Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°11 - 16 d'abriu dau 2012

Posted by Pantainfo : infos de l'emission d'actualitats setmanieras sus ràdio nissapantai.com on April 16 2012, 09:48am

PantaInfo n°11 - 16 d'abriu dau 2012

PantaInfo, l’informacion setmaniera dau País Nissart e Alpenc

16 d'abriu dau 2012

PAíS NISSART E ALPENC

1/ Actualitat política :

Dimarts passat, l’ancian procurator de Nissa Eric de Mongolfier, qu’es estat promougut procurator general de la Cort d’Apèla de Bourges, a estimat que se non es fatigat de Nissa, si tròva « un chícol las » de cen que ve e parla de tretze annadas dificili sus d’una tèrra de charrada e de mauvolença. Es anat encara mai luènh en criticant « un certan nombre de comportaments, de tradicions un pauc diferenti de cen que si tròva en d’autres luècs, una dificultat de viure sanament dins la veritat. » Segond eu li son à Nissa « tròup de gents qu’an pilhat l’abituda » de la delinquença « e bessai una certana arogança de la delinquença ». Tocant lu sieus rapoarts emé la polícia municipala de Nissa, à que Montgolfier exige qu’intervengue solament en l’encastre de la lèi, parla de desacòrdis emé lo cònsol de Nissa à-n-aquesto subjèct. En respoasta, Crestian Estrosi a declarat au Jornal de Miègjorn que lo procurator De Montgolfier « a una interpretacion de la lèi, notantament sus l’accion de la polícia municipala en flagrant delit » e que « cada còup qu’a estimat que la polícia municipala non agissia coma eu pensava que devia agir e qu’a engatjat de perseguidas, lu sieus pròpres confraires dau Tribunal de Granda Instança li an donat toart e li an repossat la sieu demanda. » Pura, lo procurator precisa que si ve ben passar la sieu retirada à-n-aquela tant detestada « tèrra de charrada e de mauvolença » qu’es Nissa, à comptar dau 2013. Sensa manco si rire, Monsénher De Montgolfier declara : « Aquesto país es un país manhífico, mas ai paur que lu sieus estatjants n’en sígon pas totjorn dignes. Doncas vau provar d’èstre dei sieus per li mostrar que podèm èstre dignes de Nissa. » Tau un missionari colonialista que desidèra venir aportar la boana paraula à de sarvatges Nissarts « pas dignes de la sieu tèrra », per lu educar à la boana morala republicana, Monsénher De Montgolfier a sensa dubi pas capit que l’integracion à-n-una tèrra d’acuèlh marcha pas coma aquò. Inviti alora personalament lo future procurator retirat à anar jugar lu Jules Ferry en d’autri contradas, se pura aqueli l’accèpton.

2/ Actualitat economica e sociala :

Lo dijòus 8 d’abriu passat, li èra à La Seyne una manifestacion contra lo gaz de sistre e lo projèct d’escavaments per vèire se si tròva à 4.000 metres sota l’aiga e fins à 5.000 metres en lu foants marins de petròli ò d’òli de sistre. Cèrtu mitans malonèstes si son pensats qu’aquela manifestacion servia de publicitat ai ecologistas ò meme à Joan-Luc Melenchon. Una tala remarca es purament mespreanta per lu militants de Provença e de la Contea de Nissa, que son soventifés lu memes que lúchon contra lu projècts de la LGV Nissa-Marselha, e de la betonisacion de la Plana de Var.

3/ Actualitat curturala :

L’obratge « Conjugar en Nissart ! », realisat dau CRDP de l’Acadèmia de Nissa en co-edicion emé la Federacion dei Associacions dau Comtat de Nissa, es tot just pareissut. S’agisse d’un obratge inedit, conçauput da d’ensenhaires de l’Acadèmia de Nissa, e que si prepaua de pilhar tornamai la conjugacion sota li doi grafias mai conoissudi : clàssica e mistralenca. Gràcia à-n-una organisacion sota forma de tableus e una granda diversitat dei vèrbos, « Conjugar en Nissart » es ben mai qu’un autís d’aprendissatge, es una referença per lu escolans e lu adultes curiós de descurbir li sobtiliessas dau nissart e que desidèron si perfeccionar en aquesta lenga.

OCCITÀNIA

La manifestacion « Anèm Òc ! Per la lenga occitana ! » es estada un grand succés : li èron en tot 30.000 personas dins li carrieras de Tolosa, capitala occitana dau moment. Lu numerós sòcis de l’Institut d’Estudis Occitans, presents à Tolosa lo dissabta 31 de març passat, son en granda part responsables de la reüssida d’aquesta manifestacion, à mai d’un niveu : tra la Coordinacion, en lo comitat d’organisacion local « Tolosa », coma en la sieu seccion departimentala ò lo sieu cèucle local, lu beninhós e salariats de l’IEO an acapitat de s’investir dins l’organisacion e la mobilisacion à l’entorn d’aquel eveniment. Aquesta manifestacion èra pas una fin en si-meme. De segur es un autís per si motivar en li futuri accions. Mas es sobretot un esfoarç per posquer aver una influença sus l’ensems dei òmes políticos que, encuèi e deman, si deuran engatjar favorablament per l’ensenhament e la socialisacion de la lenga occitana (cambiar la constitucion, ratificar la Carta Europea per li lenga minoritari e patin e cofin). L’IEO contunha lo sieu travalh, qu’es d’iniciar, desvolopar e difusir de noveus projècts e d’autís per la lenga occitana. Ensin, mentre que la manifestacion s’organisava, l’IEO a publicat de novèli versions de « L’occitan qu’es aquò » e de l’anuari dei labelisats « Òc per l’occitan », difusidi ja lu 30 e 31 de març. D’autri accions son à si realisar.

« Alora anèm enfants de la patria occitana » es cen que foguèt escrich dins l'editorial de La Dépêche du Midi, lo dissabta 31 de Març, da Maria-Loïsa Roubaud. Em’ una cubèrta pagada da la region Miègjorn-Pirenèus e un tèxto en occitan e en francès dau president Martin Malvy, pròva d'un engatjament de mai en mai foart, de mai en mai regionalista. Pròva de la capitada dau travalh de la coordinacion « Anèm Òc ! », de la foarça de l'accion unitària dau moviment occitan. Trenta mila personas d’Occitània tota son vengudi à Tolosa per revendicar una lèi per l’occitan e li autri lengas regionali. Aüra cau anar vèire lu candidats ai legislativi per afortir lo messatge e la pression e tot aquò dins l'unitat.

La manifestacion s’es pròpi ben debanada : joioa e bigarada, à la autessa de la revendicacion per una reconoissença vertadiera de la lenga d’òc. Quaucu jorns après lu eveniments tràgicos de Montauban e Tolosa, la Coordination a sauput metre en plaça, en boana inteligença emé lu servicis de polícia municipals e nacionals presents, un dispositiu de segurisacion dau cortègi de qualitat. Pura, en la nuèch de dissabta à diménegue si son debanats d’eveniments qu’èron pas ligats emé la manifestacion e qu’an fach un ferit grèu, la manifestacion s’estent acabada à li 6 oras e lo concert gigant organisat da Convergéncia Occitana denant mièjanuèch. En mai d’aquò, la bandaròla giganta installada en lo jardin Compans Caffarelli e proclamant « La lenga que parlam es patrimòni de l’umanitat » es estada raubada.

La lenga occitana serà lèu lèu oficiala en l'encastre de l'euro-region, un recampament de Miègjorn-Pirenèus, Lengadòc-Rosselhon, Catalonha e Balearas. Li quatre regions van cambiar lu estatuts per li ajónher l'occitan, au costat dau catalan, dau basco, dau francés e dau castilhan. L'occitan serà doncas lenga oficiala, alora qu'es pas encara reconoissut dins l'estat jacobin francés ! Es una informacion qu'arriva da la segretària generala de l’euro-region, la dòna Antònia Sabartés. L'organisme occitano-catalan travalha finda per faire revirar lo siti Internet en lenga d’òc. Una pròpi boana novèla après la manifestacion de Tolosa.

INTERNACIONAL

1/ França

Li manifestacions dau 31 de març son estadi un vertadier succés en recampant en la mai granda part dei territòris de la República Francesa mai de 60.000 manifestants per la reconoissença dau drech dei lengas e curturas regionali. Lu engatjaments dei candidats à la presidença de la República moàstron una esclapadura marcada entra nacional-jabobins que campèjon sus lo dògma « d’unicitat dau pòble francés », e democratas favorables à-n-un vertadier estatut de drech dei lengas regionali dins la Constitucion, notantament per la ratificacion de la Carta dei lengas regionali e minoritari dau Conseu de l’Euròpa, bastida sus dei principes universals dei drechs de l’òme e de la democracia. S’engàtjon ensin per un estatut de drech dei lengas e la ratificacion de la Carta : Eva Joly dau partit Euròpa-Ecologia Lu Vèrds, Francés Hollande dau Partit Socialista, Felipe Poutou dau NPA e Francés Bayrou dau Modem. S’opàuon à la ratificacion de la Carta Nicolas Sarkozy de l’UMP, Joan-Luc Melenchon dau Front de Senèca, Nicolas Dupont-Aignan dau partit Debout la République e Marina Le Pen dau Front Nacional. Enfin, la presidenta de Lucha Obriera Natàlia Arthaud, non a exprimit de vejaire clar sus la question.

2/ Euròpa

Lo dimarts 11 d’abriu passat li èra en li Valadas Occitani de Piemont una mobilisacion contre la Linha de Granda Vitessa Lion-Turin. Sota li numeroï bandieras occitani, piemontesi e meme nissardi, la mobilisacion No-TAV avia per tècola d’empedir li despropriacions per lo chantier. Lu manifestants an desfidat en massa lo decret d’interdiccion dau prefèct e èron mai de mila à assedir lo perimètre dau chantier, cerclat de fius de fèrre espinós, de barricadas, d’òmes armats e de veïcules militaris. Lu manifestants son venguts participar ai operacions de despropriacion dei tèrras, mostrant qu’aqueli operacions son ilegali e an minga legitimitat. Aüra, la mitan d’Itàlia es mobilisada contra lo projèct. Lo Partit Comunista, li sieu organisacions de joinessa e la CGIL an finit per pilhar posicion contra la LGV Lion-Turin e sostenir la lucha dei populacions de Val de Susa. En França, lu partits d’extrema-senèca (PCF, PG, Front de Senèca) e la CGT contúnhon emé lo PS de sostenir la LGV Lion-Turin en faguent bus d’ignorar la repression que subísson lu oposants en li Valadas. Per lu mèdias francés, coma per lu candidats e candidatas ai votacions per la presidença francesa ensin que li divèrsi organisacions e collectius que lu supoàrton, li si passa ren dau tot. Per toi aquelu lo poder de cròmpa e l’emplec son prioritaris. Van meme jusqu’à pretendre que la LGV Lion-Turin es un objectiu ecologic que va diminuar li emissions de CO2.

3/ Monde

Lo divèndres 6 d’abriu passat, lo Moviment Nacional per la Liberacion de l’Azaoad a proclamat l’independença dau sieu país, la declarant « irevocabla ». Dau segur, París e l’Union Africana non an reconoissut aquesta declaracion unilaterala d’independença. Pura la secession es realisada de fach. Lo territòri non es mai tengut dai autoritats maliani, e ni lo Malí ni la Comunita Economica dei Estats d’Africa de l’Oest son capables de lo reconquistar. Lu moviments islamistas (Al Qaida au Magreb Islàmico e Ansar Dine) an aprofichat de l’extrema confusion que renha en lo país per avançar li sieu pròpri pedinas. Organisacion laïca, lo MNLA toareg s’opaua naturalament ai gropes islamistas. Li donar la legitimitat en reconoissent Azaoad e en lo sostenent seria lo milhor meso per luchar contra lo terrorisme islamista. Pura lo territòri d’Azaoad non es omogène vist que còmpta d’importanti populacions de Peuls e de Mauros que son oposats à-n-aquesta separacion dau Sud-Malí. Una pròva de mai que cauria cambiar completament li frontieras dei Estats africans.

ESPOART

En asperant lo mach d’esto diluns, l’OGC Nissa va plus ben despí quauqui setmanas. Sus lu sièis darriers mach, Nissa es segond. Series enfin la prima tant asperada per lu aiglons ? De tot biais, li doi darrieri succés nissarts à Sant-Estève pi contra Lorient, son encoratjanti e ameliòron li chança per Nissa de se mantenir en Liga 1. Finda, lo Gim viatja plus ben : lu rotge-e-negres an obtengut un segond succés à l’exterior. Pura, la lucha per lo manten es pas encara finida e Nissa es luènh d’èstre sauvada : rèsta encara 7 jornadas e Nissa es à solament doi ponchs dau promier relegable. Enfin, lo mach que vèn contra Rennes promete d’èstre foarça dificile per lu aiglons.

METÈO

S’aspèra lo retorn dei pluèias per tota la setmana, au mancos fins à dissabta quora lo soleu deuria revenir. Li temperaturas seran establi en jornada entra 14 e 17 grados. La nuèch, lo termomètre calerà fins à quatre grados lo dijòus. Lo rèsta de la setmana farà entra cinc e sèt grados la nuèch.

Comment on this post

Blog archives

We are social!

Recent posts