Overblog Follow this blog
Edit post Administration Create my blog

PantaInfo

L'emission d'actualitat setmaniera de Ràdio Nissa Pantai http://nissapantai.com


PantaInfo n°8 - 12 de març dau 2012

Posted by Pantainfo : infos de l'emission d'actualitats setmanieras sus ràdio nissapantai.com on March 12 2012, 10:48am

PantaInfo n°8 - 12 de març dau 2012

PantaInfo, l’informacion setmaniera dau País Nissart e Alpenc

12 de març dau 2012

PAíS NISSART E ALPENC

1/ Actualitat política :

Una setmana après la fin de Carneval, un article dau jornal « Lo Pichin Nissart » evòca la polémica à l’entorn dau carre de carneval independent conçauput dau Centre Curtural Occitan e doi autri associacions. Inaugurat lo 15 de febrier passat au CAL de l’Ariana, aquesto carre es representat da un babi occitan que si manja una zanzara ai colors blu-blanc-rotge e que simbolisa la política linguística de França. Lo conceptor dau carre Cristòu Daurore explica qu’aquesto carre es un biais de denonçar la política monolinguística de l’estat francés. Lo deputat de Nissa Rudy Salles, autor d’un amendament de la lèi que reprima lu prejudicis portats contra l’emblema francés, a violentament reagit en parlant de volontat de « faire portar de messatge anti-francés à de pichoi. » « Pas question que si mange la curtura francesa à Nissa ! » ajonhe lo deputat, que non ve perqué « un carre que si vòu contrari ai valors de la república defileria sota la bandiera dau carneval de quartier. » Sembla qu’en la sieu reaccion impulsiua, lo deputat tant amorós dei simbòlos d’un sistema qu’a tot fach per destrúger la curtura nissarda, a denembrat doi cauas importanti : en promier, si manja pas la curtura francesa mas la política linguística d’un estat jacobin ; en segond, l’esperit de Carneval es la libertat totala e doncas de si poder exprimar liurament sus de tot. La totalitarisacion d’un sistema marca soventifés la sieu fin.

2/ Actualitat curturala :

Après 42 ans d’existença sensa interupcion, la revista Lo Sorgentin presenterà lo sieu doi-centen numèro, esto dijòus lo 15 de març que vèn, a doi oras e mièja dau predinar, à l’Auditorium Loís Nucera de la Biblioteca Municipala de Nissa. S’agisse d’un numèro excepcionau consacrat au rescòntre dau passat e dau present e en que si tròva una nòva edicion dau promier numèro e la participacion dau comitat de redaccion d’encuèi. Raol Nathiez e Roger Ròcca evoqueran lu principis e la seguida d’aquesta bèla aventura e responderan ai questions dau público. Ge Albarelli presenterà lo Carneval de Nissa 2012, pi una vidèo sorpresa emé Jan-Miqueu Bessi e Alex Benvenuto sus dau Consiglio d’Ornato. Una presentacion da pas mancar.

OCCITÀNIA

Lo canal dau Miègjorn es à morir. En causa : la marrida fet dau govèrn francés e l’incompetença crònica de « Vias Navigabli de França » dins la gestion dau siti natural. L’establiment público s’es mostrat incapable d’arrestar l’abatiment dei platanas, ni d’assegurar lo sieu remplaçament. Maugrat un plan previst de restauracion dau siti de 200 milions d’euros que si reparte à 30% per l’abatiment, 20% per lo replantament, e 50% per la refeccion dei ribas, VNF non a assegurat la mitan dau travalh. En efèct, après l’abatiment e la mascarada de plantament de « platanor » à un cost proïbitiu, l’organisme público sembla aver denembrat de s’ocupar dei ribas que menàçon de s’espronfondar en causa dei rais dei aubres. Totalament incompetent e incapable d’administrar lo trateniment dau siti torístico, l’operator VNF es estat en mai d’aquò criticat da mai d’un rapoart que moàstron que maugrat d’investiments colossals de l’Estat, lu resultats son extremament debles. En causa de grèus maufoncionaments, una organisacion obsolèta e una gestion globala dau personal completament asardoa. L’associacion País Noastre prepaua de remplaçar VNF per un establiment público multiregional encargat dau trateniment e de la restauracion dau Canal ensin que de la sieu expansion económica e torística, e que seria finançat da l’Estat e li diferenti collectivitats dei regions administrativi qu’aregarja lo canal.

En lo 2005, li èron 12.000 à Carcassona. En lo 2007, 20.000 à Besièrs. En lo 2009, 25.000 à Carcassona. Quant seran lu defensors de l’occitan lo 31 de març à Tolosa ? Seran segurament encara mai numerós. Per la quarta manifestacion dau pòble occitan que defilerà « per » la lenga e non « contra cen que que sigue », la mobilisacion promete de batre de recòrdis. En mai d’aquò, si debaneran d’autri radunanças per li lengas regionali en Catalonha dau Nòrd, au País Basco, en Arsaça, en Còrsega e patin-cofin… En causa lo retardi de l’estat francés que non òfre minga garantia tocant lo manten e lo desvolopament dei sieu lengas regionali que fan part integranta de la curtura de milions de ciutadans francés. Ramentan que la Carta Europea dei lengas regionali e minoritari es estada firmada mas jamai mesa en plaça. Lu actors de la mobilisacion declineran lu sieus arguments e li sieu revendicacions fins au 31 de març e devèrs delà.

Lo dissabta 17 de març que vèn, si debanerà à Montsegur, en Arièja, lo festin de la Primada, à partir de doi oras dau predinar. Li seran de baletis, concerts, poesias, cants e danças tradicionals occitans e una conferença sus « lo catarisme e Occitània ».

INTERNACIONAL

1/ França

Dijòus passat à Baiòna s’es tenguda una recampada dau Conseu dei elegits e dau Conseu dau Desvolopament sus l’avenir institucional dau País Basco dau Nòrd e la possibilitat d’en envisatjar la creacion d’una collectivitat territoriala. Lo rescòntre si marcava en l’encastre d’una reflexion globala sus de la futura governança dau territòri. Li èron cinc possibilitats : manten dau País Basco actual, formacion d’un sindicat mescle, una collectivitat territoriala à competenças limitadi integrada au departiment, una collectivitat territoriala à competenças renforçadi comptant de competenças dau Departiment e de la Region e una collectivita autonòma emé cambiament de constitucion. Après una seria d’entrateniments em’un quarantenau de decidors políticos e socials dau País Basco, la tèrça solucion sembla èstre estada retenguda, es à dire l’opcion d’una collectivitat territoriala à estatut particulier ò à competenças limitadi en l’encastre dau departiment. L’Estat solet, via lo Prefect, s’es exprimat per lo manten de l’estatut actual.

En Còrsega, lo sistema mafiós es à s’installar. De promotors imobiliers, à la tèsta d’organismes oficials ò de bandas criminali, tèmpton de si compartir lo territòri. Li construccions sus li ribas constitúon de foants gigantescs. L’ísola es au centre d’una guèrra per lo contraròtle dei sieu coastas e se li personalitats polítiqui non si lèvon au costat dei associacions per defendre li tèrras, Còrsega tomberà definitivament ai mans dei rèts mafiós. Aquesta situacion es lo resultat d’un lòng processús : en li annadas 60 e 70, de banquiers, princessas e « people » de la jet set ai poartafuèlhs ben remplits an crompat Còrsega emé la benediccion de l’estat francés. Lu sieus projècts imobiliers faraonics non an poscut si realisar en causa dei atentats dei nacionalistas que lu an caçats. Pura cèrtus projècts si son fachs sus de foarça bèli plaias : de clubs, de lotissaments e villas de luxo. A l’epòca, la màger part dei Còrsos sostenia la lucha contra l’invasion dei ribas e l’especulacion imobiliera. Encuèi, quaranta ans mai tardi, la menaça d’apropriacion ilegitima d’espacis naturals torna venir actuala, à la soleta diferença que vèn aüra de Còrsos rics e ben plaçats qu’aprofíchon de la non aplicacion da l’Estat de la lèi Litoral, votada dau Parlament francés en lo 1986 e que devia protegir lo litoral còrsu. En realitat, l’estat central, mai motivat de transformar Còrsega en bronzodròme d’Euròpa, a donat de miliers de permés de construccions ilegali sus li ribas que devia protegir, en generalisant lo declassament d’espacis naturals e en li donant l’estatut de zònas constructibli.

2/ Euròpa

Lo chantier de la LGV Lion-Turin es trebolat da l’escandal dau trucatge de l’apèl d’òfra dau 2011 per la gestion de la construccion per li galerias d’exploracion de la linha. Un jutjament de promiera instança a condamnat à vuèch més de preson Paul Comastri, director general de la societat qu’es per batir lo camin de ferre. Aqueu baudo es defendut da Paula Severino, advocata conoissuda en drech criminal, e sobretot ministre actual de la Justícia dau govèrn de Monti, l’òme de Goldman Sachs e de la BCE, que sostèn la novela linha. Lu comitats anti LGV dei Valadas Occitani an pas mancat l’escadença de rapelar aquestu fachs e aquesta realitat. L’enquista qu’a menat à la condamnacion de Comastri a començat en lo 2005. La construccion dau chantier de la LGV Lion-Turin avia manco començat quora lo Procurator de Turin foguèt designat per enquistar sus dau sota-ministre de l’Infrastructura, Ugo Martinat, numèro doi de Pietro Lunardi (l’esponsòr dau chantier). Lu procurators s’interessèron ai travalhs de trateniment dei luècs ligats ai Juècs Olímpicos de Turin, pi ai chantiers de la LGV Lion-Turin, de que lu dorsiers èron entramesclats em’aquelu dei societats de conseus de personatges dau govèrn. Lo promier procés s’acabèt emé vuèch condamnacions. Comastri es estat incorpat per la part de l’enquista que tocava lo Lion-Turin.

3/ Monde

En Libia, après lu combats entra tribús qu’an esclapat despí la tombada dau regime dau colonel Kadafí, lu caps de tribús e de milícias de l’èst dau país, recampats en assemblada à Bengazí, an proclamat l’autonomia de la provinça de Cirenaïca, que s’estende dau confin d’Egipte fins à la vila de Sirta. Aquò confirma l’inconsistança dau noveu poder que s’es installat à Tripolí e que non contraròtla plus lo país. Ensin, li tribús, li milícias, li vilas e li regions detènon de poders de mai en mai importants au detriment dau poder central dau Conseu Nacional de Transicion, que vèn mai que mai neutralisat da de foarças qu’escàpon à la sieu autoritat. L’anarquia es totala e lu caps dei tribús de Cirenaïca, region dont es venguda la revòuta contra la dictatura kadafista, n’an aprofichat per preconisar l’instauracion dau federalisme e proclamar l’autonomia. De miliers de personas an participar à-n-aquesta ceremonia en la quala es estat nomat un Conseu encargat d’administrar lu afaires d’aquesta region, sota la direccion dau Chèic Ahmed Zubaïr Al-Senossí. Maugrat lo sosten oficial aficat au Conseu Nacional de Transicion, que rèsta lo representant legitime de Libia ai soms internacionals, d’observators véon en aquesta iniciativa de Bengazí un promier pas devèrs la particion dau país. Lo president dau CNT Mostafà Abdeljalil, a respondut que « lu Libians si son bastuts per una Libia unida », qu’an pas « da besonh dau federalisme » e son pas « obligats d’adoptar un sistema federal ». Aquesta declaracion moastra ben lo valat que separa li esperanças federali d’unu e li certitudas de centralisme d’autres, maugrat un absença totala d’autoritat en un estat qu’a plus minga rason d’existar.

ESPOART

Dissabta passat, l’OGC Nissa a augut de dificultat faça à-n-una equipa de Nancí foarça realista qu’a dubert la marca en promiera mièja-temps denant que Nissa egalise per un goal de Ja Je Je. En segonda periòda l’escòre a pas cambiat. Nissa a acabat la partida sus d’un mach nul 1-1, resultat ben pagat vist que Nancí a augut doi escadenças franqui. Lu Nissarts son estats sauvats gràcia à doi paradas decisiui de David Ospina. Lo Gim resta à la setzena plaça dau campionat, a egalitat de ponch emé lo promier relegable Dijon.

Tra li autri equipas occitani : Montpelhier a ganhat contra Caen per 3-0 e rèsta à la segonda plaça à-n-un ponch dau leader lo Qatar Sant-German. Tolosa non a acapitat de batre Lorient e resta sus l’escòre 1-1. Bordeu a ben reagit à la sieu contra-performança de la setmana passada (derota à maion contra Nissa). Enfin, Marselha es en crisi après aver perdut per lo tèrço còup de seguida contra una novela equipa mau classada Aiacho.

METÈO

Lo temps resterà establa tota la setmana emé de soleu e de temperaturas de 14 grados en jornada, e tra 6 e 8 grados la nuèch.

Comment on this post

Blog archives

We are social!

Recent posts