en julhet dau 2009 e en abriu dau 2010.

ESPOART

Un an après aver quitat l'Olimpic de Lion en condicions complicadi, lo castrés Claude Puel tornerà en avost sus un banc de L1. Lo Gim oficialisèt lo dimarts 22 de mai passat la sieu venguda per tres ans. Après Lilla e Lion, Claude Puel tornerà en Occitània la sason que vèn. Emé d’objectius : lo president Jan Francés Rivère anonçèt la sieu volontat d'estructurar lo club per li far passar un cap. Un noveu estadi (teoricament lèst en junh dau 2013), una generacion de joves de granda qualitat (vènon d'emportar la Copa Gambardella), un entraïnaire competent e experimentat, la recèpta sembla boana per l'OGC Nissa. Demoara de vèire embé que ingredients. L'efectiu deuria foarça bolegar aquela intersason : mé l'arribada de Puel, li mans liuri per començar una política de recrutament ambicioa, e la fin de contract de sièis jugaires de la coala, s'espèron de cambiaments en l'equipa. D'autant mai qu’embé Puel, si podèm esperar la venguda de quaucu jugaires que l'escomessa porria interessar. Après Eric Roy (sacat en novembre passat) e Reinat Marsiglia, Claude Puel serà lo tèrço entraïnaire dei Aiglons en mens d'un an.

METÈO

Après un mes de mai pluviós, l’estiu sembla èstre revengut per junh. Lo soleu es previst per tota la setmana emé pura de riscas de raissas per dimècres e divèndres. Li temperaturas si monteran per tota a setmana à 25 grados de jorn e 16 grados de nuèch.

Comment on this post

Blog archives

We are social!

Recent posts