Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°26 - 16 de genoier dau 2013

Posted by Pantainfo : infos de l'emission d'actualitats setmanieras sus ràdio nissapantai.com on January 16 2013, 23:53pm

PantaInfo n°26 - 16 de genoier dau 2013

PantaInfo, l’informacion setmaniera dau País Nissart e Alpenc

16 de genoier dau 2013

La redaccion dau PantaInfo duèrbe aquesta emission en v’augurant en toi un boan cap d’An 2013. Aüra es la 26a difusion d’aquesta emission d’informacion setmaniera que festetjerà lo 23 de genoier que ven la promiera annada d’existença. 25 edicions son estadi difusidi l’an passat. Aquest an promete d’èstre encara mai productiu, per lo mai grand bonur dei auditors de la ràdio Nissa Pantai qu’escóton la noastra crònica d’actualitat. N’en aprofiechi justament per saludar toi lu auditors que n’escóton e qu’escóton en general la ràdio Nissa Pantai.

PAÍS NISSART E ALPENC

1/ Actualitat política

Despí dissabta lo 5 de genoier passat an començat li campanhas electorali per li votacions presidenciali de la República de Nissa. Dissabta passat en efèct, un eveniment oficial venia clausurar la rampelada ai candidaturas per aqueli votacions. Tres candidats si son oficialament presentats (Eric Bougy, Cristòu Daurore e Jonatan Santilli) e an presentat la sieu profession de fés. Vequí un extrach registrat de l’eveniment. [Extrach àudio de l’eveniment]. La campanha electorala durerà fins au 2 de mai, data dau principi dei-dichi votacions que si faran per Interret mentre tot lo periòdo de mai à la mejana de setembre.

Lo tractat de Turin que liga Nissa à França es abrogat ! Lo 25 de decembre passat, lo Secretariat de l’ONU refudèt de registrar lo tractat d’anexion de Savòia. Informacion confirmada dau Govèrn francés. Esquasi tres ans fa, un document de l’ONU indicava qu’aquesto tractat non èra estat registrat dins l’organisme. Quaucu mes mai tardi, lo govèrn francés anoncèt la sieu intencion de presentar aquesto tractat à l’ONU per fin de registrament. Lo govèrn francés pretende que l’ONU auria refudat de registrar aquesto tractat sota pretèxto qu’èra signat denant lo 1945, e avança que lo tractat non es abrogat perqu’es estat notificat, dins lu delais, per « nota verbala » ai autoritats italiani. Pura, aquò non a empachat París de presentar aquesto tractat d’anexion de Nissa e Savòia per registrament à l’ONU, qu’a refudat de lo faire perqu’èra definitivament abrogat. L’independença de l’ancian Comtat de Nissa seria doncas per ben leu…

2/ Actualitat curturala

Lo mes de genoier promete d’èstre ric en eveniments curturals, notantament en l’encastre dau Centre Cultural Occitan – País Nissart e Alpenc, qu’a elegit en decembre passat lo sieu noveu president, Jonatan Santilli, que pilha la succession de Laurenç Revest qu’a demissionat. L’associacion a finda adoptat un tot noveu lògo que presentèt oficialament au jornal Nissa Matin, à l’escadença de la comercialisacion dau calendari nissart 2013. Per aquesto mes, lo Centre Cultural Occitan organiserà doi eveniments majors : la dictada occitana lo 26, e lo 24en campionat dau monde de mandar de Palhasso l’endeman. Per aquest eveniment, l’inscripcion es à gratís e lu entraïnaments an ja començat despí lo 2 de genoier. Si fan cada dimècres davant l’ATE, au bolevard de l’Ariana, entra 1 ora e mièja e 2 oras e mièja dau predinar.

OCCITÀNIA

1/ Actualitat política

Despí mai d’un an si desvolopa l’idea d’una politisacion de l’occitanisme, que comença ensin à sortir de la sieu soleta dimension curturala. Ensin, après l’acamp de Pau en decembre passat, li èron au principi de febrier doi amassadas successivament à Aush lo 5 de genoier, e à Marsilha lo 9. A l’acamp d’Aush participèron lu conselhers regionals de Miègjorn-Pireneus – David Grosclaude – e d’Aquitània – Guilhem Latrubesse – sòcis dau Partit Occitan mas elegits sus de tièras Euròpas-Ecologia – Lu Vèrds. Figurèron finda d’actors culturals coma Jòrgi Nosella, president de l’IEO, ensin que lu partits occitanistas POc (Partit Occitan) e PNO (Partit Nacionalista Occitan). « L’ora es à la mobilisacion », si diía à l’acamp, dont faguèron lo constat que li èra tròup pauc d’elegits e que « un programa ambiciós de renovacion de la política occitana s’impauava », notantament dins la perspectiva dei votacions municipali dau 2014. Es ensin que s’es creat lo Manifeste Occitanista, qu’a per tècola de desvolopar « una foarta presença dei ideas occitanisti au mitan dei decisions territoriali e doncas dau 2014 dapé dei electors per fin que li asperacions de la populacion sígon pròpi representadi dins li collectivitats ». Ensin, lo desvolopament de l’occitanisme au plan cultural « despí 30-40 ans » deu aver la sieu revirada política. Lo Manifeste Occitanista, que serà lo breviari dei candidats que si presenteran en lo 2014 ai votacions que vènon, es un tèxto que repilha li valors que poarta l’occitanisme e que si vòu federator. Lo camin chausit es clarament electoral, pura s’agisse pas de la constitucion d’un noveu partit, mas pusleu de l’estructuracion d’un moviment d’ideas e de la mesa en plaça d’un projèct concret. De mai, lo moviment non dependerà de minga partit politic. Dau sieu costat, lo Govèrn Provisòri de la República Federala Occitana a manifestat la sieu oposicion à una tala estrategia que signifiqueria per ela la reconoissença dau sistema politic francés sus li terras occitani. En mai d’aquò, considèra que non raprocherà l’idea occitanista de la populacion.

2/ Actualitat economica e sociala

Dijòus passat à Tolosa, Nissa e Marsilha, li èra una protèsta de taxistas contra la reforma dau transpoart sanitari votada recentament da l’Assemblada Nacionala francesa. Segond aquela reforma, lu menaires de taxí perderíon l’exclusivitat dau remborsament de la Seguretat Sociala per transportar de malauts assistits. « Es tota l’economia dau taxí qu’es mesa en causa », cen que declarèt au quotidian francofòn Felipe Vidal, president regional de la FTI (Federacion dei Taxís Independents), que pensa que de grands gropes si son interessats au mercat. Lo problema si paua mai que mai dins lu airals rurals dont esquasi la totalitat dei taxís viu d’aqueli corsas. « Lo transpoart sanitari representa solament 2% dau deficit de la Seguretat Sociala », cen qu’ajonhèt Vidal. Un autre afaire de malcontentament es la concurrença desleiala dei veituras de torisme embé de menaires que s’es mesa en marcha en lo 2010. Segond lo representant sindical, son pas aqueli veituras que méton en causa « mas lu expleitants, que deuríon aver li memi restriccions ».

INTERNACIONAL

1/ França

Tres politicianas curdi siguèron assassinadi dijòus passat à París, segond cen que raportèt la polícia francesa. Li victimas son Sakine Cansiz, una dei fondadoras dau PKK, Fidan Dogan, representanta dau Congrès Nacional de Curdistan, emb sedença a Brussèlas, e l’activista Leyla Soylemez. Li assassinèron dins lo Centre d’Informacion de Curdistan, a París, segond lo oèb d’informacion sus Curdistan Actukurde.fr. D’amics dei tres victimas intrèron lo matin dins lo Centre, preocupats dau fach que li tres politicianas respondésson pas ai telefonadas. Li trobèron lu còrs tuats per de còups de fuèc dins la tèsta. Segond la polícia francesa, l’assassinat si debanèt à tres oras de matin e lu autors dau crime empleguèron d’armas embé de silenciós. Li es una coïncidença mé lo principi dei negociacions entra lo govèrn turco e lo fondador dau PKK, Abdullah Öcalan. La Federacion dei Associacions Curdi de França a apelat toi lu curdos residents en Euròpa à manifestar à París per denonçar lo crimi.

2/ Euròpa

Lo partit independentista basco Batasuna (Unitat) a anonçat que si dissòuve, segond cen qu’a raportat l’AFP. Batasuna siguèt illegalisat dins l’Estat espanhòu, mas dins l’Estat francés èra un partit legal. L’anonça de dissolucion es estada facha da doi sòcis dau partit, Maite Goyenetxe e Jean-Claude Aguerre, en una conferença de pressa a Baiòna. Fa pròpi quaucu jorns que la dirigenta de Batasuna dins l’Estat francés, Aurore Martin, sortissèt d’una preson espanhòla après aver pagar una caucion de 15.000 euros.

3/ Monde

En Azaoad : lu toarègs refúdon una guèrra que si meneria au nom de l’integritat de l’estat malian e contra lu drechs dei pòbles. Dins lo sieu discors de Cap d’An, lo president interimari de Mali, Dionconda Traoré, a mes l’accent sus lo besonh de recuperar « lu doi tèrços de l’estat » que, segond eu, si tròbon aüra en mans de gropes « terroristas que si declàron islamistas mas qu’en realitat son fidèls a un anti-islam integrista e retrograd, de gropes de narcotrafegants e d’autres actors dau crime organisat e transfrontalier ». Per liurar lo territòri ocupat, cau en promier distingar d’un caire aquelu gropes islamistas – basicament tres : Al Qaida dau Magrèb Islamic (AQMI), lo Moviment per l’Unicitat e lo Jïad en Africa Occidentala (MUJAO) e Ansar Ad-Din – e de l’autre caire lo Moviment de Liberacion Nacionala d’Azaoad (MNLA), qu’es laïc e qu’es format essencialament de toarègs, lu estatjants mai ancians de la region. Mentre que lu promiers lu cau véncer mé li armas, lu segonds lu cau convéncer emé lo dialògo, quora auran renonçat de sègre « aquela idea que sigue d’independença, d’autonomia o de Shària », cen que diguèt Traoré. Lo president interimari de Mali – un estat practicament falhit – si felicita per lo sosten que receu de divèrs govèrns africans e d’organisacions panafricani, coma la Comunitat Economica dei Estats de l’Africa de l’Oèst (CEDEAO), qu’apontèlon la sieu decision de combatre per recuperar l’integritat de l’estat. De mai, compta embé l’ajuda logística de l’anciana metropòli, la Republica Francesa, e mé la promessa de cooperacion de l’ÒNU, facha ai instanças dau Conseu de Seguretat. Aquesto darrier, lo 20 de decembre passat, avia aprovada una resolucion en favor dau desvolopament, per estapas, d’una foarça armada internacionala en Malí, comandada da un general francés e dirigida da un contingent europeu de 400 militaris. L’operacion a pas de data : màncon foarça preparatius per la poder menar. Mentretant, quaucu país coma Argeria s’opàuon à declarar la guèrra e s’ofrísson coma mediators entra li partidas en conflicte per poder arribar à una compreneson pacifica. França, e mai se manifèsta la sieu adesion à la causa de l’integritat territoriala, pilha pas lo risc de si metre en tèsta dei tropas aligadi. A paur que, se lo faguesse, lu sèt ciutadans francés sequestrats dins lo « territòri enemic » sígon executats coma represalha. Lu mai opauats a la guèrra son lu toarègs qu’insíston que cau provar toi lu biais de negociacion. Mahamadou Djeri Maiga, vice-president dau MNLA, explica : « Refudam aquela intervencion militària que sigue sus lo territòri d’Azaoad. Si deu resòuvre politicament tot cen que n’opaua à Malí ». Una solucion política que lo MNLA, de fach, a provat mentre lu darriers temps. D’un costat, lo mes passat arribèt a un acòrdi emb Ansar Ad Din (lu islamistas toarègs) per « coordenar » li sieu accions e per arribar à una « situacion de patz » embé Malí. De l’autre, acceptèt de pilhar part ai convèrsas de patz m’au govèrn malian e m’Ansar Ad Din sota li auspicis dau president de Burquina Fasò, Blaise Compaoré. Mas sus lo terrenh, fa de mes que li milíças islamisti an forabandit lu combatents dau MNLA dei luècs clau dau poder. De gropes coma AQMI ò lo MUJAO an de ressorsas economiqui e militari sufisenti per n’exercir lo contraròtle e, sobertot, per atraire de combatents estrangiers, e mai de joves e de pichoi autoctòns. De ressorsas tali, lo MNLA n’a pas, e aquò explica perqué lo grope toarèg perdèt l’iniciativa sus lo terrenh fa de mes. Cau remembrar que l’inici dei ostilitats en Azaoad foguèt una iniciativa d’aqueu grope, e que solament après quaucu temps, AQMI e lo MUJAO apareissèron sus scèna. Au delà de la sieu deblessa militària e economica, lo MNLA desira pas manco una guèrra que, probablament, infligeria de greus patiments à una populacion toarèga, que fa de desenaus d’annadas qu’es foarça punida dai políticas de l’Estat malian. Lo MNLA, e mai s’es adeblit, es ben decidit de contunhar la lucha. Dins lo sieu programa, si pòu lièger que « l’unificacion embé Malí vòu dire cinquanta ans d’aclapament programat de tot cen que distingue lo pòble azaoadian dins lu domanis cultural, religiós, social, politic, economic e geografic, mejançant la negacion dau sieu drech essencial sus la sieu tèrra ». Es per aquò que li cau realisar lo sieu pròpri « projècte nacional vertadier », qu’a ren da vèire emé cen que representa lo govèrn central de Malí, ni embé l’expansionisme que pròvon de realisar lu gropes islamistas que combàton lu toarègs.

ESPOART

Carton à Nissa en fotbòl ! Lo diménegue passat, l’OGC Nissa a realisat un match espectaculari en batent per 5 à 0 una chorma de Valenciennes maluroa. La promiera part dau rescòntre èra engatjada, entra d’aiglons entraprenents mas tròup aplicats davant lu goals advèrs, faça à de valencienés ben regropats en defença. La delivrança es venguda à la 45a minuta, pròpi denant la mièja-temps, emé un goal de Cvitanic. En segond periòdo, alora que s’asperava una reaccion dei nordistas, l’OGC Nissa a pas plegat e a meme doblat l’escòre denant l’ora de juèc. Après, lu espectators de l’estadi dau Rai an augut drech à un vertadier festenau ofensiu davant una chorma de Valenciennes apatica : Eysseric agrava la marca 5 minutas mai tardi, pi Cvitanic realisa lo sieu doblat dau match à la 79a minuta, e fins finala, Didier Digard dona lo còup de graça tres minutas denant la fin de la partida. Despí la sieu remontada en Liga 1, jamai lo Gim a realisat un escòre tant larg, e lo darrier còup que lo faguèt data de març dau 1989 contra Estrasborg. A l’issuda de la 20a jornada dau campionat, Nissa si tròva à la 5a plaça dau classament, à egalitat de ponch emé Bordeu qu’es en 4a posicion. Emé una victòria en copa de França contra Metz doi setmanas fa, l’annada 2013 comença d’un biais tonitruant per l’OGC Nissa. Esperèm que garderà lo sieu ritme e que si qualifiquerà per l’UEFA la sason que ven.

METÈO

Lo temps serà neblós la màger part de la setmana em’un pauc de soleu. Dissabta plourà tota la jornada. Li temperaturas seran sempre bassi, entra 6 e 8 grados lo jorn e fins à -4 la nuèch.

Comment on this post

Blog archives

We are social!

Recent posts