Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°20 - 15 d'octòbre dau 2012

Posted by Pantainfo : infos de l'emission d'actualitats setmanieras sus ràdio nissapantai.com on October 15 2012, 00:31am

PantaInfo n°20 - 15 d'octòbre dau 2012

PantaInfo, l’informacion setmaniera dau País Nissart e Aupenc

Diluns, lo 15 d'octòbre dau 2012

PAíS NISSART E ALPENC

1/ Actualitat política :

Dissabta, lo 20 d’octòbre que vèn, si debanerà la Caminada per l’Aiga e la Terra, una manifestacion organisada dau « Collectiu OIN-Plana de Var », à l’image de la Caminada organisada dapertot en lo monde da l’organisacion Gandhi Internacional per l’accés à la tèrra contra li expropriacions foncieri e l’espoliacion dei païsans. Aquesta caminada aurà per tècola de portar un messatge de mobilisacion per la reconquista dei terras fertili, la reapropriacion dei ressorças en aiga e la defensa dei drechs dei ciutadans dins li generacions futuri. Aquesta accion, organisada da Colibris 06 e « Collectiu OIN-Plana de Var : per un debat ciutadan », es prepauada à toi lu ciutadans e poarta coma messatge simple que lu ciutadans dèvon decidre solets per e sus lu sieus territòris.

La Caminada per l’Aiga e la Terra a per tècola de manifestar la sieu protestacion contra lu projècts ligats à l’OIN sus la Plana de Var, tra autre lo desplaçament dei Molins à Sant-Isidòra, dau MIN à la Baròna, la construccion d’una via exclusivament reservada ai veituras, sensa finançament d’una novela via de trambalan, la desaparicion dei terras fertili e la polucion de la noastra aiga, li expropriacions illegali, e tot aquò per l’enriquissament de quaucu notables… Si dona l’apontament à doi oras dau predinar davant de l’escòla de la Diga dei Francés, à la Travèrsa de la Diga dei Francés pròche dau Bolevard Paul Montel. La manifestacion s’acaberà lo sera emé una serada festiva e musicala.

Lo dijòus 11 d’octòbre passat s’es tenguda à Nissa, pròche dau bolevard Gambetta, una acampada dau « Collectiu OIN-Plana-de-Var » per decidre de l’organisacion de la Caminada per l’Aiga e la Terra, que si debanera lo 20 d’octòbre que vèn. A l’òrdre dau jorn figuràvon la question de la seguretat, l’alberjament dei personas que vènon d’autres despartiments, lo ponch de despart e lo traject, la serada festiva, l’organisacion de l’aficatge lo jorn de la manifestacion, lu besonh materials emé li bandaròlas e fin finala la comunicacions m’ai mèdias.

2/ Actualitat economica e sociala :

Un prevís de grèva es estat lançat à l’Institut Arnaud Tzanck de Sant-Laurenç de Var, per… d’octòbre que vèn. En rason de decisions que siguèron pilhadi sensa l’acòrdi dei sindicats tocant la convencion FEHAP, lo moviment social a per tècola d’impauar de negociacions per sauvar la convencion collectiva 51.

3/ Actualitat curturala :

Lo diménegue 14 d’octòbre passat, li èra en Vila Vièlha la 15a fèsta d’Occitània, organisada dau Centre Cultural Occitan – País Nissart e Alpenc. Aquest an la fèsta si fa en sosten au projèct de dubertura d’una classa bilingüa (nissart-francés), ensin que per festejar lu 4 ans de la ràdio Nissa Pantai. La manifestacion a començat à doi oras dau predinar per un passa-carriera en Vila Vièlha à partir dau Palai dei ducs de Savòia. Lo cortetge èra constituat dau carre dau CCOc em’una ratapinhata, e acompanhat dai musicants dau grope tradicional Lo Cepon, vengut de Vença. Pi, a tres oras dau predinar, au teatre Francís Gag, la fèsta s’es contunhada em’un discors dau director dau CCOc Cristòu Daurore, ensin que de Nadège Bonfils, responsable dau « Collectiu OIN Plana de Var – per un debat ciutadan », que n’a parlat de la Caminada per l’Aiga e la Tèrra que si debanerà lo dissabta que vèn. En seguida li èra un concert dau Cepon, una representacion de la pèça Lo Pichin Prince d’Antòni de Sant-Exupery, jugada en nissarda da la Chorma Nissarda e fin finala un concert dau còro polifonica La Taca d’Oli, de Choasa Marquetti.

OCCITÀNIA

1/ Actualitat política :

Lo dissabta 16 de novembre que vèn, País Nòstre organisa à Narbona una recampada pública sus lo tema de « Catalonha en caminada vèrs l’independença ». L’eveniment si debanerà à 6 oras dau predinar au Cafè de la Poasta. Tra lu convidats si troverà un poarta-paraula de « Convergencia Democratica de Catalunya », lo partit d’Artur Mas, lo president de la Generalitat de Catalonha.

2/ Actualitat sociala :

Paulhac, en Gasconha : despí la setmana passada, la tension s’agrava entra un grop d’un centenau de travalhadors espanhòus d’origina saariana e lu paulhaqués d’origina marroquina, caracterisada per de nuèchs de chacotadas e de destruccions. Coma s’èra da crànher, l’afar dau pògrom contra lo camp ròm à Marselha a fach de pichoi. La tension entra poblacions travalhaires va creissenta cada jorn, e à Paulhac lu saarians son pas lu benvenguts. Arribats en màger part d’Andalosia à la mitan de setembre en la ciutat medoquina, lu saarians si lotjàvon en d’esqüats de la vila, per travalhar dins lu casteus locals. A l’origina dau conflict, una « provocacion », o cen qu’es estat viugut coma tau dai marroquins. Una camieta independentista per Sahara occidentau seria estat pron per accendre lo fuèc. Saarians forabandits dau lotjament, autos marroquini e saariani ai vitras petadi à còups de barras de fèrre, e fin finala lu travalhaires saarians desplaçats dai autoritats à Montalivet. Segon li paraulas de cada part, l’iniciativa dei violenças vendria d’en fàcia ; mauaisat doncas d’explicar lo debanament dei fachs. Mas d’un biais general, aqueu conflict nen ramenta la revendicacion nacionala dei saarians que si plaça au centre de l’afar. Lu travalhaires implicats afirmèvon d’alhors la sieu apartenença au Front Polisario – lo moviment político principau de la lucha saariana. Aquò moastra ben que l’existença d’aquesto ancian conflict es totjorn autant d’actualitat. Lu incidents de Paulhac nen rapèlon enfin l’importança dei questions dei pòbles minorisats, e dau respèct dei sieus drechs.

3/ Actualitat curturala :

Lo cantaire occitan Joanda figura tra lu vuèch pre-seleccionats de l’emission de França 2 « La grande battle ». Mas per assegurar la sieu presença, la cau sostenir en votant sus Interret. Ensin, País Nòstre convida toi à si mobilisar en anant sus lo site www.joanda.net e en picant sus la fenèstra « La Grande Battle ». Pi cau picar sus la vidèo « Viatge au coar dau Sud », picar sus « votatz » e confirmar lo vot.

INTERNACIONAL

1/ Bèlgica :

Diménegue passat, lo cap dei independentistas flamands de la N-VA (Novela Aligança Flamanda), Bart de Wever, a ganhat li votacions municipali à Anvers, e lo sieu partit a capitat de si ficar en Flandra tota. Après lo despuelhament de la mitan dei bureus à Anvers, la tièra N-VA èra creditada de 37,5% dei votz, ò 23 sètis sus 55, largament davant lo borgmèstre (ò cònsol) sortent, lo socialista Patrick Janssens, que ganheria solament 28,7 % dei votz, sigue 17 sètis au conseu municipal. Lo cònsol sortent a reconoissut la sieu rosta electorala. En l’ensems de Flandra, la N-VA a fach tamben una traucada emé d’escòres entra 20 e 30 %, segond lu resultat provisòris. Bart de Wever vorguèt donar un messatge clar : « N’avèm pron ! Pron d’èstre pilhats per de vacas à lach. N’en podèm plus de l’imobilisme federal. Non acceptam mai la marrida gestion economica ». L’objectiu dau cap independentista es de començar en posicion de foarça li votacions legislativi previsti en lo 2014, e que si considèron ja decisivi per l’avenir dau país.

2/ Catalonha :

Dimècres lo 10 d’octòbre passat, lo ministre de l’educacion espanhòu, Ignacio Wert, reconoissèt dins lo Congrès dei Deputats espanhòu que la sieu intencion èra d’espanholisar Catalonha. « Lo noastre interés es d’espanholisar lu enfants catalans e que si sènton tant fièrs d’èstre espanhòus coma d’èstre catalans », diguèt Wert en respoasta au deputat dau PSC (Partit dei Socialistas de Catalonha), Francesc Vallès, que li demandava d’explicacions per aver ligat l’independentisme au sistema educatiu catalan. Wert ven de presentar una reforma educativa que, segond lo deputat socialista, remembra l’educacion dau franquisme. D’un costat prepaua de reduccions budgetari a l’ensenhament público e d’un autre, vòu sostenir economicament li escòlas de Catalonha e dei Illas Balearas qu’àugon l’espanhòu coma lenga veïculària, segond lo jornal El Mundo. Lo promier ministre espanhòu, Mariano Rajoy, li mostrèt lo sieu sosten. Mentre que lo debat sus l’independença de Catalonha es foarça viu dins lo noastre país fraire, l’Estat espanhòu reagisse d’un biais exorbitant, en fasent volar ben bas d’avions bombardiers F18 sus Catalonha e la menaçant embé d’intervencions militari. Ensin, dimarç passat, lo Parlament catalan siguèt deslotjat da una menaça à la bomba. Dins aqueu sens, lo govèrn espanhòu a mandat una letra formala a la Comission Europea en demandant que toi lu membres explícon la sieu posicion per rapoart à una eventuala independença de Catalonha e, finda, per rapoart a l’ipotesi que l’Estat catalan noveu fague part de l’Union Europèa. Après que lo president de la Comission, José Manuel Durão Barroso, diguèt qu’aquò dependria que de la legalitat internacionala, lo govèrn espanhòu s’es mes a far pression sus la Comission. En fach, Espanha a minga intencion de permetre un referendum sus l’independença de Catalonha. Rapelam que lo 10 de setembre passat, li èra à Barcelona una manifestacion massiva de mai d’un milion de personas per l’independença de Catalonha.

ESPOART

Mentre la setmana de trèga ligada ai qualificacions dei chormas nacionali per la Copa dau Monde dau 2014, l’ora es au bilanç per l’OGC Nissa, après vuèch jornadas de campionat. Maugrat una equipa mai solida sus lo papier e un juèc mai atractiu, lu aiglons ‘stan en davau dau classament de promiera liga, emé una soleta victòria, doi derotas e cinc rescòntres em’un escòre de paritat. Se Nissa a retrovat enfin un atacant vertadier en la persona de l’argentin Dario Cvitanic, la defensa moastra de signes inquietants. Sobretot, lo gardian titulari Joris Delle a presentat de prestacions foarça marridi fin à aüra. Esperam qu’emé mai de travalh, lo Gim si va melhorar.

METÈO

Lo temps serà ensolelhat fins à dimarç. De dimècres à divendres si preve un temps variable alternant soleu e raissa. Mèfi per dissabta, dont s’aspèra de raissas per tota la jornada e bessai de chavanas. Lo soleu deuria èstre de retorn lo diménegue. Li temperaturas seran establi entra 20 e 23 grados en jornada, e 10 à 15 grados la nuèch.

Comment on this post

Blog archives

We are social!

Recent posts