Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°7 - 5 de març dau 2012

Posted by Pantainfo : infos de l'emission d'actualitats setmanieras sus ràdio nissapantai.com on March 5 2012, 10:48am

PantaInfo n°7 - 5 de març dau 2012

PantaInfo,l’informacion setmaniera dau País Nissart e Alpenc

5 de març dau 2012

PAíS NISSART E ALPENC

1/ Actualitat política e económica e divèrsa :

Lo jornal Nissa Matin s’es illustrat em’un article subjèct à discussion tant cen que di sembla foarça pauc à la realitat : ensin, segond l’article dau quotidian, lo cost de la vida en general (principalament dei products alimentaris) seria restat estable en la Contea… D’unu pàrlon de propaganda estrosista digna de la pressa nòrd-coreana, que cerca à escondre li dificulats crèissenti dei ciutadans nissarts.

Divèndres passat, una novèla gassilhada sismica es estada signalada en li Aups Provençali, pròchi de Barciloneta. De magnituda 4, aqueu noveu terratremoal s’es laugierament ressentit en lo País Nissart. S’agisse probablament d’una réplica dau teremòto de magnituda de 4,9 que s’èra debanat lo diménegue de la setmana de denant. L’epicentre si trovava finda en li Aups Provençali.

2/ Actualitat curturala :

Dissabta passat, l’IEO Federal e l’IEO-06 an organisat à Nissa, au CAL Boan Viatge, la formacion PARLESC. Es una formacion per animators de cors de lenga. La formacion èra à gratís per lu sòcis de l’IEO de Provença e País Nissart, e dei associacions afrairadi à l’IEO-06. Pura, l’inscripcion èra necessària. La formacion s’es debanada en doi temps : de 9 oras de matin à miègjorn, presentacion dau programa PARLESC (parlar, legir, escriure) e dau Quadre Europèu Comun de Referença per li Lengas ; de 2 à 5 oras d’au predinar, li èra una discutida à l’entorn d’elements pedagogics que perméton de melhorar l’ensenhament.

Lo 128-en Carneval oficial de Nissa s’es acabat diménegue passat, em’una batalha de flors lo dissabta au predinar, li iluminacions lo sera, pi la clausura de la ceremonia l’endeman, ensin que la cremacion dau rèi Carneval e lo fuèc d’artifici à 9 oras de sera.

En lo fra temps, totjorn en l’encastre dau Carneval, la plaça Garibaldi èra animada, lo dissabta, da un baleti emé lo grope de música nissarda Lu Rauba Capeu ensin que de concors de Morra, lo juec tradicional de la Contea.

Diménegue lo 11 de març que vèn, si debanerà à Nissa, en la Catedrala Santa-Reparada un concert dau grope de cants polifonics Lo Còro de Berra. L’entrada coasta 10 euros. Lu fonts recampats seran entierament au benefici dei Restau dau Coar.

OCCITÀNIA

La Coordinacion « Per la lenga occitana ! » qu’organisa la protesta « Anem Òc ! » dau 31 de març dau 2012 à Tolosa, a fach un comunicat per rapelar li valors essenciali de tolerança e de dubertura au monde que la cultura occitana li es estacada e l’es totjorn estada. Lo moviment associatiu e cultural occitan non tolererà la presença en la manifestacion de personas ò gropes que reivendicaríon e proclamaríon una vision xenofòba d’Occitània.

Lo 31 de març naisserà un noveu jornal occitan, que si sonerà « Lo Jornalet » e aurà coma soleta tècola de servir Occitània coma mèdia independent. Serà escrich en occitan e pensat per Occitània. En compendi, « un jornal modèrne per un país que vòu viure ».

Foart d’un sosten populari exprimat en una recenta enquista, l’Institut d’Estudis Occitans n’en aproficha per presentar li sieu diferenti accions, coma l’ensenhament. Marc Castanet, institutor animator en lenga e curtura regionala de l’Educacion Nacionala despí lo 1992, explica : « Quora avètz doi lengas à disposicion, sigue durbètz li aurelhas, sigue li barratz. Pura seria daumatge de li barrar, non ? » En lo departiment de Gers dont travalha, son doi a-n-aquesto poast, emé 3.800 pichoi (sus 12.000) que recèvon una sensibilisacion à la lenga e la curtura occitani, em’un temps mejan d’una mièja ora per setmana. La demanda es doncas foarça granda. La fasa d’iniciacion tòca trés ò quatre classas, dont « lo lengatge vèn un vector d’ensenhament », segond l’institutor. Li son finda d’escòlas bilingüi coma à Plaisença-de-Gers, dont lu enfants de matèrno au CM2 seguísson, à part egala, un ensenhament en francés e en occitan. Aquesto exemple único si porria ben renforçar emé la dubertura d’una autra escòla bilingüa, à L’Isle-Jordan. Jòrge Nosella, de l’IEO de Gers, parla de mantenir un ritme sostengut e rapela que « la populacion de Gers es à 90% favorabla à l’occitan, e à 72% pensa qu’es gratificant. Li es una foarta demanda, notantament dai joves. »

En Provença, en lo País Canés, la municipalitat de Moans-Sartòu a inaugurat de paneus d’entrada de vila en provençau. Sus l’exemple de la Contea de Nissa qu’a mandat lo moviment emé lo concors de l’associacion nissarda « Sieu d’Aquí », la signalisacion bilingüa sembla èstre à progressar en Occitània tota.

INTERNACIONAL

1/ França

Dijòus passat, lo desplaçament de Nicolas Sarkòzi en País Basco, en l’encastre de la sieu campanha electorala, a reçauput un acuelh ostile. Vengut au rescòntre dei agricultors à-n-una ferma à Itxassou, lo president-candidat es estat reçauput dai militants independentistas bascos e de manifestants anti-LGV emé de bandaròtlas que denonçàvon lo projècte de linha à grana vitessa en País Basco. De rutadas an esclapat entra lu manifestants e li foarça de l’òrdre qu’an reagit à còup de gaz lacrimogènes e qu’an interpelat trés personas. Nicolas Sarkòzi s’es alora rendut à Baiòna, dont l’asperàvon de centenaus de personas, numerós policiers mas sobretota un gròs bolun, de siblets e de chabras. Lo president-candidat, qu’a deugut si refugiar en lo bar dau Palai en asperant l’arrivada dei renfoarç per l’evacuar da País Basco, a declarat que lu manifestants èron « una minoritat de pelandrons e de terroristas » e a finda acusat de militants dau PS, en ajonhent qu’èra « desolat que de militants de Francés Hollande s’assocíon emé d’independentistas ». Plus degun s’estona de la vulgaritat d’un president qu’a ja tratat un elector de « pauvre con » en lo 2008, manco dei sieu acusacions sensa pròva ensin que dau sieu mesprés per li lenga regionali vist que mescla independentisme e terrorisme.

2/ Euròpa

Lo 25 de febrier passat, à Bussoleno, en Piemont, s’es debanada una importanta manifestacion de mai de 50.000 oposants à la linha de granda vitessa Lion-Turin (lo TAV en italian). Li èra minga incident fins au retorn dei manifestants à l’estacion de tren de Turin dont s’èra recampat un important dispositiu de policiers qu’a cargat e bastonat toi lu viatjaires dei trens venent dau Vau-de-Susa. L’ataca a fach totplen de ferits. Aquesto projèct de LGV Lion-Turin es combatut da toi lu estatjants dei valadas occitani dau Piemont despí lo 1991 e la mobilisacion es à si desvolopar, maugrat li manòbra de l’estat italian coma l’ocupacion de la zòna de chantier da un contingent militari revengut d’Afganistan. Menaças, intimidacions, corrupcion d’elegits e de personal político e sindical, ocupacion policiera e militària de la region, expropriacions ilegali, arrestacions arbitrari, creacion d’una juridiccion d’excepcion per lo Vau-de-Susa, tali son li armas emplegadi da l’estat per rompre la mobilisacion dei Piemontés e Occitans dei valadas. Mas aquelu resíston mai foart e contúnhon la lucha. Da l’autre costat dei Aups, l’union sacrada dei pro-LGV, es à dire l’UMP, lo Partit Socialista e lo Front de Senèca, contunha de sostenir lo projèct de LGV Lion-Turin sota de pretèxtos falaciós, mas sobretot per repartir li manas dei crèdits europeus. Pura, se la part francesa abandonesse lo projèct, coma en País Basco, en Provença e à Bordeu, lu Italians non comenceríon manco lo chantier. Ensin, es embé la complicitat dei principals partits de la senèca francesa que si mena la repression en li valadas occitani dau Piemont.

3/ Monde

Au Brasiu, Raòni, lo cap de la tribú amerindiana Kayapo, conoissut per lo sieu engatjament per la lucha per la preservacion de la forest amazoniana, a donat l’alarma en avisant lo monde sus la situacion extrèma tocant l’invasion de territòris indigènes da d’intrús armats que li si son installats en tota ilegalitat, finda en s’atacant à d’Amerindians isolats. Despí esquasi vint ans, Raòni aspera lo decret presidencial que permete la demarcacion e la segurisacion d’aquesta zòna. Après aver solicitat l’arbitratge dei autoritats en seguida dei recents incidents ligats à l’intrusion dei bandas armadi sus lo sieu territòri, lu Kayapos an decidat d’establir un camp de 140 personas en la zòna envaïda per efectuar lo sieu pròpri travalh de segurisacion, per incitar lo govèrn brasilian de tenir lu sieus engatjaments e reconóisser lo territòri indian. Encuèi, Raòni e lo sieu pòble, que lúchon finda contra la construccion dau barratge de Belo Monte, solicíton una ajuda per finançar aquesto campament de resistança dei 140 gardas armats per assegurar la linha de demarcacion dau territòri kayapo. L’ONG americana Amazon Watch, Nicolas Hulot e l’associacion Planeta Amazone jónhon li sieu foarças per sostenir l’iniciativa de Raòni. Per ajudar lu Indians Kayapos à defendre lo sieu territòri, si pòu pagar directament à l’ONG Amazon Watch que recampa lu dons. Per mai d’informacion, tot es indicat en lo siti www.raoni.fr

ESPOART

Excelenta operacion de l’OGC Nissa en campionat, qu’es anat batre lu Girondins de Bordeu per 2-1. Es lo promier còup de la sason que Nissa ganha un match à l’exterior e encadena doi victòria de seguida. Lu doi goals nissarts èron marcats en promiera mièja-temps, em’un penaltí transformat da l’Argentin Monzon, e un but de Guié Guié à la 39-ena minuta. Degun auria imaginat un tau scenàrio vist que Nissa resta l'equipa plus marrida à l’exterior e que fins à aüra, lo Bordalés avíon plus perdut à maion despí dotze matchs. Lo Gim remonta à la setzena plaça dau classament, mas rèsta au meme nombre de ponchs que lo promier relegable Aiachu. Per si sauvar, lu Nissarts deuran confirmar la sieu sèria. S’aspèron de matchs dificils emé d’adversaris dirècts per lo manten : Nissa receuprà Nancí la setmana que ven pi juguerà à Sochaux, denant d’acuelhir Marselha. Lo mes de març es doncas crucial per la sobrevida dei aiglons en Liga 1.

METÈO

Si preve de pluèia per tota la setmana, levat lo dimècres que serà ensolelhat mas emé de nèblas. Lo bèu temps revendrà lo dissabta que vèn. Li temperaturas resteran establi, entra 10 e 14 grados la jornada, mas caleran cada nuèch fins à 3 ò 4 grados.

Comment on this post

Blog archives

We are social!

Recent posts