Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°3 - 6 de febrier dau 2012

Posted by Pantainfo : infos de l'emission d'actualitats setmanieras sus ràdio nissapantai.com on February 6 2012, 10:48am

PantaInfo n°3 - 6 de febrier dau 2012

PantaInfo, l’informacion setmaniera dau País Nissart e Alpenc

6 de febrier dau 2012

PAíS NISSART E ALPENC

1/ Actualitat política :

Lo Conseu dei ministres dau Govèrn Provisòri de la República Federala Occitana s’es debanat dissabta passat au Mónegue. Li questions essencialament debatudi èron li orientacions possibli de la futura República de Nissa ensin que la mesa en plaça dau calendari per l’organisacion dei votations. D’autri questions son estadi evocadi tocant de subjècts d’organisacion dau govèrn ensin que lo plan d’accion envisatjat per la manifestacion « Anèm Òc ! » que si debanerà lo 31 de març que vèn à Tolosa. Lo luèc dau conseu dei ministres que si deu faire en l’encastre de la manifestacion es pa’ncara estat clarament establit mas si porria debanar à Marselha. Un autre conseu dei ministres es previst à Pau en julhet.

2/ Actualitat economica e sociala :

En lo Nissa-Matin de divendres passat, una entrevista que recampa doi politicians PS e UMP à l’entorn d’un chantilhon representatiu de patrons « de la Côte-d’Azur », dona una idea dau camp economic actual dau País Nissart, qu’es compauat essencialament dau torisme e de l’especulacion imobiliera. Ensin, lu principals comercis representats èron : aqueu dau manjar, de proximitat, de l’imobilier, de l’ostalaria de luxo, li escòlas de comerça, li clínicas privadi, lu transpoarts, lo torisme, li agenças d’interim e li societats de gestion de patrimòni (emé la sede que si tròva à París). En soma una economia de servici sensa vertadiera activitat industriala ò agricòla, ni manco d’entrapresas de construccion.

3/ Actualitat curturala :

Dimècres lo 8 de febrier que vèn s'encoratja à cada Nissart de metre en evidença à la sieu fenestra ò au sieu balcon una bandiera nissarda per comemorar l’ecrasanta victòria dei separatistas nissarts ai eleccions legislativi dau 8 de febrier dau 1871, sigue dètz ans après l’annexion da França. A-n-aquesto subjèct, n’en podèm aprofichar per ramentar cen que significa en lo blason nissart l’aigle pauat sus de trés bandas de grava moventa d’una mar d’azur. L’aigle rotge representa lo còmte Amedea VII de Savòia, dich « lo Còmte rotge » en causa dau color de la sieu armadura, que recèu lo 28 de septembre dau 1388 l’omenatge dei estatjants de Nissa e de la Contea à l’escadença de la dedicion à la Maion de Savòia. Lu trés monts simboliseríon lo Mont-Cau, Mont-Alban e Mont-Boron que domínon la mar de Nissa.

OCCITÀNIA

Occitània èra presenta au salon dau torisme de Tolosa que s’es tengut dau divèndres au diménegue passats. Li èra un banc dau despartament de Tarn dont èron representadi li iniciativas mesi en plaça per lo valorisar emé la sieu ressorça occitana. Sota l’impulsion de militants occitanistas, Tarn desvolopa lu ligams tra l’economia e la curtura d’Òc, multiplicant li sieu accions emé lo Conseu de Desvolopament de l’Occitan, creat dau Conseu Regional de Miègjorn-Pireneus. Segon un sondatge dau 2011, 86% dei estatjants de la region si pènson que l’istòria, la lenga e la curtura occitani contribúon à la valorisacion dei activitats torístiqui.

INTERNACIONAL

1/ França

Lo portau geografic de Bretanha a creat una novela afica : aquela dau Vau-de-Lèira. La tècola d’aquesta iniciativa es de mostrar que Bretanha reunificada permeteria ai regions vesini d’èstre plus ben identificadi. En efèct, davant la perspectiva futura d’un ratacament de Nantas à Bretanha, lu conselhers regionals, que s’agràpon au sieu poaste e que sàbon plus cen qu’inventar contra aquò vist qu’an plus manco argument istòrico contra la reunificacion de Bretanha, an trovat una novela estrategia en pauant la question : « cen que farèm dei autres despartaments ? ». Lo portau Geobreizh a trobat la respoasta : Vendea, qu’a coma pichin nom « Bas Peitós », rajonheria naturalament la region Peitós-Charentas, cen que voàlon mai que mai de Vendeans. Maiena, Anjo e Sarta faríon part d’una novela region « Val-de-Loire », terme qu’es encuèi reconoissut da l’UNESCO en tant que patrimòni mondial per lu sieus casteus, sus d’un territòri que va d’Angers fins à Orleans.

2/ Euròpa

Catalonha : segon un sondatge dau jornal « El Periodico » estampat à Barcelona, 53,6% dei Catalans voteríon per l’independença dau Principat de Catalonha. En lo 2010, un meme sondatge avia donat 47% d'avejaires favorables à la sobeiranetat dau país. Lo sentiment independentista es doncas à si renforçar. D’autres fachs moàstron aquela realitat : despí quauqui setmanas s’es constituada « l’Associacio de municipis per la independència » que recampa 155 municipalitats governadi dai elegits de diferents partits catalanistas. A la fin de genoier, una marcha per l’independença a recampat en lo Maresme de centenaus de tractors e de veícolos. Tra quauqui setmanas si meterà en plaça « l’Assemblea Nacional Catalana » que deurà donar l’impulsion à de noveli manifestacions. Enfin, dins una entrevista au « Financial Times », lo president de la Generalitat, Artur Mas, a declarat qu’una respoasta negativa de Madrid au pacti fiscal qu’oficialisa lo contraròtle dei impoasts da Barcelona, porria menar à l’independentisme.

3/ Monde

Après l’independença dau Sud-Sodan, una lònga tiera de país son à asperar la sieu independença, de que si tròvon Escòça, Novela-Caledonia e l’ísola de Bougainville, que soèton organisar de referendums sus l’independença. Exista un autre grope d’estats independents en lu fachs e qu’aspèron la reconoissença internacionala : Kosovo, Abcazia, Ossetia-dau-Sud, Transdniestria, Aut-Karabag, Somaliland, Palestina e República Araba Saraoía.

ESPOART

La setmana passada èra dificila per l’OGC Nissa qu’a conoissut de fortunas diversi emb’una eliminacion en demi-finala de Copa de la Liga contra Marselha, e un match nul à Aiacho que podèm considerar coma esquasi miraculós. Après una promiera mi-temps paura en ocasions de but, d’un costat coma de l’autre, lu Còrsos an dubert la marca à la 57-a minuta après un penalti foarça litigiós. Lu Nissarts an egalisat à cinc minutas de la fin dau temps reglamentari graça à-n-una accion individuala de Gonçalvez qu’a aprofichat d’una gròssa error defensiva d’Aiacho. Nissa a sauvat la partida maugrat una prestacion extremament debla.

Dau costat de l’actualitat extra-esportiva : lo mach de Copa Marselha-Nissa de dimècres passat es estat entacat de violenças e d’actes de vandalisme escandalós : d'afogats marselhés an montat de vertadieri emboscadas sus lo traget dei veícolos dei suportaires de Nissa. Finda lu autobús dei suportaires an subit de calhassatges ensin que d’atacas sauvatgi emé de barras de fèrre. Un jornalista web de l’OGC Nissa es estat ferit. La polícia es estada passiva denant de menar un contraròtle sevèro… dei suportaires de Nissa. Lo zèlo repressiu abitual dei auti instanças contra aquelu (coma la dissolucion de la BSN ò la condamnacion dau Gim à un mach à « hui-clò » parcial) contrasta totplen emé la sieu tradicionala tolerança devèrs lu afogats de Marselha.

METÈO

La vaga de frèi de la setmana passada es per si prolongar ‘sta setmana, embé de temperaturas que si mantendran entra 5 e 8 grados lo jorn fins à manco 4 de nuèch. Lo recòrd de frèi deuria èstre agantat lo divendres em’un solet grado lo jorn e de riscas de neu. Per contra, non li son de precipitacions previsti.

Comment on this post

Blog archives

We are social!

Recent posts