Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°4 - 13 de febrier dau 2012

Posted by Pantainfo : infos de l'emission d'actualitats setmanieras sus ràdio nissapantai.com on February 13 2012, 10:48am

PantaInfo n°4 - 13 de febrier dau 2012

PantaInfo, l’informacion setmaniera dau País Nissart e Alpenc

13 de febrier dau 2012

PAíS NISSART E ALPENC

1/ Actualitat política :

La setmana passada, lo cònsol de Nissa, Crestian Estrosi, s’es dich opauat à-n-un colòqui organisat da la Liga dei Drechs de l’Òme e que si soana « Argeria 1962, perqué una fin de guèrra tant tragica ? », au motiu que si marcava pas en l’esperit de la comemoracion organisada da la sieu municipalitat. En respoasta la LDH a manifestat en un comunicat la sieu intencion de non recular davant una tala intimidacion. La Liga a finda acusat Estrosi de s’auçar en detentor de la veritat istòrica. Mentre aquesto colòqui, lu organisators volíon pauar un regard apaisat sus d’aquesto passat, revenir sus lo ròtle de l’OAS e reconóisser clarament lo fach que la colonisacion èra contra lu principes dei drechs de l’òme e de la devisa republicana. Rèsta da vèire se la LDH include en lo colonialisme la política linguística de França (fedela à la devisa republicana) à l’encontra dei lengas regionali...

2/ Actualitat sociala e diversa :

Divèndres passat, lo jornal Nissa Matin a consacrat doi pàginas sus la « Ndrangheta » (la màfia calabresa) en Liguria, de Bordighera à Vintimiglia. Ensin, despí li annadas 80, la « Ndrangheta » devèn una màfia d’entrapresa, qu’a infiltrat lo monde político e li classas dirijanti per investir en l’economia legala : imobilier, comerci, construccion, societats de finançament, en Itàlia mas finda en Alemanha, en Austràlia ò au Canàda. Lo jornal minimisa la presença d’aquesta organisacion criminala sus la noastra Coasta. Pura li testimonianças presi dau jornalista à Vintimiglia nen rapèlon cèrti situacions conoissudi en País Nissart e en Provença, coma l’arestacion dimècres passat d’una familha calabresa à Pegomas, installada coma agricultors e qu’avíon organisat un laboratòri de transformacion de cocaïna. Segond un rapoart de la Direccion d’Investigacion Anti-Màfia que desínhon la « Coasta d’Azur », cèrtu camoristas refugiats en França sèmblon èstre en afaire emé lu Francés. Ensin, lo País Nissart sièrve de ponch d’aponteu tàctico e de contraròtle dei activitats de reinvestiment sus la Coasta d’Azur. Li activitats de la màfia (calabresa, siciliana, napolitana, russa, ucraïnesa, bulgara e patin e cofin) constitúon doncas un factor d’enseguretat e de auta delinquença en lo País Nissart, mas minga partit n’en parla, manco lu politicians de l’UMP especialistats de la seguretat, coma Lioneu Lucas, Eric Cioti ò meme Claude Guéant. Lo silenci sembla de règla e minga clàusola anti-màfia es en vigor sus lo noastre territòri. Ensin, lo tissut economic impauat despí l’anexion francesa 150 ans fa e que si limita au torisme, à l’imobilier e à la construccion, sembla aver transformat lo País Nissart en un paradís de la pègra e lo teatre d’afrontament tra bandas mafioï. Pròpi lo meme jorn s’es debanada una fusilhada au Mercat d’Interés Nacional de Nissa, que s’es acabada embé la moart de doi figuras dau grand banditisme, abatuts em’una arma lònga da un òme en capucho sus d’un motocicle de gròs cilindrada de tipe Yamaha.

3/ Actualitat curturala :

Après quatre ans de mistèris, lo Carneval Independent de Nissa s’en es tornat en Casteu lo diménegue passat. La fèsta a començat emé un past en plena carriera pi s’es contunhat emé lo cortetge. Organisat en marga dau carneval oficial, lo Carneval Independent es l’escadença de si retrovar entra tribús de carnevaliers liures que causísson lo sieu tèma de deguisament, que pòu èstre de còups que li a foarça estonants. Lu carres son fachs à la basta que sigue e l’animacion musicala dau còrso es totjorn garantida. Enfin, l’autre element capitau que simbolisa aquesta manifestacion es la farina que remplaça lu confetís. En efèct, se lu confetís son l’essença dau Carneval de Nissa, la farina es incontestablament l’actritz principala dau Carneval Independent.

OCCITÀNIA

Despí quaucu jorns, en l’encastre de la manifestacion « Anèm Òc ! per la lenga occitana » que si debanerà lo 31 de març que vèn, si pòu firmar la crida en linha per la preservacion de la lenga occitana e lo sieu desvolopament en lu mèdias, la creacion e l’ensenhament. Per firmar, cau anar sus lo siti “anemoc.macarel.net”.

INTERNACIONAL

1/ França

L’actualitat política en França èra marcada da l’escandal à l’entorn dei prepaus de Claude Guéant qu’a declarat que « li civilisacions si valíon pas toti ». Lo ministre francés dau Dintre confonde manifestament lu mots « civilisacion, societat e regime político » segond li paraulas dau deputat socialista de Martínica Serge Letchimy. En efèct, Claude Guéant definisse una ierarquia dei civilisacions segond la nocion abstracha de « respect dei valors umanistas que son noastri ». Aquò significa que segond la logica de Claude Guéant, en matiera de drechs de l’òme, li civilisacions chinesa, indiana, araba, africana, amerindiana e tot aquò seríon sauvatgi e barbari. Mas paradoxalament per lo PS, aquesta vision messiànica e universalista de la civilisacion ièntra en la pura tradicion ideologica jacobina fondada sus de l’esperit dei « Lumes dau 1789 », illustrada dai personatges emblemàticos de senèca coma Victor Hugo, Jean Jaurès, Leon Blum ò encara Jules Ferry que declarèt à l’Assemblea en lo 1885 : « cau dire dubertament qu’en efèct, li raças superiori an un drech vis-à-vis dei raças inferiori ; mas perqué li es finda un dever. An lo dever de civilisar li raças inferiori ». Totun, meme en aderent à-n-aquesta vision purament imperialista dei civilisacions, si porria pas dire que la civilisacion francesa es de granda valor quora si renembrèm de la colonisacion, de l’esclavatge e de la política negatiua de l’Estat francés contra li lengas regionali.

2/ França e Euròpa

Còup de tron au coar de l’ivèrn en Cerdanha : lo cònsol de Font-Romeu, Joan-Loís Demelin, a convocat un conseu municipal extraordinari per denonçar lo tractat dei Pireneus dau 1659, qu’avia copat en doi la Cerdanha, ratacant una part au Reiaume de França, e demandar de si federar embé la vila de Llivia, e doncas embé lo Principat de Catalonha. Lo cònsol es excedit da l’Estat francés que vèn de suprimir de poasts d’ensenhaires alora que la comuna a tot just investit quatre milions d’euros per la creacion d’una novela escòla. Ensin, en plaça de revendicar lo renforçament de l’estat central, una vila de Cerdanha decida de si tornar vèrs la sieu pròpra istòria e lo sieu país vertadier : Catalonha. Aquò moastra que lo poder jacobin non es tant foart que lo pretende, e prova que la Catalonha dau Nòrd regarja mai que mai vèrs son fraire dau Sud.

3/ Monde

Region de Saèl : à l’escadença dau fòrom per la consolidacion de la patz que s’es tengut à Arlit à la fin de genoier, lo president de Niger, Issofó Mahamado, a lançat un apèl à la patz ai rebèlas toaregs qu’an pilhat lu armes contra l’armada governementala dau Malí vesin. Pura denant de pensar à consolidar la patz, cauria vèire sus de que es fondada. Òr, lu reglaments dei conflicts son totjorn estats menats en una logica d’estabilisacion de la situacion, es à dire la volontat de mantenir un estatut-quò político e economic. Manifestament, l’istòria non sièrve jamai d’exemple à-n-aquelu que pènson solament à cort-tèrme e sobretot ai sieus interés personals. Tant que d’òmes incompetents, sostenguts da de potenças extèrni complici, governeran d’estats artificials coma Malí, Niger, la patz a pauc de chança de si mantenir en la region. La situacion tràgica que conoisse Malí, e que conoisserà tornamai Niger inevitablament, es lo resultat dei políticas centralisti que mènon Bamacò e Niamei, sostenguts da França que rèsta fedela à la sieu tradicion imperialista e qu’a exportat lo sieu modèle jacobin ai sieu anciani colonias africani. Lo ministre dei afaires externes Alan Juppé a demandat ai resistants toaregs dau MNLA la cessacion dei ostilitats. Si demanda ja de que drech Mossur Juppé intervèn en de conflicts intèrnes e sobretot que conseus poàdon donar lu politician francés à de politicians malians o nigerians quora son manco capable de reglar lu sieus problemas internes. Enfin, la soleta solucion possibla per esperar una patz durable à l’avenir, es à dire lo drech à l’autonomia ò l’accession à l’independença dei Toaregs, es jamai estada envisatjada dai país concernats.

ESPOART

Diménegue passat, l’OGC Nissa a obtengut un match nul meritat zèr à zèro contra lo París Sant-German, au terme d’un rescòntre actiu, en lo quau Nissa a soventi fés dominat, notantament en la promiera mièja-temps, e mancat quauqui ocasions de buts. Lo club qatari… perdon parisenc, es estat ensin sorprés da la combativitat de Nissarts coratjós, qu’an mostrat un autre visatge per rapoart ai machs passats. Motivat dai retorns de Deidier Digard (qu’èra ferit) e d’Eric Molonguí (que revèn da la CAN), lo Gim sembla partit sus de noveli basas mai sani per si batre per si mantenir en Liga 1.

METÈO

Après la vaga de frèi de doi setmanas, li temperaturas son per augmentar progresiuament ‘sta setmana, passant de sièis grados à comptar de dimarç fins à dètz ò onze en fin de setmana. Per contra, la nuèch resterà frèia emé de temperaturas de manco trés ò manco quatre. Lo temps serà ensolelhat tota la setmana, em’un pauc de neblas lo dimarç.

Comment on this post

Blog archives

We are social!

Recent posts