Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°24 - 26 de novembre dau 2012

Posted by Pantainfo : infos de l'emission d'actualitats setmanieras sus ràdio nissapantai.com on November 26 2012, 02:16am

PantaInfo n°24 - 26 de novembre dau 2012

PantaInfo, l’informacion setmaniera dau País Nissart e Alpenc

26 de novembre dau 2012

PAÍS NISSART E ALPENC

1/ Actualitat política

Diménegue passat, lo Govèrn Provisòri de la República Federala Occitana a organisat à Nissa en plaça Garibaldi una manifestacion de sosten au procediment d’independença de Catalonha. Lo 25 de novembre en efèct si debanava en Generalitat de Catalonha de votacions regionali anticipadi per afortir la presença dei independentistas au parlament catalan. Vequí un estrach registrat de l’eveniment [estrach dau registrament de l’eveniment de sosten à l’independença de Catalonha]

2/ Actualitat economica e sociala

Lo dimècres 21 de novembre passat la vila de Nissa organisèt, à la Tòrre Belanda, la remesa dei prèmis dei laureats de nissart, aquò en l’encastre dei Jornadas de la Transmission. Aquestu prèmis recompènson lu milhors escolans dei establiments dont lo nissart es ensenhat, ensin que lu candidats qu’an obtengut li milhori nòta ai pròvas orali e escrichi dau baccalaureat de nissart dau temps de la session 2012. Lu prèmis èron remés da Joan Marc Giaume, conselhier municipal delegat au patrimòni istoric, à l’arqueologia, à la lenga e cultura nissardi, representant dau deputat e cònsol Crestian Estrosi. Eron presents egalament Clara Lovisi, rector de l’Acadèmia de Nissa, ensin que lu actors que òbron per la conoissença e la transmission dau nissart, coma la Federacion dei Associacions dau Comtat de Nissa, l’associacion L’escòla de Belanda, e la Delegacion Patrimòni Istoric, Arqueologia, Lenga e Cultura Nissardi. Reportatge. [estrach dau registrament de l’eveniment de remesa dei prèmis]

3/ Actualitat curturala

Dissabta 24 de novembre passat, si debanèt à la Glèia Sant Martin Sant Augustin, en carriera de Sincaire à Nissa, la jornada d’omatge à Catarina Segurana, l’eroïna nissarda que s’illustrèt en caçant li tropas francesi e otomani, dau bastion Sincaire. La tradicionala messa annuala èra organisada en l’onor de l’eroïna, denant lo depaus de garba e li parlaïssas de Joan-Marc Giaume, representant dau cònsol de Nissa, e Benoît Kandel, promier adjonch au cònsol de Nissa e representant dau Conseu General. Reportatge. [estrach dau registrament de l’omatge à Catarina Segurana]

OCCITÀNIA

1/ Actualitat política

Dijòus passat per lo promier còup, la lenga occitana èra au centre dei debats dins lo Parlament Europeu d'Estraborg. L’intergrop sus li lengas minorisadi, format per d’eurodeputats de partits e de grops políticos divèrs, s’amassa cada còp que i a session dins lo Parlament Europèu per tractar dei afars qu’afècton li lengas e culturas minorisadi d’Euròpa. Segond l'eurodeputada Catherine Grèze, la tècola de la session èra de "far avançar la causa occitana à Brussèlas" e ajonhe que la lenga occitana es oficiala en Espanha, dont es parlada da quaucu miliers de personas, mas non l'es en França, dont li a l’immensa majoritat de la populacion occitana.

2/ Actualitat economica e sociala

La municipalitat de Sant Sulpici la Punta es estada una dei promieri dins lo país albigés a metre en plaça de paneus d’aglomeracion en lenga occitana. Es ver que maluroament n’a jamai mes sus la totalitat dei intradas de la vila. Metèt finda jamai de paneus en occitan per indicar li sortidas de vila. Pura, aquò èra un boan principi per recuperar e renfortir l'identitat occitana. Auria caugut contunhar sus d'aquesta via per balhar a Sant Sulpici la marca d’autenticitat que li manca encara. Per anar dins aqueu sens, au moment de la refeccion e reabilitacion de la bastida vièlha, la municipalitat auria poscut, quora si cambièt li placas portant lu noms dei carrieras, n’aprofichar per li metre en version bilingüa. Aquò non siguèt fach. Fa de temps, si constatava que lo paneu en occitan plantat sus la rota de Molatrincada èra estat levat au moment d’uni òbras, e jamai tornat mes en plaça. Lo paneu en occitan plaçat dins lo barri de La Punta avia finda desapareissut sensa que n'en saupessiam la rason. Ensin, pauc à pauc, la denominacion bilingüa de Sant Sulpici la Punta es a desaparéisser. An ja, mai d’un còup, atrach l’atencion dau cònsol sus d'aquesto fach. Fins aüra la desmarcha es demorada letra moarta. L’associacion ciutadana Lo Clusèl (lo sosterrenh amainatjat) rapèla que l’Educacion Nacionala a fach de Sant Sulpici un siti bilingüe d’ensenhament primari (emé seguida dins lo segondari). Se la municipalitat contunha de refudar l’emplec public de l’occitan, alora, dont lu joves escolans van poder perçaupre l’occitanitat de la ciutat ? Es daumatge e inacceptable que la municipalitat li prive dau sieu patrimòni lingüístico. En consequença, l’associacion Lo Clusèl demanda à la municipalitat de remplaçar lu paneus de l'intrada de vila que son estats destacats, de metre en plaça de paneus de sortida de vila e finda de metre la toponimia de la comuna en version bilingüa (noms dei rius, dei bòrias, dei carrieras e dei establiments comunals). Es ensin que Sant Sulpici la Punta, coma la vila vesina de La Vaur, per justícia e per lo bonur dei sieus estatjants, retroverà una brava part de la sieu autentica identitat.

3/ Actualitat curturala

Un còup de mai, per lo 2013, l’Institut d’Estudis Occitans d’Aude a fixat la realisacion dau calendari occitan à Joan-Loís Caparròs. Lo fotograf, que viu à La Novèla, a l’uèlh per sasir li bèstias, li flors, lu aubres, li pèiras, la vida… de la contrada. Ensin, lo sieu sens agut dei colors e dau lume lo mena a transformar en vertadier safari una sesilha per li vinhas. Per lo calendari noveu, a chausit de si laissar portar per la corsa dau temps, dei mes e dei sasons : mandarinas e oranges, becadets e becaruts, estorneus, gavians e gavinas, cavaliers, rosèla, parpalhòu, ironda d’estable, rugbí de platja, doçors, meu, mercat, amor en gàbia, bodegaires, vinhas… vi menaren dau 1er de genoier au 31 de decembre de l’annada 2013. Una pàgina d’entresenhas sus li associacions occitani e de dires e provèrbis sus lo nombre tretze complèton lo calendari.

INTERNACIONAL

1/ França

Un jornal dau nòrd de França si trufa d’Auvèrnhe. L’Agença Regionala de Desvolopament dei Territòris d’Auvèrnhe lançèt una campanha per atraire de salariats au país. Per ajudar li entrepresas à reclutar de perfius especialisats o particulars, mai que mai de salariats qualificats, l’agença prepaua una ajuda au lotjament que pòu arribar fins a 500 èuros per mes. Lo jornal dau nòrd de França, Daily Nord, a respondut à-n-aqueu respectable enjuèc dau país occitan, em'un article entitolat "Anetz pas en Auvèrnhe! Venètz puslèu dins lo Nòrd-Pas de Calais !". Lo jornal dau Nòrd òfre una lista d’arguments per non anar en Auvèrnhe mas en la sieu region. S’agisse d’una polémica aparentament umoristica, mas finda pron serioa perqué tòca lu prejutjats nacionals entra l’Auvèrnhe occitan e la França dau nòrd

2/ Euròpa

Eleccions en Catalonha. Diménegue lo 25 de novembre si debanèron li votacions regionali anticipadi en Catalonha en travèrs dei quali lo president de la Generalitat, Artur Mas, esperava una majoritat excepcionala apontelant la coalicion de centre-drech nacionalista « Convergença e Union ». Lo president catalan considèra aqueli votacions coma « li mai decisivi de l’istòria » de Catalonha, de que lo sentiment independentista va créissent. Adreiçadi à un còrs electoral de 5,4 milions de personas, li votacions catalani an vist una progression de 45% dei demandas de vòt per correspondença per rapoart ai votacions passadi de novembre dau 2010. Aquel escrutin, qu’a per tècola d’afortir lo govèrn autonome catalan sus d’una basa aüra independentista, es à l’origina d’una mobilisacion jornalistica excepcionala. Ensin, li èron mai d’un centenau de jornalistas estrangiers que si sinhalèron au Parlament de Catalonha per difusar en dirèct li resultas. D’unu si son mostrats solidaris emé lu catalans, coma un correspondent de la Ràdio Nacionala Chèca qu’afirmèt que « lu chècos sàbon qu’exista una nacion dintre Espanha ». Un representant de Ràdio Canada, en empàtia emé Catalonha, cresia perçaupre una « miopia » de Madrid sus l’actualitat geopolítica. A l’ora dont la redaccion d’aquesto PantaInfo èra à s’acabar, lo taus de participacion èra à 69,58% dei vots, de que mai de 72% en favor de l’ensems dei partits independentistas. Doi ans fa recampàvon un pauc mens de 70%. Lo paradòxo es que lo principal partit independentista, lo centre drech CiU d’Artur Mas a perdut esquasi 8% dei votz, es à dire 12 sèdis au Parlament. L’ERC, la senèca independentista, a doblat lo sieu escòre e doncas lo nombre de representants à l’assemblada. Lu anti-independentistas madrilencs dau PP (Partit Populari) si son estabilisats à 13,04% dei votz, en ganhant meme un sèti, alora que lu federalistas dau Partit Socialista Catalan son lu grans perdents vist qu’an perdut 8 sètis de mens que doi ans fa. Lu independentistas toi ensems recàmpon 96 sètis au Parlament, alora que recampàvon 89 fins à aüra.

3/ Monde

Despí lo 2009, pas mens de 75 tibetencs, monges o pas, si son balhats la moart embé lo fuèc dins la region ocupada dai chinés. Encuèi, son per la màger part de joves entra 15 e 30 ans, coma Dorji (15), Samdrup (16) o encara Tamding Tso (23), tota jove maire. Dins la sieu darriera letra, Jamphel Yeshi, 27 ans, explica que si vau « immolar per que lo monde audisse parlar dau mau dei tibetenc. Vívon coma se siguesse•una flama que bolega emé l’envuèia dau vent ». Un coratge e una decision tarrible per provar de sauvar un pòble e una civilisacion. Aquesti gents si sacrifícon per la sieu cultura e la sieu reconoissença. Voàlon desvelhar l’internacionau au prètz de la sieu vida. Crídon lo sieu malur. Lu quists mèdias internacionaus que pàrlon a perpau d’aquelu eveniments, lu presènton normalament coma una lucha religioa. Pura, lo suicidi es abanit per la religion bodista. Tibet es un país susvelhat da l’armada chinesa. Li comunicacions (Internet, telefòn e patin e confin) son sus escota, e aquelu qu’apèlon la ciutat de Daram Sala (dont viu lo Dalai-Lama en exili) au Nòrd d’Índia, son condamnats à la preson, díon lu tibetenc exilats en Índia, que son normalament sensa novèlas dei sieu familhas e aprènon 3 o 4 jorns après l’immolacion de tau amic o tau membre de la familha. Encuèi, li immolacions contúnhon de s’espandir...

ESPOART

Dissabta passat, à la 14a jornada dau campionat de Liga 1, l’OGC Nissa es anat batre lo FC Sochaux gràcia à un goal marcat sus penaltí da l’inevitable Dario Cvitanic. Mentre tot lo rescòntre, lo Gim a largament dominat, en si procurant de numeroï escadenças d’agravar l’escòre en segond periòdo. Mancava solament de realisme, mas lu aiglons an raportat lu tres ponchs necessaris fàcia à una chorma franc-comtesa invisibla. A costat de l’indispensable Dario Cvitanic qu’es vengut un vertadier volp dei surfaça que lo Gim avia plus augut despí de temps, lo jugaire nissart qu’a lo mai impressionat mentre la partida es Timotea Kolodzieczak qu’a prepauat un juèc pròpi excellent. Après quatre matchs sensa derota de que doi victòrias de seguida, l’OGC Nissa remonta à la desena plaça dau classament. De boana augura per la seguida dau campionat, e sobretot per la jornada que ven e que verrà Nissa reçaupre lo Qatar Sant German de Zlatan Ibrahimovic.

METÈO

Un temps pluviós es à prevèire per esquasi tota la setmana fins à diménegue. Li temperaturas s’isseran à 13 e 14 grados en jornada, e 5 de nuèch.

Comment on this post

Blog archives

We are social!

Recent posts