Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°9 - 19 de març dau 2012

Posted by Pantainfo : infos de l'emission d'actualitats setmanieras sus ràdio nissapantai.com on March 19 2012, 10:48am

PantaInfo n°9 - 19 de març dau 2012

PantaInfo, l’informacion setmaniera dau País Nissart e Alpenc

19 de març dau 2012

PAíS NISSART E ALPENC

1/ Actualitat política :

Lo candidat dau Partit « Debout la République » per li eleccions legislativi Joan Paul Belhadi non s’interessa ai problemas dei Nissarts. En efèct, la sieu venguda à Nissa dau dimècres passat avia coma soleta tècola d’anar à la pesca ai votz. Lo candidat sobeiranista francés espèra agantar 2 à 3% dei votz tra lu ancians gaulistas, lu pròchis dau FN et lu Democratas Crestians. Lo sieu programa es : l’imigracion e la lèi penitenciària sus la delinquença e la seguretat. Manco mot sus dei problemas que tòcon directament lu Nissarts : la corrupcion, li magolhas, lu projècts faraonics e ineficaces que son per endeutar lu Nissarts sus trés generacions, lo betonatge de la Plana de Var, la confiscacion de la democracia comunala da Nissa Metropòla e patin e cofin…

2/ Actualitat economica e sociala :

Lo jornal Nissa Matin a publicat, en lo sieu tiratge dau dijòus passat, un article sus la Reünion d’Informacion Pública tocant lo Grand Arenàs. Sabèm toi qu’aquesto quotidian a la particularitat de publicar cada jorn un molon d’anonças imobilieri, estant que l’imobilier e lo torisme constitúon lu solets projècts economics que prepaua l’estat francés au País Nissart. Pura, se liegèm ben entra li regas, si pauc vèire que per mantenir una certana aparença de democracia, lo Directòri local organisa una parodia de concertacion vist que la famoa Reünion d’Informacion Pública per lo Grand Arenàs, que fa parta integranta dau projèct megalomane de l’OIN Plana de Var, s’es debanada ai oras mentre que la màger part dei ciutadans actius travalha. A la recampada si retròvon doncas essencialament lu partenaris professionals partisans de la política especulativa fonciera e imobiliera de Crestian Estròsi. Quora regarjam li maquetas ò li sieu simulacions gràfiqui, si remarca que lu urbanistas e arquitècts an pas totplen cambiat despí 30 ans vist que si son arrestats ai concept dei « Vilas Noveli » de la fin dei annadas setanta de que si conoisse lo triste bilanç encuèi. Que que sigue lo projèct, si retròva totjorn lo meme binòme Imòble de Burèu que si soana en lengatge modèrne Centre d’Afaire, ensin que bótegas e ostalaria-restauracion, dau Formula 1 au 4 estelas, de la sandoicheria au restaurant oriental de grand luxo, coma à La Defensa à París. A costat ajonheran quaucu bastiments d’abitacion : un per li familhas dei quadres superiors, e un per li fremas de mainatge e li noriças d’aqueli memi familhas. Tocant lo Nissa Stadium, es vengut clar que lo fotbòl èra solament un pretèxto à la realisacion d’un autre programa reservat ai franquisats dei grands grops. Si mantèn lo transferiment dau MIN enclavat à La Gauda, sus d’un terrenh qu’èra un dei florons de la recerca e de l’ensenhament agricòl dau país noastre, alora que toi pàrlon de diminuar lu transpoarts per camion, que sigue tant per motius ecologics e sanitaris, que per de questions mai pragmàtiqui de costs de petròli que van solament augmentar à l’avenir. Si demanda per que rason lu poders en plaça mantènon aquelu projècts estupides. La respoasta es trovada : per acuelhir la futura linha à granda vitessa qu’es pura violentament criticada en Itàlia e que li es plus venguda d’actualitat vist que la segonda linha Nissa-Vintimigla non es ni prevista, ni adaptada à la granda vitessa. Mas per justificar dau sieu projèct foal, Estròsi es lèst à faire realisar emé l’argent dei contribuables una linha de TGV qu’aneria de Sant-Ròc à Sant Laurenç de Var. En conclusion, es pas emé d’esquemas d’ordonament dau passat que si bastisserà un avenir per Nissa e lo País Nissart.

OCCITÀNIA

La Coordinacion « Per la lenga occitana » apèla à manifestar à Tolosa lo 31 de març dau 2012, que serà una granda jornada per toti li lengas regionali que voàlon una lèi. Arsacians, Bretons, Bascos, Còrsos e Catalans organiseran una granda manifestacion en la sieu region lo meme jorn. A-n-aquesta escadença, la Coordinacion a publicat sus Vimeo e Youtube un apèl vidèo da vèire absoludament.

La botega montpelherenca Macarèl s’engatja per l’eveniment « Anèm Oc ! per la lenga occitana », en prepauant à-n-un prètz reduch la sieu casqueta ai colors de la manifestacion. Lu tarifs van de 30 euros TTC per una comanda de dètz pèças, à 175 euros per un centenau d’unitats.

Lo pre-programa de la jornada dau 31 de març à Tolosa es ja establit. Aquò comença per lo recampament en Plaça de l’Euròpa, luèc de partença de la manifestacion. A comptar de 10 oras e mièja, totjorn en Plaça de l’Euròpa, si debanerà la dubertura dau vilatge occitan emé de bancs associatius, de manjuca e de produchs dau terraire, de tendas d’acuèlh e d’informacion e un pontin d’animacion per li anonças e presas de paraula. Ai doi oras, mesa en plaça dau cortègi e partença dau passa-carrieras. L’initerari dau cortègi partirà da la plaça de l’Euròpa fins en Plaça dau Capitòli, en passant per diferenti carrieras, indicadi sus lo programa de la jornada. Enfin la Coordinacion pilherà la paraula e la manifestacion s’acaberà à sièis oras dau predinar. Per mai d’entresenhas si pòu escriure à l’adreiça coordinacion.perlengaoccitana@gmail.com, a telefonar ai numèros 04-42-59-43-96 ò 06-77-49 37-78.

Après la manifestacion de Tolosa si debanerà, de sièis oras dau predinar fins à mièjanuèch, un concèrt dei grops Nadau e Lo Còr de la Plana. Lu participants à la manifestacion seran toi convidats. Per mai d’informacion si pòu escriure à l’adreiça acuelh@ostaldoccitania.net ò sonar au 05-61-22-13-31. Non denembrar finda defirmar la crida en linha per la lenga occitana sus anemoc.org

Tolosa, en l’encastre dei eleccions presidenciali, Francés Vairon, s’es demarcat dei autres candidats jacobins sus lo tema dei lengas regionali. En efèct, lo 10 de març passat, à la tribuna dau sieu rescòntre à Tolosa, lo candidat dau Modem s’es exprimat en biarnés, la sieu lenga mairala de que es fièr, en dient : « Qu’ei fenit lo temps de la vergonha e que comença lo temps de la fiertat ! » Francés Bayrou a ajonch que « siam Occitans e Bearnés, e Bigordans, e Catalans, e Bretons, e Bascos » e « qu’avèm l’intencion de contunhar à parlar la lenga noastra. Es la noastra lenga e avèm finda à la transmetre, à la balhar ai dròlles que son d’aquí ! « Ô mon pais, Tolosa ! » coma cantava Nogaro ! » Aquesto discors cambia totplen d’aquelu dei Sarkozy, Le Pen e Melenchon.

INTERNACIONAL

1/ França :

Lo jornal satírico « Le Canard Enchaîné » revèla en la sieu publicacion dau 14 de març passat un novèl afaire : aqueu dei bus Hallal de Sarkòzi à Villepinte. Lo diménegue 11 de març, trés autobús, afretats dau Partit UMP de Nicolas Sarkozy, son partits da la poarta de Montreuil, en direccion de Villepinte dont si devia tenir lo discors dau president candidat. Au board dau promier bus li èron solament d’òmes. En lo segond avíon prés plaça solament de fremas, portant de mandios islàmicos. Lo tèrço rotlava sensa degun à l’interior… En la sala, son numeroï à portar lo folard tradicional e à aplaudir. La màger part d’entra eli vèn da la banlega de Seine Saint-Denis. Despí quaucu jorns, cèrtus responsables religiós musulmans encoràtjon lu sieus fidèls à votar per lo president Sarkozy. Per tractos, messatges telefònicos ò electrònicos, un imam de Montreil dona ai « fraires e sòrres » de confession musulmana « dètz boani rasons de pas votar Francés Hollande ». Tra aqueli rasons si liège que lo candidat socialista « vòu legalisar lo maridatge omosexual, aplicar la lèi dau 1905 en la Constitucion per afogar la religion, es franc-maçon e prosionista ». Si liège finda que Francés Hollande seria « contra l’abatiment ritual e la circoncision » e que lo PS vorria « forabandir ai noriças de portar lo folard, meme à maion ».

Bretanha : la revista dau Conseu General numerotat 56 per lu Francés e presidat da Françés Goulard de l’UMP, es entierament bilingüa breton-francés. Es bessai lo principi d’una pichina revolucion bretona. Perqué fins à aüra, notantament en Occitània, a totjorn semblat que lu elegits emplègon l’occitan simplament per far plaser ai militants. Fan doncas de clientelisme. Mas en defoara d’aquò, li serà minga siti de partit político qu’empleguerà l’occitan levat aqueu que poarta lo mot « Occitan » sus lo sieu nom ! L’objectiu es ben de far viure la lenga, la si vèire practicar. Quora veirèm lu elegits d’Occitània pilhar la mema iniciativa que François Goulard en Bretanha ?

2/ Euròpa

Lo conseu dei ministres dau govèrn italian a ratificat la Carta Europèa dei Lengas Regionali e Minoritari, un instrument dau Conseu de l’Euròpa per la proteccion dei lengas autoctòni minorisadi dau continent europeu. La ratificacion s’es facha per dotze lengas : lo catalan, l’occitan, l’albanés, l’alamand, lo grèco, l’eslovène, lo croate, lo francés, lo franco-provençau, lo friolenc, lo ladin e lo sardo. L’executiu italian a precisat qu’èra prevista « la possibilitat d’ensenhament dei lengas en li escòlas, d’usatge en li circonscripcions judiciari e de difusion de programas curturals tra lu principals mesos de comunicacion. Pura, l’estat italian non avia ratificat la Carta per lo piemontés maugrat li annadas de combats dei Piemontés per faire reconóisser la sieu lenga coma lenga oficiala dau Piemont. L’organisacion Gioventura Piemontèisa a acusat Ròma de voler aplicar l’eutanàsia au pòble piemontés. Lo Tribunal Constitucional italian considera que lo piemontés es un dialècte e doncas non si pòu vèire acordar una proteccion similària à-n-aquela dei autri lengas protegidi da la Carta. Pura, d’estudis linguísticos seriós moàstron ben que lo piemontés es una lenga vertadiera. La decision dei jutges dau Tribunal Constitucional es segurament motivada da de consideracions polítiqui.

3/ Monde

Despí lo 17 de genoier dau 2012, Malí e Azawad tómbon en una vertadiera guèrra. Lu succés militaris dau MNLA (lo Movament Nacional de Liberacion d’Asaoad) an manifestament sorprés li autoritats de Bamaco, qu’an finit per reconóisser li defaliments de l’armada nacionala. Per afrontar lo MNLA, lo govèrn malian utilisa de milícias tribali sostengudi da de mercenaris, notantament europeus. Lo poder moastra à l’escadença d’aquestu eveniments una certana pèrdita de contraròtle, que s’es clarament manifestada en la sieu incapacitat de protegir lu civils toaregs e maures à Bamaco, en la capitala meme. De membres d’aquesta comunitat an vist li sieu maions e bens saquejats mentre de manifestacions de xenofobia qu’èron da prevèire dai autoritats. En si mostrant incapable de protegiar de familhas contra de manifestants istéricos, l’estat malian a perdut tota la sieu credibilitat.

En lo fra temps, lo dijòus 15 de març passat, de violents combats an opauat lu partisans dau MNLA à la milícia militària maliana en la caserna de Sodere. Son aqueli memi milícias qu’an semenat la terror en un molon de campaments e vilatges d’Azaoad estu darriers jorns, dont d’exaccions son estadi comesi contra la populacion civila. Lu combats si son acabats emé la derota dei milícias governementali qu’an perdut 15 sordats plus un presonier. Dau sieu costat, li pèrditas dau MNLA son d’un solet moart e un ferit.

ESPOART

Diménegue passat, en mach de retardi de la 28-ena jornada dau campionat de Liga 1, l’OGC Nissa a perdut à Sochaux, qu’èra darrier dau campionat e la mai marrida equipa à maion. Maugrat una dominacion nissarda en promier periòdo, Nissa s’es facha sorprendre pròpi denant la mièja-temps. En segond periòdo, Sochaux a agravat l’escòre e s’es mostrat foarça realista davant d’aiglons totalament ineficaces, coma à l’acostumada, à l’imatge de Kevin Anin qu’a mancat toi lu sieus contraròtles. Au classament, l’OGC Nissa es en posicion de relegable, à doi ponchs de Caen qu’es dètz-e-seten.

METÈO

Lo temps serà neblós per tota la setmana em’un pauc de soleu. Li temperaturas resteran establi, à 18 grados la jornada, de 7 à 10 grados la nuèch.

Comment on this post

Blog archives

We are social!

Recent posts