PantaInfo n°5 - 20 de febrier dau 2012

PantaInfo, l’informacion setmaniera dau País Nissart e Alpenc

20 de febrier dau 2012

PAíS NISSART E ALPENC

1/ Actualitat política e ecologica :

Dimècres passat s’es tenguda à l’ostalaria Boscòlo de Nissa la recampada de concertacion sus dau tròç Nissa-Menton de la Linha à Granda Vitessa. Mentre aquesto rescòntre, doi camps si confrontàvon : lu promotors dau projèct e li associacions que s’opàuon à-n-eu. Lu representants d’aqueli an pilhat la paraula per contestar lo fons dau projèct ensin que la concertacion que considèron au milhor insufisenta, au pèjor trucada. Crestian Estrosi a afirmat tornamai que « per lo sieu desvolopament economic e per lu emplecs », Nissa si dèu d’èstre marcada en l’aranhada ferrada europea à granda vitessa. Segond lu sieus mots, « Nissa, Tolon e Marselha an da besonh de si raprochar. » Tocant lo tròç Nissa-Menton, a plaidejat per que « lo procediment non siguesse interomput e que si posquesse religar Genòva despí la Baia-dei-Àngels en una ora e quart » contra trés oras actualament. Aquò son d’arguments repilhats dau promier ajonch de Gènova, Paolo Pissarello, vengut à Nissa per « testimoniar d’interés » de la sieu vila ligura per aquesto projèct. Lu prepaus d’aquestu elegits son estats aplaudits da una part de l’assitança, notantament d’entreprenaires. Ma finda esclissits da una autra part dau público que portava d’escuts « Non à la LGV. » En lo fra temps, li associacions ostili au projèct si son recampadi en colectiu à la sala dau Zenit à Tolon per demandar à toi lu candidats de s’engatjar sus d'un « moratòri ». N’an aprofichat per ramentar li sieu arguments que son : lo cost exorbitant dau projèct per un investissament pauc eficace (5.106 euros per estatjant per un ganh de temps de transpoart que non lo justifica), l’absença d’estudi presentat au público dau temps de la concertacion e sobretot li tròup grandi consequenças sus l’environament e l’encastre de vida – destruccion de païsatges naturals e de zònas rurali e urbani, exposicion d’aquesti zònas à-n-una polucion sonora e visuala, menaça sus la toalha freàtica ensin que sus li zònas e espeças protegidi coma la Plana dei Mòros).

2/ Actualitat economica :

A l’escadença dau subjèct de la LGV que passeria per lo País Nissart, si podèm pauar de questions sus de l’eficacitat dau TGV. Dins li campanhas publicitari, lo tren à granda vitessa si presenta coma lo meso de transpoart mai segur au monde, emé de recòrdis de vitessa sus ralh embé 320 qm/o de mejana, sus de linhas especifiqui. En soma, un dei florons de l’Estat francés, embé lo Minitel, la fusada Ariana, lo Concòrdia, lo nuclear civil, Airbús, lo Rafale ò Zinedine Zidane. Rèsta un problema important : coma toi lu autres florons francés, lo TGV coasta car e la sieu rentabilitat « decrèisse à granda vitessa », segond Barbara Dalibard, la directritz generala de SNCF Viatge. Ensin, 30% dei linhas de TGV non son rentabli actualament. En lo 2010, lo grop avia un dèute de 8,6 miliards d’euros e segond li chifras oficiali, manca cada an 1,5 miliard d’euros per assegurar una mantenença corrècta de l’aranhada francesa. Significa clarament que lo TGV non es vengut la locomotiva economica esperada. Emé la novela AGV (Automotritz Granda Vitessa) d’Alstòm, prevista per agantar 360 qm/o, lo problema es à s’agravar : passant de 320 à 350 qm/o, l’usura si farà mai vito e caurà cambiar lu ralhs mai sovent. Après aver longtemps escomés sus lo TGV, la SNCF deurà alentir la cadença e s’ocupar dei sieu linhas segondari. Ironicament, la soleta virtú economica que si pòu acordar au tren supersònico, es d’aver fach diminuar lo prètz dei bilhets d’avion…

3/ Actualitat ecologica e sociala :

La question dau gaz de sistre, que semblava acabada, ressurgisse despí quauque temps. En fach, son estats abrogats solament trés permés de dubertura de mina. N’en rèsta 61 ensin que 80 dorsiers en instruccion, de que un à Brinhòlas, en Provença orientala. Lo permés de Brinhòlas aurà de consequenças sus toti li toalhas freàtiqui de Provença e de la Contea. Davant d’aqueu perilh qu’es totjorn tant present, una manifestacion de granda amplessa, que recamperà d’elegits e de ciutadans, es prevista divèndres que vèn, lo 24 de febrier ai 7 oras de sera en la Sala dei Fèstas de La Briga, en li valadas d’en Ròia. S’organiserà finda una projeccion e un debat sus l’eslogan : « Non au gaz de sistre, ni en Ròia, ni alhors ».

4/ Actualitat curturala :

Dimècres passat s’es tenguda l’inauguracion dau carre de Carneval Independent, realisat à Nissa-Ariana e Sant-Andreu de Ròca. Lo tema d’aquesta annada es « la política linguística de França », simbolisada da una zànzara escrachada sus la lenga ai colors occitans d’un babi qu’es per l’avalar. Es en referença à la manifestacion per la lenga occitana, que si debanerà à Tolosa lo 31 de març que vèn, e à la quala participerà lo Centre Curtural Occitan - País Nissart e Alpenc.

OCCITÀNIA

Après una promiera recampada à Barbasta lo 10 de decembre de l’an passat, una novela recampada dau « Manifest Occitanista » es prevista à Tolosa dissabta lo 25 de febrier ai 3 oras dau predinar, en sala dau Poant dei Damiselas. L’idea vèn de doi conselhers regionals, Dàvid Grosclaude e Guilhèm Latrubesse, que prepàuon que lu movaments, associacions o personalitats dau monde curturau e político d’Occitània si fedèron, tot en mantenent l’autonomia de cadun. La promiera tècola es aquela d’una presença en li eleccions municipali dau 2014, per aver de numerós conselhers municipals occitanistas, que porríon notantament intervenir dins li accions municipali en favor de la lenga e de la curtura occitani.

Lo jornal « La Setmana » es estada victime de discriminacion anti-occitana. En efèct, lo projèct de creacion d'un siti d'informacion dau jornal sus d’Interret a pas drech à l'ajuda que dona l'Estat à la pressa en linha redigida en francés. Una decision de la comission paritària de la pressa e dei agenças de pressa vertadierament discriminatòria : díon que d'escriure en occitan es pas far d'informacion que permete d'esclarar lu ciutadans dins lo sieu jutjament ! Un còup de mai, l'estat francés vòu estrangolar la lenga occitana. Mas, uroament, lu Conseus Regionaus d'Aquitània e Miègjorn-Pireneus van ajudar lo projèct de « La Setmana ». La redaccion dona apontament lo 1er de març per la dubertura dau jornal numeric en occitan.

INTERNACIONAL

1/ França

Lo deputat socialista dau departiment Aisne Reinat Dosière, especialisat en la susvelhança dau traïn de vida de l’Estat, vèn de publicar ai Edicions dau Seuil lo libre « L’argent de l’Estat », en lo quau espingla notantament lo som de lançament de l’Union per la Mediterranea, que s’es tengut à París lo 13 de julhet dau 2008, per un cost exorbitant. Un an mai tardi, lo rapoart de la cort dei Còmptes drissa un bilanç d’aquesto som e la sieu marrida repercussion sus li finanças públiqui. « Aquesta conferença internacionala, qu’a durat trés oras, resterà en l’istòria coma la mai cara : 58.000 euros la minuta », nota lo deputat. En causa, la causida dau luèc (lo Grand Palais, pròchi de l’Elysée) e lu prolongs d’organisacion tròup corts. Ensin, en un temps foarça cort, cauguèt organisar en un immense bastiment vuège de salas per lu trateniments bilaterals, lu 1.900 jornalistas acreditats, lu 32 interpretas, un bureu per Nicolas Sarkozy, equipat d’una docha ultramoderna qu’a manco servit. En mai d’aquò, l’installacion de la soleta climatisacion a costat mai de 650.000 euros. Lo sera, un dinar foguèt organisat au Pichin Palai dont siguèron convidadi 200 personas. Lo cost dau solet dinar, s’aussèt à 310 euros per persona. En comptant l’arantjament dau palai (emé l’ajontament d’un jardin) e lo prètz de l’afit dau site (340.000 euros), arrivam à 7.000 euros per convidat.

2/ Euròpa

En Letonia, lo referendum sus la possibilitat d’impauar lo russo coma segonda lenga oficiala dau país es estat massivament regitat dai electors letons que si son exprimats à mai de 74 % contra d’aquela iniciativa. Lu partisans dau projèct èron essencialament d’ancians colons russos de l’epòca soviética que represènton encara un tèrço dei doi milions d’estatjants que còmpte Letonia. Signe revelator de l’atacament dei Letons per aquesto referendum : lo taus de participation foarça aut qu’a agantat esquasi 70% de l’ensems dau país. La mai granda mobilisacion es estada constatada à Riga, la capitala, ensin qu’en li vilas de Vidzeme e Kurzeme, bastions tradicionals de l’identitat letòna. A l’escadença de la campanha, lu opositors dau projèct an rapelat que de miliers de Letons èron estats mandats dai Soviéticos en lu camps en Sibéria e que la lenga russa èra estada impauada en la vida pública quora lo país èra sota dominacion russo-soviética. La consultacion nacionala es estada organisada en seguida d’una crida dau moviment pro-russo « Lenga Natala », firmada da 10% dei electors. Letonia a tornat pilhar la sieu independença de Mòscou en la 1991, à la sortida de cinquanta ans de dominacion soviética, e a rajonch en lo 2004 l’Union Europea e l’OTAN. Après l’independença, lu imigrants russos que s’èron installats en lo país an augut la possibilitat d’obtenir la nacionalitat letona, à la soleta condicion de parlar e mestretjar la lenga, cen qu’elu non voàlon capir. La volontat d’impauar lo russo coma segonda lenga oficiala marca d’un biais evident la mancança de volontat dei Russos de s’integrar, coma lo moastra l’actituda dau partit d’oposicion pro-russo « Centre de l’Armonia », qu’a firmat un acòrdi de cooperacion embé lo partit Russia Unida de Vladimir Potin.

3/ Monde

Despí l’automne dau 2010, una vertadiera revolucion democràtica e anticapitalista si debana en Ìslandia : un pòble que caça la drecha au poder en assediant pacificament lo palai presidenciau, que desbanca dei sieu responsabilitats la senèca liberala de remplaçament perqu’èra per menar la mema política que la drecha, un referendum impauat dau pòble per determinar se calia remborsar ò non li bancas de que l’irresponsabilitat a cabussat lo país dins la crisi, una victòria à 93% per lo non-remborsament dei bancas, una nacionalisacion dei bancas e, fins finala lo milhor dau tot : l’eleccion d’una assemblada constituanta lo 27 de novembre dau 2010, qu’a en carga d’escriure li noveli lèis fondamentali que tradurran la colèra dau pòble contra lo capitalisme, li sieu asperacions à una autra societat. Ìslandia a ensin modificat la sieu constitucion qu’es jamai estada verament redigida pisqu’à la proclamacion de l’independença en lo 1944, si son contentats de recopiar en li grandi regas la constitucion de Danmarc, país de que dependia Ìslandia, en remplaçant simplament lo mot « rèi » da aqueu de « president de la República ». La redaccion de la novela constitucion es estada confidada à-n-una assemblada de 25 constituants elegits à partir da la candidatura de 522 ciutadani e ciutadans. Aquesta candidatura èra duberta en toi, levats lu elegits nacionals, e à la condicion d’aver 18 ans e d’èstre sostengut per 30 personas au manco. Lu travalhs an començat en febrier dau 2011 e lo projèct es estat prepauat lo 1er d’octòbre. Ìslandia, pichin país de 320.000 estatjants, dona una bèla leiçon de democràcia ai grands estats coma França, quora si renembra que la reforma constitucionala dau 2008 es estada completament redigida da l’Elysée, que lu parlementaris l’an adoptat après de pressions intolerabli dau cap de l’Estat…

ESPOART

Desperants ! Es lo solet qualificatiu que porriavam donar à l’equipa de l’OGC Nissa tant li sieu prestacions de dissabta passat à Dijon son estadi lamentabli. Lu aiglons desplumats an encaissat lo promier but à la fins de la promiera mièja-temps, alora que semblàvon ben en plaça en lo rescòntre. A minga moment son estat capables de revenir à la marca. Mancança de talent ò de volontat ? Tantotun, tra lu suportaires dei rotge-e-negres si supaua mai que mai que lo paradòxo nissart, qu’es de ben jugar contra lu grands e faire de non-matchs contra lu pichins, tròva la sieu explica en la motivacion dei jugaires : en lu matchs mediatisats davant lu grands clubs, lu aiglons tèmpton de ben si mostrar per si metre en valor davant lu recrutors potencials. Toi sàbon que Nissa es un trempolin per l’avenir professional dei jugaires. Es la trista realitat dau fotbòl modèrne. Em’un tala mentalitat, e au regard dau calendari de l’OGC Nissa, la perspectiva dau manten en L1 vèn mai que mai improbabla. La futura frusta que si pilherà lo Gim au match que vèn contra Caen, confirmerà sensa dubi la motivacion dei dirigents dau club per l’an que ven : puar dins lo classament en calant d’una division…

A costat rèsta la question dau Grand Estadi, un projèct faraonic remés en causa da l’avenir de l’OGC Nissa que promete d’èstre foarça mediòcre. Per lu oposants au projèct, aquesto futur estadi non serà adaptat ni au fotbòl, ni ai suportaires, e lo partenariat público-privat aproficha solament ai entrapresas : en efèct, li surfaças comerciali seran tripladi e minga plaça serà laissada ai associacions de suportaires. Òira lo fach qu’aquesto projèct aprofiche au grope Vinci, un sosten essencial à Nicolas Sarkozy, lo sieu cost es enòrme e disproporcionat : 247 milions d’euròs per 35.000 plaças, alors que lo noveu ver estadi de Turin n’en coasta 120 milions per 41.000 plaças. Per cas de relegacion en L2, lo noveu estadi vendrà roïnós per lu contribuables. Enfin, darriera granda tara : l’estadi aurà minga plaça per si parquejar, levat li quauqui plaças per lu VIP e lu divèrs emplegats.

METÈO

La vaga de frèia es ben acabada ! La pluèia es à si prevèire per diluns mas lo soleu brilherà tota lo rèsta de la setmana emé de temperaturas de 11 à 17 grados, lo maximum serà agantat divèndres que vèn. Pura li temperaturas resteran frèï la nuèch, entra un e sièis grados.